v1 Tassa pingajussaanik ornilerpassi. »Ilisimannittut marluk pingasulluunniit nalunaajaateqarnerisigut eqqartuussutissaq sunaluunniit aalajangiiffigineqartassaaq!« v2 Aappassaanik ilissinniikkama oqaaseqareernittut maanna qimagusimaninni siornatigut ajortuliorsimasut allallu tamaasa oqarfigereerniarpakka tikiuteqqikkuma qajassuutissanagit! v3 Uppernarsaqquarsimi Kristusi uakkut oqaluttoq. Taanna ilissinnut sanngiitsuunngilaq, ilissinnili nakuuvoq. v4 Sanngiissusermimi sanningasulimmut kikiattugaavoq, Guutilli pissaaneragut inuuvoq. Uaguttaarlu taassumani sanngiippugut, ilissili pillusi inooqatigiumaarparput Guutip pissaaneragut.
v5 Immissinnik paasiniaaffiginiaritsi uppernermiinnersusi! Immissinnik misiligitsi! Ilisimanngilisiulluunniit Jiisusi-Kristusi ilissinniittoq? Tamanna ilisimanngikkussiuk misilinneqarnissinni atasimassanngilasi. v6 Neriuppunga paasissagissi uagut misilinneqarnitsinni atasugut. v7 Guutimulli qinnutigaarput ajortuliussanngitsusi. Siunertarisarput tassaanngilaq uppernarsarneqassasoq uagut misilinneqarnitsinni atasugut, tassaavorli ilissi ajunngitsumik iliuuseqassasusi; taava soqutaanngilaq uagut misilinneqarnitsinni atasimanngitsutut isikkoqassagaluarutta. v8 Sallusuissut assortorlugu iliuuseqarsinnaanngilagut kisianni illersorlugu. v9 Nuannaarutigisarparput uagut sanngiitsugut ilissi nakuugaangassi. Qinnutigaarputtaaq suut tamarmik ilissinni iluarsissasut. v10 Taamaattumik taama allappunga qimagusimatillunga, tikiukkuma sukangasaartariaqarumananga piginnaatitaaneq Naalakkamit pisara aserorterisuunani ineriartortitsisuusussaq atorlugu.
v11 Kiisa, qatanngutit, nuannaaritsi! Tamaasa iluarsarsigit, oqaaqqissaarutit ilassisigit, isumaqatigiigitsi, eqqisseqatigiigitsi! Taava Guutip asannittup eqqissisitsisullu najussavaasi. v12 Kunimmik illernartumik ilasseqatigiigitsi! Illernartut maaniittut tamarmik inuulluaqquaasi.
v13 Naalakkap Jiisusi-Kristusip saammaannerata Guutillu asanninnerata Anersaallu Illernartup ilagiissitsinerata najorlisi tamassi!