v1 Benjaminimi anguteqarpoq pigissaartumik Kishimik atilimmik. Kishi Abielip erneraa, Abieli Serorip, Serori Bekoratip, Bekorati Benjaminikkuusup Afiap erneraa. v2 Kishi erneqarpoq inuusuttumik inugissumik Saulimik atilimmik; Israelikkunni taassumatut inugitsigisoqanngilaq. Angingaarami allat tamaasa niaqqumik qaangersimavai.
v3 Ilaanni Kiship Saulip ataataata siutituutimi ilaat tammarmata ernini oqarfigaa: »Kiffat ilaat ilagalugu siutituut ujariartukkit.« v4 Efraimip qaqqalittaa Shalishallu eqqaa angalaffigigaluaramikkit siutituut naninngilaat. Taava Sha'alimip eqqaa Benjaminillu nunaa angalaffigigaluarpaat, naninagilli. v5 Sufip eqqaanut pigamik Saulip kiffaq aapparisani oqarfigaa: »Utiinnarniarta, ataatama siutituut piunnaarlugit uagut isumaalugileqinavaatigut.« v6 Kiffaata akivaa: »Tusaariassasutit, illoqarfimmi uani Guutip kiffaa angut ataqqisaasoq najugaqarpoq, taassuma siulittuutigisai tamatigut eqquuttarput. Tassunnarallarta, immaqa taassuma kiffartuutitsinnut tunngasumik ilisimatissinnaavaatigut.« v7 Saulip kiffani oqarfigaa: »Tassunnaruttami angummut taassumunnga sumik tunissutissaqarpugut? Ilami allaat puutsinni timiusaataaruppugut, Guutillu kiffaanut tunissutissaqanngilagut. Suuteqanngilagut.« v8 Kiffap Sauli akivaa: »Sekelip sølviusup aggornerisa sisamaannik nassataqarpunga Guutip kiffaanut tunissutigisinnaasatsinnik, kiffartuutitsinnut tunngasumik ilisimatissinnaaqqulluta.« v9 – Itsaq Guuti siunersioriartoraangamikku Israelimi oqartarsimapput: »Qaa, siulittuisartoq orninniartigu!« Tassa maannakkut pruffiitinik taaneqartartut taamani takorluuisartunik taasarpaat. – v10 Saulip kiffani oqarfigaa: »Siunnersuutit ajunngilaq, qaa tassunnarniarta!« Taava illoqarfimmut Guutip kiffaata najugarisaanut iserput.
v11 Illoqarfiup majuariaagut ingerlatillutik arnanik inuusuttunik imertartunik naapitsipput, aperaallu: »Takorluuisartoq tamaaniippa?« v12 Akipput: »Aap, aatsaaginnaq tikippoq. Tuaviorniarit! Illoqarfimmut pivoq ullumi illoqarfiup inui qattunermi pilliisarfimmi pilliummik toqutassamik pilliisussaammata. v13 Illoqarfimmut iserniariarussi taava qattunermut pilliisarfimmut neriartortinnagu naammattoorsinnaassavarsi. Taanna tikiutsinnagu inuit nerillutik aallartissanngillat, pilliutissaq toqutassaq taassuma pilluaqqoqqaarallassammagu. Taamaalioreerpat aatsaat qaaqqusat nerissapput. Tappikunga majuarniaritsi, maannakkorpiaq naammattoorsinnaavarsi.« v14 Taava illoqarfimmut majuarlutik ingerlaqqipput, iseramillu takulerpaat Samueli qattunermut pilliisarfimmut majuarluni tungaannarminnut ingerlasoq.
v15 Ullormi Saulip tikiuffiata siuliani Naalakkap Samueli oqaluffigisimavaa oqarluni: v16 »Aqagu angummik Benjaminip nunaanit pisumik aallartitsivigiumaarpakkit. Taanna tanissavat innuttannut Israelimut naalagaaninngortillugu. Taassuma innuttakka filisterinit aniguisissavai, innuttamami naalliunnerat arajutsisimannginnakku kappialanerallu uannut anngussimammat.« v17 Samuelillu Sauli takuniariarmagu Naalakkap oqarfigaa: »Tassa angut ilinnut oqaatigisara: Taannaavoq innuttannut naalagaasussaq.«
v18 Saulip Samueli illoqarfiup isaaffianiittoq ornillugu oqarfigaa: »Oqarfigisinnaavinga takorluuisartoq sumi najugaqartoq?« v19 Samuelip akivaa: »Uanga tassaavunga takorluuisartoq. Siulliullutit qattunermut pilliisarfimmut majuarniarit taava ullumi nereqatigissavassinga. Aqagu ingerlaqatigiumaarpakkit ilisimajumasannillu tamanik nalunaarfigalutit. v20 Siutituut ullut pingasut matuma siornagut tammaasatit isumakuluutigissanngilatit nanineqareermata. Israelimimi erlinnartut tamarmik kimit pigineqartussaanerpat? Piginnittussat tassaannginnerpat illit ataatavillu inoqutai tamarmik?« v21 Sauli akivoq: »Uanga Benjaminikkuuvunga, Israelip naggueqatigiissortaasa ikinnersaannit pisuuvunga, uagullu eqqarleriiusugut Benjaminip naggueqatigiissortaasa eqqarleriissortaasa tamarmik nikanarnersaraatigut. Sooq taava taama oqaluffigaanga?« v22 Samuelilli Sauli kiffaalu nerisarfimmut iseqatigai inissillugillu qaaqqusanit tamanit sallinngortillugit; qaaqqusat angutit 30-t missiliorpaat. v23 Samuelip igasoq oqarfigaa: »Neqi immikkoorteqqusara qaaguk.« v24 Taava igasup quttoraq tiguaa Saulimut sassaallugu oqarlunilu: »Aajuna neqi ilinnut pissiaq, neriniarit. Taanna ilinnut immikkoortinneqarsimavoq piffissamut tassungarpiaq.« Ullormi tassani Saulip Samueli nereqatigaa. v25 Kingorna qattunermit pilliisarfimmit illoqarfimmut aterput, illullu qaani Sauli innarfissiorpaat; v26 innarporlu.
Aqaguani qaammarmat Samuelip Sauli illup qaaniittoq suaarpaa: »Makinniarit, ingerlaqatigissavakkit.« Sauli makippoq, Samuelilu aneqatigiipput. v27 Illoqarfillu qimaleramikku Samuelip Sauli oqarfigaa: »Kiffat oqarfiguuk siuaqqullugu. Illilli uninngalaarallarniarit Guutip oqaasereqqusaanik nalunaarfigissagakkit.«