v1 Hanna qinuvoq:
Uummatiga qiimmattarpoq Naalakkami,
Naalakkap nassuga massisippaa.
Qanera ammarpara akeqqannut,
annaassinerit tipaatsuutigigakku.
v2 Illernartoqanngilaq Naalakkatut,
soqanngilaq illiunngitsumik,
qaarsoqanngimmat Guutitsitut.
v3 Makitarpaluttumik oqaloqinasi,
oqaatsit sorraatsut qanissinnit aninaveerilit
Naalagaq Guutiummat nalusaqanngitsoq
inuillu suliaat tamaasa misilittarmagit.
v4 Pissarsuit pisissii napineqarsimapput,
aqullaariaannaasullu pissaanermik sakkulersimapput.
v5 Qaarsilasut timiusamik akilersillutik sulisoritipput,
kaattulli sulisariaarupput.
Ernisuitsuugaluaq arfineq-marlunnik ernivoq
amerlasuunilli ernilik taroriartorpoq.
v6 Naalagaq toqutitsisuuvoq uummartitsisuullunilu,
toqusut inaannut aqqartitsisuuvoq tassanngalu qaqititsisuulluni;
v7 Naalagaq piitsunngortitsisuuvoq pisuunngortitsisuullunilu,
nikanartitsisuuvoq akitsisitsisuullunilu.
v8 Nikanartut pujoralammit makitittarpai
piitsullu mingummit qaqittarlugit,
naalagaanerit akornanni ingitikkumallugit,
ataqqinarsissutaasumillu issiavissillugit.
Nunarsuummi sukai Naalakkap pigai,
qaavannullu nunarsuaq inississimavaa.
v9 Imminut upperluartut ingerlaviini sernissorpai,
iluaatsulli ajunaassapput taartumi,
kimilluunniit nammineq nakuussutsimigut ajugaasoqassanngimmat.
v10 Naalakkap akerartortai annilaassapput.
Qutsinnerussaartoq qilammit kallersitsivoq.
Qanortoq Naalakkap eqqartuukkiliuk nunarsuaq isorartooq,
kunngiutitani pissatsillugu,
tanitami nassua massisillugu.
v11 Taava Elkana Ramamut angerlarpoq; nukappiaqqalli Naalagaq kiffartuuppaa palasimit Elimit nakkutigineqarluni.
v12 Elilli erneri iluaatsuupput, Naalagarlu ilisarinngilaat. v13 Palasit inunnut imaattumik pisinnaatitaaffeqarput: Pilliutissanik toqutassanik aggiussisoqaraangat palasip kiffaa aggertarpoq ajassaassuaq pingasunik kapuutitalik tigumiarlugu; neqilu uunneqartillugu v14 ajassaassuaq puugutaasamut, qummuattamulluunniit, siatsivimmulluunniit igamulluunniit mangullugu kapiseriartarpoq, kapillugillu qaqitai tamaasa palasip nammineq pisassamisut tigusarpai. Israelikkut Shilomut pilliiartortut tamaasa taamaaliorfigisarpaat. v15 Maannali palasip kiffaata pilliutip tunnua suliluunniit pilliutigineqangitsoq pilliiniartoq oqarfigisarpaa: »Palasi neqimik siatassaanik tuniuk! Neqimik uussimasumik ilinnit piumanngilaq, ooqanngitsumilli piumavoq.« v16 Angutillu oqarfigigaangani: »Siullermik tunnua pilliutigisariaqarpoq, kingorna piumasannik tigusisinnaavutit,« taava kiffaq akisarpoq: »Naagga, maannakkut tunniutissavat, taamaaliunngikkuit nakuuserfigalutit tigussavara.« v17 Angutit inuusuttut taakkua Naalakkap kiinaata saani iluaatsuliornerat sualoqaaq Naalakkamut pilliutigisanik asissuinerugami.
