v1 Harrin, drottin, birti mær hesa sjón: Hann læt ongsprettur kykna upp, so skjótt sum hógvurin tók at grógva og grasið aftur spratt, eftir at kongur hevði sligið. v2 Tá ið tær høvdu oyðetið grasið av jørðini, mælti eg: »Á Harri, drottin, fyrigev! Hvussu kann Jákup standast, hann, sum er so vesælur?« v3 Tá iðraði Harrin seg um hetta. »Tað skal verða av ongum,« segði Harrin. v4 Harrin, drottin, birti mær hesa sjón: Sí, Harrin, drottin, beyð út oyðandi eldi, sum turkaði upp hitt mikla djúp; men tá ið hann fór at oyða landið, v5 mælti eg: »Á Harri, drottin, lætt av! Hvussu kann Jákup standast, hann, sum er so vesælur?« v6 Tá iðraði Harrin seg um hetta. »Hetta skal verða av ongum!« segði Harrin, drottin. v7 Hesa sjón læt hann mær berast fyri: Sí, Harrin stóð uppi á borgargarði og helt á blýloddi, v8 og hann segði við meg: »Hvat sært tú, Ámos?« Eg svaraði: »Blýlodd!« Tá mælti Harrin: »Nú vil eg ræsa blýlodd mitt niður í fólk mítt Ísrael; eg vil ikki umbera tað meira.
v9 Ísaks offurheyggjar skulu oyddir verða og Ísraels halgidómar týnast; við svørði eg rísi móti ætt Jeróboams.«
v10 Tá sendi Ámazja, prestur í Betel, Jeróboami, Ísraels kongi, hesi boð: »Ámos kveikir samansvørjing móti tær í miðjum Ísraels ríki; landið kann ikki bera øll orð hansara. v11 Tí at soleiðis sigur Ámos: Fyri svørði skal Jeróboam falla, og Ísrael herleiddur verða burtur úr landi sínum.« v12 Og Ámazja segði við Ámos: »Hav teg burtur, síggjari, og slepp tær aftur til Júdalands; har kanst tú vinna tær føðina og profetera har; v13 í Betel mást tú ikki longur profetera, tí at her er kongahalgidómur og ríkistempul.« v14 Tá svaraði Ámos og segði við Ámazja: »Eg eri hvørki profetur ella profetalærusveinur, eg eri seyðamaður og morberjarøktari; v15 men Harrin tók meg burtur frá fylginum og segði við meg: Far og profetera fyri fólki mínum Ísrael. v16 Hoyr tí orð Harrans, tú, sum sigur: Profetera ikki móti Ísrael og tala ikki móti Ísaks ætt! v17 Tessvegna sigur Harrin: Kona tín skal vera skøkja í borgini; synir tínir og døtur skulu fyri svørði falla og jørð tín verða sundurskift við mátingarbandi; sjálvur tú skalt doyggja í óreinum landi og Ísrael verða herleiddur burtur av landi sínum.«