v1 Aaperaat nuliaqqippoq Keturamik atilimmik. v2 Taassumanngalu ernertaarai Zimrani, Jokshani, Medani, Midjani, Jishbaki Shualu. v3 Jokshanip kinguaarai Saba Dedanilu. Dedanillu ernerai Ashurikkut, Letushikkut Le'umikkullu. v4 Midjanip ernerai Efa, Eferi, Enoki, Abida Elda'alu. Taakku tamaasa Keturap ernerai.
v5 Aaperaap pigisani tamaasa Iisaamut kingornutitippai. v6 panerfamminilli ernertaani tunissutinik tunivai, sulilu inuutilluni kangimut, Nunap Kangisissortaanut aallartippai, ernerminit Iisaamit nigortillugit.
v7 Aaperaap ukiut inuuffigisai 175-iupput. v8 Aaperaat utoqqarsuanngorluni toquvoq, utoqqarmut ullussani naammatsissimallugit, siuaasaminukarlunilu. v9 Ernerisa Iisaap Ismaelillu ilivaat Makpelap qaarusuanut Efronip Soharip ernerata Hittikkuusup narsaatigigaluanut, Mamrep kangianiittumut, v10 narsaammut Aaperaap Hittikkunnit pissarsiarisaanut. Tassani Aaperaat nulialu Sara ilisaapput. v11 Aaperaap toqunerata kingornagut ernera Iisaaq Guutip pilluaatissippaa, Be'er-Lahaj-Ro'imilu nunaqarpoq.
v12 Tamassa Ismaelip Aaperaap ernerata Hagarip Egyptenimiuusup Sarap inussiaataata Aaperaamut ernertaarisaata kinguaavi. v13 Tamassa Ismaelip ernerisa aqqi eqqarleriikkuutaanut ateqaataasut: Nebajoti, Ismaelip angajulliliaa, Kedari, Adbe'eli, Mibsami, v14 Mishma, Duma Massalu, v15 Hadadi, Tema, Jeturi, Nafishi Kedmalu. v16 Tassa Ismaelip erneri naggueqatigiissortaminni naalagaasut aqqaneq-marluk tassalu aqqi illoqarfeerartaasa tammaarfiisalu ateqaatigisaat. v17 Tamassa Ismaelip ukiut inuuffigisai: ukiut 137-t. Taava toquvoq siuaasaminukarlunilu.
v18 Kinguaavi Havilamit Shuri Egyptenip kangianiittoq Assyriap tungaaniittoq tikillugu nunaqarput. Ismaeli taama inuuvoq qatanngutini tamaasa akerleralugit.
v19 Tamassa Iisaap Aaperaap ernerata kinguaavisa allassimaffiat: Aaperaap Iisaaq ernertaaraa.
v20 Iisaap 40-nik ukioqarluni Rebekka, Betuelip Aramæeriusup Paddan-Aramiup pania, Labanip Aramæeriusup qatanngutaa, nuliartaaraa.
v21 Iisaap nuliani qitornartaanngimmat Naalakkamut qinnuppaa. Qinnutaa Naalakkap tusarpaa, nulialu Rebekka naartulerpoq.
v22 Ilumiunili aportaatilermata oqarpoq: »Taamaassappat sooruna uanga taama pineqartunga?« Naalagaq siunersioriartorpaa,
v23 Naalakkallu akivaa:
»Inuiaat marluit illissanniipput,
inuiaqatigiit marluk arnaassutikkut anissapput.
Inuiaat arlaat arlaminnit pissaanerussapput,
angajulleq nukarlermut kiffaassaaq.«
v24 Ernivissaa nalliummat paasinarsivoq marlulissanik ilumittoq.
v25 Siulleq anillakkami aappaluttuuvoq, timaalu tamarmi soorlu qallersaat meqqulualik; taanna Esauimik atserpaat.
v26 Kingulliulluni nukaa anillappoq assamminik angajumi kimmia tigummillugu; taamaattumik Jaakumik atserpaat. Erniummata Iisaaq 60-inik ukioqarpoq.
v27 Nukappiaqqat taakku alligamik Esaui pinerrarissunngorpoq narsarsuarmi ivigalimmi angalaartartoq, Jaakuli inuuvoq pitsaasoq tupermi najugaqartoq. v28 Iisaap Esaui asavaa nersutit nujuartat neqaat mamarigamiuk, Rebekkalli Jaaku asavaa.
v29 Ilaanni Jaaku nerisassaminik igatillugu Esaui angalareersimalluni qasutavilluni tikippoq. v30 Esauip Jaaku oqarfigaa: »Aappaluttumik uuminnga illit pinnik nerisassannik tuninasuannga qasutassimaqigama.« Taamaattumik Esaui Edomimik taasarpaat. v31 Jaakuli akivoq: »Angajulliussutsit uannut pisiaritikkukku aatsaat taamaaliussaanga.« v32 Esaui oqarpoq: »Toqulerpunga! Angajulliussuseq sussara?« v33 Jaakuli oqarpoq: »Uppernarsaaffigeqqaarallannga.« Esauip uppernarsaaffigaa angajulliussutsi Jaakumut akigalugu, v34 Jaakup Esaui timiusamik eertaasanillu tunivaa; nerereerami imereerlunilu nikuippoq qimagullunilu; Esauip angajulliussutsi taama soqutiginngitsigaa.