v18 Samueli taama meeraatigigaluarluni Naalakkap kiinaata saani kiffartuussivoq efodimik ilupaassiamit sanaasumik atisaqarluni. v19 Anaanaata ukiut tamaasa qallersaateeqqamik sanaattarpaa ukiullu tamaasa pilliutissaq pilliutigiartorlugu uini Shilomut majuaqatigigaangamiuk nassartarlugu taassumunnga tunniukkiartorlugu. v20 Elip Elkana nulialu pilluaqqusarpai oqarlunilu: »Arnamit uumannga Naalakkap kinguaassaqartikkilisit Naalakkamut pigititaata taartissaanik.« Taava angerlartarput, v21 Naalakkallu isumassormani Hanna naartulersarpoq. Pingasunik ernertaarpoq marlunnillu panissaarluni. Nukappiararli Samueli Naalagaq najorlugu alliartorpoq.
v22 Eli utoqqarsuuvoq; tusaramiullu ernermi Israelikkut tamaasa qanoq iliorfigisaraat arnallu Toqqup Naapeqatigiittarfiup paavani kiffartuussisut innaattaraat v23 oqarfigai: »Sooq taamaaliorpisi? Tusarparami inuit tamarmik ileqqusi ajortut oqallisigigaat. v24 Taamaalioqinasi, ernikka! Naalakkammi innuttaasa akornanni ilissi pillusi oqallisigineqartut tamakku ajoqaat. v25 Angut inoqamminut ajortuliorpat Guuti isumaqatigiissitsiniarsinnaavoq. Naalakkamulli ajortuliortoqarpat taava kina isumaqatigiissitsiniarsinnaava?« Ataatartilli naalanngilaat, toqunissaammi Naalakkap aalajangiutereersimavaa.
v26 Nukappiararli Samueli alliartornermini Naalakkamit inunnillu nuannarisaanerujartuinnarpoq.
v27 Taava Guutip kiffaata Eli ornillugu oqarfigaa: »Ima oqarpoq Naalagaq: Illit siuaasaqaqatigiissortannut saqqummersikkaluarpunga Egyptenimi Faraomi kiffartortuugallarmata, v28 Israelillu naggueqatigiissortaanit tamanit qinigaraakka palasitut kiffartuuteqqullunga pilliiviutinnullu saqisaqqullugit tipigissaatilliisaqqullugillu efodimillu atisaqaqqullugit kiinnama saani, Israelikkullu pilliutaat tamaasa siuaasaqaqatigiissortannut tunniuppakka. v29 Sooq taava pilliutit toqutassat naatitanillu pilliutigisassat illunni pilliutigeqqusakka narrunartippisigit? Sooq ernitit uannit ataqqineruigit innuttama Israelip pilliutigisaasa tamarmik pitsaanersaannik puallarsartarlusi?« v30 Taamaattumik Naalagaq Israelip Guutia oqarpoq: »Oqaraluarpunga inoqutivit siuaasaqaqatigiissortavillu kiffartuuttuassagaannga. Maannakkulli Naalagaq oqarpoq: Kisianni taamaaliunngilluinnassaput! Ataqqinnitsikka kisiisa ataqqissavakka, narruginnitsikkali kanngutsissapput. v31 Ullummi nalliukkumaarput talivit siuaasaqaqatigiissortavillu taliisa uannit kipineqarfissaat inoqutinnik utoqqalisoqartinnagu. v32 Israeli sinngagisassavat taassumunnga ajunngitsuliakka tamaasa pillugit, illillu inoqutinnik utoqqalisoqanngisaannassaaq. v33 Eqqarlivit ilaat ataaseq kisiat uanga pilliiviutinnit nungutissanngilara. Isivit qaamarngat qamitissavara nakuussummillu inuussutigisannik piiaaffigalutit. Illit eqqarlinni allat tamarmik inereruttornerminni toqussapput. v34 Erninnut Hofnimut Pinehasimullu nalliuttussaq nalunaaqutigissavat: Ullormi ataatsimi marluullutik toqussapput. v35 Makitikkumaarparali palasi ilumoortoq uanga kissaatigisara piumasaralu malillugit iliorumaartussaq. Taanna illuliuukkumaarpara ataavartussamik, tanitamalu kiinaata saani kiffartortuassaaq. v36 Illit illunni amiakkuusut palasi taanna ornillugu pallorfigisariaqarumaarpaat skillingimik timiusamininnguamilluunniit piniarfigalugu, oqarumaarlutillu: Palaseqatigiit ilaannut ilanngutitinnga nerisassamininnguamik pissaqaqqullunga.«