v1 Aaperaap utoqqalilluni ukiorpassuit angusimavai, Naalakkallu tamatigut pilluaqqusimavaa. v2 Taava Aaperaap inussiaatimi illuminiittut utoqqaanersaat pigisami tamarmik paarsisaat oqarfigaa: »Assat uanga kinguaassiuutinnut tutsiguk, v3 Naalagaq qilaap nunallu Guutiat ilisimannittoralugu uppernarsaatissagakkit, ernera Kana'anikkut najugaqarfigisama arnartaannik nuliarsaatissanngikkit. v4 Uangali nunannut eqqarlinnullu aallarlutit tassannga ernera Iisaaq nuliassarsiussavat.« v5 Inussiaataata oqarfigaa: »Kisianni arnap taassuma nunamut matumunnga ilagiumanngippanga taava ernerit nunamut illit nunagisimasaraluannut utertissanerpara?« v6 Aaperaalli akivaa: »Naamivik, ernera nunamut tassunga utertinniaqinagu. v7 Naalakkap qilaap Guutiata ataatama illua eqqarlimalu nunaat qimatsikkamigit uppernarsaaffigalungalu oqarluni nuna manna kinguaassannut tunniukkumallugu, taassuma inngilini illit siunikkut aallartikkumaarpaa ernera tassannga nuliassarseqqullugu. v8 Kisianni arnap taassuma ilagiumanngippatit taava uannut uppernarsaanerigaluit atorunnaassaaq. Qanorlu pisoqaraluarpalluunniit ernera tassunga utersanngilluinnassavat.« v9 Inussiap oqaatsit taakku tunngavigalugit assani naalakkami Aaperaap kinguaassiuutaanut tutsillugu uppernarsaaffigaa.
v10 Inussiaq qatigattuut qulit naalakkami pigisaasa ilaat erlinnartuutillu naalakkami pii tamalaat nassarlugit Aram-Naharajimimut Nakorip illoqarfianukarluni aallarpoq. v11 Unnukkut illoqarfiup avataani puilasuliami arnat imertartarfiat nalerorlugu qatigattuut aqupisippai. v12 Taava qinuvoq: »Naalagaq naalakkama Aaperaap Guutia, naalagara Aaperaat ajunngitsuliorfigalugu ullumi iluatsitsisinnaatinnga. v13 Tassa maani puilasup illoqarfiup niviarsiartaasa imertartarfiata killingani qeqarpunga. v14 Imertartullu ilaannut oqaruma: Imertaatinnit immisilaannga, oqarpallu: Imerniarit! Aamma qatigattuutitit immisissavakka – taannaagili kiffannut Iisaamut qinikkat. Tamatumuuna ilisimassavara naalagara ajunngitsuliorfigigit.«
v15 Oqaatsini naagaalu Rebekka aggerpoq imertaanni tuiminiitillugu. Rebekka Betuelip, Milkap Aaperaap qatanngutaanik Nakorimik ueqartup, panigaa. v16 Arnaavoq assut pinnersoq, niviarsiaq suli angummit innaanneqarsimanngitsoq. Puilasumullu aterluni imertaanni immeriarlugu majuarmat, v17 inussiap ornikkasuarpaa oqarlunilu: »Imertaatinnit immisilaannga.« v18 Rebekka akivoq: »Imerniarit, naalagaq!« Imertaannilu aqqarasuarlugu immippaa. v19 Imerusuersartereeramiullu oqarpoq: »Aamma qatigattuutitit imertaateriarlugit immisissavakka imerusuersillugit.« v20 Imertaammilu imaa nersutinik immitsivimmut kueriarlugu puilasuliamut imertaqqipallappoq qatigattuutai tamaasa imissillugit. v21 Taamaaliortillugu inussiap nipaqarani isigaa, paasiumallugu Naalakkap angalanini iluatsitinneraa iluatsitinnginneraaluunniit. v22 Qatigattuut imerusuersareermata angutip tiguai pinnersaat qingarmioq kuultiusoq bekamik ataatsimik oqimaassuseqartoq tajallu marluk kuultiusut sekelinik qulinik oqimaassuseqartut; tajallu taliinut atitippai. v23 Taavalu oqarfigaa: »Kia panigaatit? Ataatavit illuani unnuiffissatsinnik inissaqarnerpa?