v1 Kingorna Naalakkap Aaperaat saqqummerfigaa Mamrep Orpiini Egini ullup kiatseruttornerani tupermi paavani issiatillugu. v2 Aaperaap niaqqi massisikkamiuk angutit pingasut siunerminiittut takulerpai. Takoriaramigit arpaannaq tupermi paavanit ornippai pallorfigalugillu. v3 Oqarpoq: »Naalagaq, isinnut saammaannarsiguma uanga kiffat qaangiinnaqinanga. v4 Imermik aallersitsissaanga isikkasi asanniassagassigit, orpiullu ataani qasuersaarniaritsi. v5 Taava nerisassaminernik aalliutissavassi, tumannguersarniassaasi kiffarsi aqqusaarassiuk, nerereerussi ingerlaqqikkumaarpusi.« Akipput: »Oqaatsitit malillugit ilioriannguarit.«
v6 Aaperaap Sara tupermut iserfiginasuarpaa oqarfigalugulu: »Qajuusanik aseqqorissunik seanik pingasunik uuttuutilinnik tigusipallariarlutit naqittaagit timiusaliorlutillu.« v7 Aaperaat nammineq arpaannaq nersutaatiminukarpoq nersuteeqqamik pitsaasumik illinnartumik aallerluni, kiffamullu tunniummagu taassuma piareersarasuarpaa. v8 Taava immummik kinersitamik immummillu nutaamik nersuteeqqamillu taassuminnga nerisassiarineqartumik sassaallerfigai, orpiullu ataani neritillugit saqqippai. v9 Taava aperaat: »Naak Sara nuliat?« Aaperaat akivoq: »Taqqama tupermi.« v10 Taava oqarpoq: »Aappaagu taamaalippat ilinnut takkuteqqikkumaarpunga, taavalu Sara nuliat ernertaarsimassaaq.«
Sara tunuani toqqup paavaniilluni tusarnaarpoq. v11 Aaperaap Sarallu utoqqalillutik ukiorpassuit angusimavaat, Saralu aaqassaarsimavoq; v12 Sara ilumigut illarpoq isumaliorluni: »Angummut pilerissuseqaleqqissanerpunga uffa utoqqalillarlunga naalagaralu utoqqalereersoq?« v13 Naalakkalli Aaperaat oqarfigaa: »Sooq Sara illarpa isumaliorluni: Ilumut taama utoqqaatigilerlunga qitornartaassanerpunga? v14 Naalakkamut ajornartoqanngilaq! Aappaagu taamaalippat ilinnut takkuteqqikkumaarpunga, taava Sara ernertaarsimassaaq«. v15 Sarali misiarpoq: »Illanngilanga,« siooragamimi. Naalagarli oqarpoq: »Ilumut illarputit.«
v16 Taava angutit taakku nikuipput Sodomap tungaanukarniarlutik, Aaperaallu qaniorpai. v17 Naalagaq isumaliorpoq: »Pilersaarutiga Aaperaamut isertussanerpara? v18 Aaperaammi kinguaassai inuiassuanngorumaarput pissaasut, taassumuunalu nunarsuarmi inuiaat tamarmik pilluaqqunarsissapput. v19 Qinersimavarami ernini kinguaassanilu peqqussammagit Naalakkap aqqutigeqqusaa maleruassagaat iluartumik naapertuilluartumillu iliorlutik, Naalakkap Aaperaamut neriorsuutigisani tamaasa eqquutitissinnaaniassagamigit.« v20 Naalagarlu oqarpoq: »Sodomamit Gomorramillu nipitoqisumik nilliasoqarpoq, ajortuliornerallu sualoqaaq. v21 Maanna aqqarumallerpunga takuniarlugu ilumut uanga maalaarfigineqarnittut ajortigisumik pisoqarnersoq pisoqannginnersorluunniit; tamanna ilisimasariaqarakku.«
v22 Taava angutit tassannga aallarput Sodomaliarlutik, Aaperaalli Naalakkap saani uninngaannarpoq. v23 Aaperaat sassarpoq oqarluni: »Ilumut iluartut piiassanerpigit iluaatsunut ilanngullugit? v24 Immaqa iluartunik 50-inik illoqarfimmi tassaniittoqarpoq. Ilumut nungutinniarpigit illoqarfillu taanna isumakkeerfigiumanagu uffa 50-inik iluartortaqartoq? v25 Qanoq ilillutit iluartut iluaatsunut ilanngullugit toqorarsinnaavigit iluartut iluaatsullu atugarisaat assigiissillugit? Taamaaliorneq ajornaqaaq! Nunarsuarmik tamarmik eqqartuussisuusoq eqqortuliussannginnerpa?« v26 Naalagaq oqarpoq: »Paasigukku Sodomami 50-inik iluartoqartoq taakku pillugit illoqarfik tamaat isumakkeerfigissavara.« v27 Aaperaalli akivoq: »Naalagaq, maanna kingumut sapiiserlunga ilinnut oqalulerpunga, naak issuinnaallunga arsaannaallungalu. v28 Immaqa iluartut taakkua 50-it tallimanik inorpaat. Taava illoqarfik tamaat aserussanerpiuk taakku tallimat pillugit?« Naalakkap akivaa: »45-nik iluartoqartoq paasigukku aserussanngilara.« v29 Aaperaat aammaarluni oqarpoq: »40-innaappatami?« Akivorlu: »Taava taakku 40-t pillugit qanoq iliuuseqassanngilanga.« v30 Aaperaat oqarpoq: »Naalagaq, kamaateqinanga oqaqqikkama: Taavami 30-innaappata?« Naalagaq akivoq: »30-nik iluartoqarpat qanoq iliuuseqassanngilanga.« v31 Aaperaat oqarpoq: »Immaqa sapiiserpallaaraluarlunga ilinnut oqaloqqinniarpunga, Naalagaq. 20-innaappatami?« Naalakkap akivaa: »20-t taakku pillugit illoqarfik aserussanngilara.« v32 Aaperaat oqarpoq: »Naalagaq, kamaanniaqinanga suli ataasiarlunga oqaloqqilerama. Quliinnaappatami?« Naalakkap akivaa: »Qulinik iluartoqarpat illoqarfik aserussanngilara.« v33 Naalagaq Aaperaat oqaluutereeramiuk qimaguppoq, Aaperaallu najukkaminut uterpoq.