v1 Kiffaanngitsuunnginnerpunga? Apustiliunnginnerpunga? Jiisusi Naalagarput takusimannginnerpara? Ilissi tassaannginnerpisi Naalakkami suliarisakka? v2 Allanut apustiliunngikkaluarumaluunniit ilumut ilissinnut apustiliuvunga, ilissimi Naalakkamut apustilinngoqqullunga qaaqqusaaninnut naqissutaavusi.
v3 Uannik isornartorsiuisunut illersuutissara imaappoq: v4 Nerisussaatitaannginnerpugut imertussaatitaanatalu? v5 Pisinnaatitaannginnerpugut qatanngutit ilaannik nuliaqassalluta angalaqatigalugulu apustilit allat Naalakkallu qatanngutai Kefasilu assigalugit? v6 Imaluunniit uanga Barnabalu kisitta sulinngitsoortussaannginnerpugut? v7 Kina sakkutuujusarpa imminut akissarsiaqartilluni? Kina viinnequteqarfiliornerpa inerititaanit nerissanani? Kinaluunniit savaatinik paarsisarpa savaatit immuannik imissanani? v8 Piumasaarsorlunga taama oqarnerpunga, imaluunniit inatsisit taamatuttaaq oqaaseqannginnerpat? v9 Mosesimmi inatsisaani allassimavoq: »Ussik karrertaajaasoq nerinaveeqqusissanngilat.« Guuti taama oqarami ussigit eqqarsaatiginerpai? v10 Imaluunniit uagut pinerpaatigut? Uagummiuna pilluta tamanna allassimasoq, assallatserisoq neriugisaqarluni assallatserissammat, karrertaajaasorlu sulissammat pissarseqataanissani neriuutigalugu. v11 Anersaamut atasut ilissinni siaruarteratsigit ingasappallaassava uinimmut atasut ilissinni katersussagutsigit? v12 Allat ilissinnit pisassaqartitaammata uagut annerusumik pisassaqartussaannginnerpugut? Taamaattoq tamanna atorsimanngilarput, atukkavulli tamaasa naammagaavut Kristusimik iivangkiiliumut akornutissiiumannginnatta. v13 Nalugassiuk naalaffimmi sulisut naalaffimmut tunissutigineqartunik inuussuteqartartut, pilliivimmilu kiffartuussisut pilliutigineqartut ilaannik pissarsisartut? v14 Taamattaaq Naalagaq peqqusivoq iivangkiiliumik tusarliussisut iivangkiiliu inuussutissaqaatigissagaat.
v15 Kisianni uanga pisassarigaluama arlaannaannilluunniit pissarsiumasimanngilanga, taamalu allanngilanga pisassarititaasut piumasariniarlugit. Taamaaliornissamit toqorusunneruvunga. Usorsisimaarutiga taanna kimilluunniit uannit arsaarinnissutigineqassanngilaq! v16 Iivangkiiliumi tusarliukkakku taamaaliornera usorsisimaarutigisinnaanngilara, pinngitsoornangami tusarliuttussaagakku, eqqanarlu uanga iivangkiiliu nalunaajaatiginngikkukku. v17 Kajumissuserami maliinnarlugu tamanna suliarigaluarukku akissarsiassaqartariaqassaanga, tusarliuttussaanerami tunngavigalugu suliarigukku tassaasimassaaq uannut suliassissutaasoq. v18 Suna taava akissarsiarissanerpara? Tassaassaaq iivangkiiliu kimulluunniit akissaajaataanngitsumik nalunaajaatigigiga iivangkiiliumillu nalunaajaaninni uannut pisassarititaagaluartut piumasarnagit!
v19 Kimulluunniit inussiaataanngikkaluarlunga tamanut inussiaatigitippunga sapinngisamik amerlasuut ilataariumallugit. v20 Juutinut juutiusutut ilerpunga juutit ilataariumallugit, inatsisit ataanniittunut inatsisit ataanniittutut ilerpunga naak nammineq inatsisit ataanniinngikkaluarlunga, inatsisit ataanniittut ilataariumallugit. v21 Inatsiseqanngitsunut inatsiseqanngitsutut ilerpunga inatsiseqanngitsut ilataariumallugit – imaanngikkaluartoq Guutimi inatsiseqannginnama, tassami Kristusip inatsisaanut atagama. v22 Sanngiitsunut sanngiitsunngorpunga sanngiitsut ilataariumallugit. Kikkut tamaasa peqatiginiartarsimavakka ilaannaannilluunniit annaassaqarumagaluarlunga. v23 Tamakkuninngali tamanik iliuuseqarpunga iivangkiiliu pillugu taassuminnga pissarseqataajumallunga.
v24 Nalugassiuk arpaliuttarfimmi unammisut tamarmik arpattaraluartut, ataasiinnaalli ajugaasup pisassaa pissarsiarisaraa? Arpagitsi pissarsiariniarlugu! v25 Timersorlutik unammisut tamarmik sunik tamanik pinaveersaagaqartarput – allat taamaaliortarput ajugaasumut niaqorusiussaq toquliortartoq pissarsiariumallugu, uagulli taamaaliortarpugut toquliorneq ajortoq pissarsiariumallugu. v26 Taamaattumik uanga arpappunga maangaannaq pinnanga, tilluuttartutullu silaannarmut tillueriartutut inngilanga. v27 Timiga peqqarniisaarfigaara naalatsillugulu pinngitsaalillugu allanut oqaluussisartunga narrugisaaqqunanga.