« v24 Akivoq: »Betuelip Milkap Nakorillu ernerata panigaanga.« v25 Nangipporlu: »Karriiarnikunik nerukkaatissanillu peqaqaagut, inissaqarporlu unnuiffissamik.« v26 Taava inussiap Naalagaq sikiffigaa v27 oqarlunilu: »Qujanarsili Naalagaq naalakkama Aaperaap Guutia, naalakkannut ajunngissutsini unneqqarissutsinilu soraarutinngimmagit. Naalakkap naalakkama qatanngutaata illuanut ingerlatissimavaanga.«
v28 Niviarsiap arpaannaq angerlarluni tamakku tamaasa anaanami ilaqutaanut oqaluttuarai. v29 Rebekka angummik qatannguteqarpoq Labanimik atilimmik. Taassuma angut taanna puilasup killinganiittoq ornikkasuarpaa. v30 Pinnersaat qingarmioq tajallu qatanngummi taliiniittut takusimagamigit qatanngummilu Rebekkap angutip oqaasii oqaluttuarigai tusaasimallugit angut taanna qatigattuutini najorlugit puilasup killingani qeqartoq ornippaa. v31 Oqarporlu: »Iseriartorniarit, Naalakkap pilluaqqusaa uumaa! Sooq silamiiginnarpit uffa illu qatigattuullu inissaat piareersareerikka?« v32 Taava angutip taassuma Labani illuanut ingerlaqatigaa qatigattuullu nammaassaajarlugit. Labanilu aggiussivoq karriiarnikunik qatigattuunullu nerukkaatissanik imermillu angutip taassuma ilagisaasalu isikkatik asassinnaaniassammatigit pujoralaarullugit. v33 Nerisassanilli sassaaffigimmanni angut oqarpoq: »Oqariartuutigisara oqaatigeqqaartinnagu nerissanngilanga.« Labani akivoq: »Qaa, qanorooq?« v34 Taava oqaluttualerpoq: »Aaperaap inussiaatigaanga. v35 Naalakkap naalagara pilluaatissillugu pisoorsuanngortippaa tunillugu savanik ussinnillu, sølvimik kuultimillu inussianillu angutinik inussianillu arnanik, qatigattuunik siutituunillu. v36 Sarallu naalakkama nuliata utoqqanngoreerluni naalagara ernertaappaa, taassumunngalu tunniuppai pigisani tamaasa. v37 Naalakkamalu uppernarsaasippaanga oqarluni: Ernera Kana'anikkut najugaqarfigisama arnartaasa ilaannik nuliassarsissanngilat. v38 Ataatamali illuanut eqqarlinnullu aallarlutit ernera tassannga nuliassarsiussavat. v39 Uangali naalakkannut oqarpunga: Qanormi iliussaanga arnap taassuma ilagiumanngippanga? v40 Akivaanga: Naalakkap – taassuma kiinaata saavani inuuvunga – inngiliminik ilaqartikkumaarpaatit kiffartuutinnillu iluatsitsisillutit ernera eqqarlinnit ataatamalu illuanit nuliassarseqqullugu. v41 Uanga eqqarlinnut piguit arnarlu taanna ilinnut tunniukkumanngippassuk taava uannut uppernarsaanerigaluit atorunnaassaaq. v42 Ullumi uanga puilasumut pigama ima qinuvunga: Naalagaq, naalakkama Aaperaap Guutia! Qanortoq naammassiniagara maanna iluatsitikkiuk! v43 Maani puilasup killingani qeqarpunga, niviarsiallu imertartut ilaat qinnuigigukku: Imertaatinnit immisilaannga! v44 Akippangalu: Imerniarit, aammattaaq qatigattuutitit immisissavakka, taava taannaagili arnaq Naalakkap naalakkama ernerata