v1 Eftir hetta vann Dávid sigur á Filistum og kúgaði teir, og Dávid tók teymar høvuðsstaðarins úr hondum Filista. v2 Somuleiðis vann hann sigur á Móabitum og máldi teir við reipi á tann hátt, at hann læt teir leggja seg á vøllin og máldi tvær reipslongdir til at týna lívið og eina til at vera á lívi. Soleiðis vórðu Móabitar tegnar Dávids og máttu gjalda honum skatt. v3 Dávid vann eisini sigur á Hádadezer Rehobssyni, kongi yvir Zóba, ið ætlaði at endurreisa ríki sítt við ánna. v4 Dávid tók av honum seytjan hundrað reiðmenn og tjúgu túsund manna gonguherlið og kvetti av hælsinurnar á øllum vagnhestum hansara; einans hundrað eirdi hann. v5 Og tá ið Áramitar komu úr Dámaskus at hjálpa Hádadezeri, kongi av Zóba, vá Dávid teir og feldi tjúgu og tvey túsund Áramitar. v6 Og Dávid setti jallar yvir Dámaskus-Áramitum, so at teir skuldu verða honum skattskyldigir tegnar. Soleiðis gav Harrin Dávidi sigur á øllum leiðum hansara. v7 Dávid tók eisini teir gullskildir, ið tænarar Hádadezers høvdu borið, og flutti teir til Jerúsalem. v8 Og umframt tað tók Dávid ovurmikið kopar úr Teba og Berotaj, borgum Hádadezers.
v9 Men tá ið Tói kongur av Hámat frætti, at Dávid hevði vigið alt herlið Hádadezers, v10 sendi hann Hádóram, son sín, á fund Dávids kongs til tess at bera honum kvøðu og ynskja honum eydnu fyri, at hann hevði barst móti Hádadezeri og vigið hann – tí at eisini Tói hevði verið í bardaga móti Hádadezeri – og hann hevði við sær alskyns gripir bæði av silvuri, gulli og kopari. v11 Teir halgaði Dávid eisini Harranum saman við tí silvuri og gulli, sum hann hevði halgað av herfonginum frá øllum teim tjóðum, sum hann hevði kúgað: v12 Edóm, Móab, Ammon, Filistar og Ámalek og av herfongi Hádadezers Rehobssonar kongs í Zóba.
v13 Og Dávid økti um navnfremi sítt, nú ið hann hevði vunnið sigur á Árami og á heimferðini hevði vigið átjan túsund Edómitar í Saltdali. v14 Dávid setti jallar í Edóm, um alt Edóm setti hann jallar, og soleiðis vórðu allir Edómitar tegnar Dávids. Men Harrin gav Dávidi sigur á øllum ferðum hansara. v15 Dávid ráddi nú yvir øllum Ísrael og gjørdi allari tjóð síni rætt og skjal.
v16 Jóab Zerujuson var á odda fyri herinum, og Jósjafat, sonur Áhiluds, var frásagnarmeistari. v17 Zádok, sonur Áhitubs, og Áhimelek, sonur Ebjatars, vóru prestar og Seraja ritari. v18 Benaja, sonur Jójada, var á odda fyri Kretum og Pletum; og synir Dávids vóru prestar.