v1 Josefip illumini pisortaq peqqusiffigaa: »Angutit ukua puui karrinik immikkit nassarsinnaasaat naammatsillugit, tamatigut aningaasaataat puuini qallinngortillugit; v2 ermuseralu sølviusoq nukarliup puuanut qallinngortillugu ilissavat aningaasanut karrisiniutaanut ilagitillugu.« Pisortaq Josefip peqqussutaa malillugu iliorpoq.
v3 Aqaguani qaalermat angutit siutituujutaallu aallartippai. v4 Illoqarfilli qimatsiaannaraat Josefip illumini pisortaq peqqusiffigaa: »Angutit taakku malikkit! Angugukkit ima oqarfigissavatit: Sooq ajunngitsoq ajortumik akilerpisiuk? Sooq naalakkama ermusaa tillippisiuk? v5 Tassaana taanna naalakkama nammineq ermuserisartagaa, pisussanik ilimasaarissutigisartagaa. Taamaaliorassi kusanaatsulioqaasi!« v6 Pisortap angugamigit taama oqarfigai, v7 akippullu: »Sooq taama oqarpit, naalagaq? Kiffatit taamaaliorsinnaanngilluinnarput. v8 Aningaasat puutsinni qalliusut nassaarigatsigit Kana'animit ilinnut oqquppavut; taava suna pillugu naalakkavit illuanit sølvimik kuultimilluunniit tillissanerpugut? v9 Kiffavit ilaat kinaluunniit taassuminnga nassaarfigineqartoq toqunneqassaaq, uagullu allat tamatta ilinnut inussiaatinngussaagut, naalagaq.« v10 Akivoq: »Oqarnissitut pisoqarniarli; kisianni ermutsimik taassuminnga nassaarfigineqartoq kisimi uannut inussiaatinngussaaq, ilissilu allat suneqassanngilasi.« v11 Puutik aqqarasuarpaat tamarmillu immikkut ammarlugit. v12 Pisortallu misissuiffigai angajullermit aallartillugit nukarleq kingulliutillugu. Ermuserlu Benjaminip puuani nassaarineqarpoq. v13 Taava atisatik alittorpaat, siutituujutitillu nammakkersoriarlugit illoqarfimmut uterput.
v14 Judap qatanngutaasalu Josefi suli illuminiittoq iserfigigamikku nunamut pallorfigaat. v15 Josefip oqarfigai: »Qanoq-una iliortusi? Nalugassiuk angut uattut ittoq pisussanik ilimasaarisartoq?« v16 Juda oqarpoq: »Qanoq akissagatta, naalagaq? Qanoq oqassagatta? Kiffatit Guutimit pisuutitaammata qanoq ililluta uppernarsarsinnaavarput pinngitsuunerput? Maanna naalakkama inussiaatigaatigut tassa uagut aamma taanna ermutsimik nassaarfigineqartoq.« v17 Josefili oqarpoq: »Taamaaliorumanngilluinnarpunga! Ermutsimik nassaarfigineqartoq kisiat inussiaatigissavara; ilissi allat eqqissillusi ataatassinnut angerlarsinnaavusi.«
v18 Taava Judap Josefi sassarfigaa oqarlunilu: »Tusannga, naalagaq, kiffat ilinnut oqalukkallarli, tamannalu pillugu kamaanniaqinanga, illimmi Farao naligaat. v19 Naalagaq, ima aperisimavatsigut: Ataataqarpisi, allanillu qatannguteqarpisi? v20 Taava ima akivatsigit, naalagaq: Utoqqaasumik ataataqarpugut, erneqarporlu utoqqalilluni ernertaarisaminik. Taassuma angajua toquvoq, anaanani toqummat taanna kiserngoruppoq, ataataatalu asavaa. v21 Taava illit ima oqarfigaatsigut, naalagaq: Tamaanga ilagisiuk takuniassagakku. v22 Imali akivatsigit, naalagaq: Nukappiaqqap taassuma ataatani qimassinnaanngilaa, qimakkaluarpani toqussammat! v23 Illilli ima oqarfigaatsigut, naalagaq: Nukarlersarsi tamaannaqatiginngikkussiuk uannut takkuteqqissanngilasi. v24 Kiffannut, uanga ataatannut, uteratta illit oqaaserisannik nalunaarfigaarput, naalagaq. v25 Ataatatta oqarfigaatigut: Aallaqqinniaritsi karrisiniulluta. v26 Akivarpulli: Taamaaliorsinnaanngilagut. Nukarlersarput ilagissagutsigu tasamunnarsinnaavugut, aatsaammi nukarlersarput ilagigutsigu angummut tassunga takutissinnaagatta. v27 Kiffavit, uanga ataatama, ima oqarfigaatigut: Ilisimavarsi nuliama marlunnik ernertaakkaanga. v28 Aappaa annaavara, isumaliorpungalu nersummit kiisortumit alittugaalluni toqutaasimasoq; kingornami takoqqinngilara. v29 Nukaalu uannit aallarukkussiuk angalatillusilu ajunaarpat uanga utoqqaq toqusut inaannut samunnartissavassinga anniaateqartillunga. v30 Maannalu kiffat, uanga ataataga, uterfigigukku nukappiaraq taanna uummammigut attavigisaa ilaginagu v31 paasiguniullu ilaginngikkipput tamanna toqussutigissavaa; taavalu kiffat, uagut ataatarput, qeersooq aliasutsillugu toqusut inaannut samunnartissimassavarput, naalagaq. v32 Uangami nukappiaraq taanna ataatannut akisussaaffigaara, naalagaq, ima oqarfigisimagakku: Ataata, ilinnut oqqutinngikkukku taava inuunera tamaat ilinnut pisuussuteqartuartussaavunga. v33 Taamaattumik uanga maanna ilinnut, naalagaq, inussiaataallunga maaniiginnarlanga nukappiaraq taanna sinnerlugu, nukappiaraq qatanngutini ilagalugit angerlarsinnaaqqullugu. v34 Saperluinnarpunga ataatannut angerlassallunga nukappiaraq taanna ilaginagu. Ataatama perlussiortitaanissaa takussallugu artorpara.«