nuliassaatut aalajangigaa. v45 Qinnutiga naaniariariga Rebekka takkuteratarpoq imertaanni tuiminiitillugu, puilasumullu aterluni imertaanni qalluppaa. Oqarfigiganni: Immisilaannga, v46 taava imertaanni tuiminit aqqarasuarpaa oqarluni: Imerniarit, aammattaaq qatigattuutitit immikkumaarpakka. Imereeramalu aamma qatigattuut immippai. v47 Aperigannilu: Kia panigaatit? Akivaanga: Betuelip Nakorip Milkallu ernerata panigaanga. Taava pinnersaat qingaanut ivertippara, tajallu taliinut atitillugit. v48 Naalagaq sikiffigaara Naalagarlu naalakkama Aaperaap Guutia qutsavigalugu aqqutikkut eqqortukkut ingerlatimmanga, naalakkama qatanngutaata pania naalakkama erneranut nuliassarsiaritissinnaanngortillugu. v49 Maanna ilissi nalunaarfigisinga naalagara ajunngitsuliorfigiumanerissi unneqqariffigiumanerissilu imaluunniit taamaaliorumannginnersusi, ilisimaniassagakku qanoq iliussallunga.«
v50 Labanip Betuelillu akivaat: »Naalakkamit tamanna pivoq. Uagut tamanna oqaasissaqarfiginngilarput!
v51 Rebekka tassa saanniippoq, aallaqatiginiaruk naalakkavit erneranut nuliartaareqqullugu, soorlu Naalakkap taama aalajangersimagaa.«
v52 Oqaasiilu taakku Aaperaap inussiaataata tusaramigit Naalagaq nunamut pallorfigaa.
v53 Pinnersaatit sølviusut kuultiusullu atisassallu nassatani Rebekkamut tunniuppai, aamma qatanngutai anaanaalu tunissutinik akisuunik tunivai.
v54 Taava angalaqatigisanilu nerillutillu imerput, tassanilu unnuipput. Ullaakkullu makikkamik oqarpoq: »Naalakkannut uterlunga aallarlanga.«
v55 Rebekkalli qatanngutaa anaanaalu oqarput: »Niviarsiartarput ullulluunniit qulit missiliorlugit uagutsinniilaarallarli; kingorna aallarumaarputit.«
v56 Akivaali: »Kinguarsaqinasinga, maanna Naalakkap naammassiniagara iluatsitereermagu. Naalakkannut uterlunga aallarnissara akueriniarsiuk.«
v57 Oqarput: »Niviarsiartarput qaaqqullugu apereriassagipput.«
v58 Rebekkalu qaaqqullugu aperaat angut taanna aallaqatigiumaneraa, angerporlu.
v59 Taava qatanngutertik Rebekka milutsitsisaalu Aaperaallu inussiaataa angalaqataalu inuulluaqquaat.
v60 Rebekkalu pilluaqquaat oqarlutik:
»Qatannguterput,
10.000-inik tuusintilinngorinatoq,
kinguaassavillu
akeqqamik isaaffiat tiguarilissuk!«
v61 Taava Rebekka kiffaalu qatigattuunut qaqeriarlutik angut taanna malillugu aallarput. Inussiaq Rebekka ilaliullugu angerlarpoq.
v62 Iisaaq Be'er-Lahaj-Ro'imit Nunap Kujasissortaanit najugarisaminit tikiussimavoq; Nunap Kujasissortaani najugaqarami. v63 Unnulernerani narsaammi angalaartilluni qinerluni qatigattuut aggersut takulerpai. v64 Rebekkalli Iisaaq takuleramiuk qatigattuumit aqqarluni v65 inussiaq aperaa: »Kinaana angut parsiarluta narsaatikkut aggersoq?« Inussiap akivaa: »Tassa naalagara.« Taava Rebekkap kiinnani saaguaa. v66 Inussiallu qanoq iliornini tamaasa Iisaamut oqaluttuarai. v67 Iisaap Rebekka anaanami Sarap toqqanut isertippaa nuliartaaralugulu. Iisaap asasarilerpaa anaanamilu Sarap toqunerani aliasunnini qaangerlugu.