v1 Joshafati siuaasamini qasuersaalerpoq, Daavillu Illoqarfiani siuaasamini ilineqarluni, erneralu Jorami kingoraarlugu kunnginngorpoq.
v2 Taanna qatannguteqarpoq; tassa Joshafatip erneri Azarja, Jehieli, Zekarja, Azarjahu, Mikaeli Shefatjalu. Taakku tamaasa Israelip kunngiata Joshafatip ernerai. v3 Ernini amerlaqisunik tunioqqarpai, tassa sølvinik kuultinillu pigisanillu akisuunik taakkualu saniatigut illoqarfinnik pallittaalisalinnik Judamiittunik. Kunngiussuserli Joramimut tunniuppaa taanna angajulliliaammat. v4 Jorami ataatani kingoraarlugu kunngiulerami pissaaninilu isumannaallisereerlugu qatanngutini tamaasa Israelimilu naalagartat ilaat panamik toqorarpai.
v5 Jorami 32-nik ukioqarluni kunnginngorpoq Jerusalemimilu ukiuni arfineq-pingasuni naalakkersuilluni. v6 Akabip panianik nuliaqarami Akabikkut assigalugit Israelip kunngiisa ileqqui malippai Naalakkallu isaani ajortumik iliorluni. v7 Naalakkalli Daavimik angerfigeqatiginnissutini pissutigalugu Daavikkut nungutinnianngilai; neriorsorsimavaami Daavip kinguaavisalu qaammaqqut pigiuassagaat.
v8 Jorami kunngiutillugu Edomi Judap naalagaaffianit avissaarpoq, namminnerlu kunngissaminnik qinersillutik. v9 Tamatuma kingorna Jorami Edomimukarpoq sakkutuumi naalagaanertaat ilagalugit qamutini sorsuutit tamaasa nassarlugit, unnuakkullu Edomi imminerminik ungusisimasoq saassummagu Edomip taanna qamutinullu naalagaatitai ajugaaffigai. v10 Taamaalilluni Edomi Judap naalagaaffianit avissaarpoq, ullorlu manna tikillugu taamaappoq. Tamatuma nalaani aamma Libna Joramimit avissaarpoq Naalagaq siuaasami Guutiat tunussimammagu. v11 Aamma Judap qaqqaani qattunernik pilliisarfiliorpoq Jerusalemillu inui inuunerlutsilerlugit Judakkullu tammartillugit.
v12 Taava Jorami pruffiitimit Eliamit allagarsivoq, taakkunanilu ima allassimavoq: »Ima oqarpoq Naalagaq ataatavit Daavip Guutia: Ataatavit Joshafatip Judakkullu kunngiata Asap ingerlavii malissimannginnakkit v13 Israelilli kunngiisa aqqutigisaat atuarsimallugit Judakkullu inuunerlutsilerlugit Akabikkut iliorsimanerattut aammattaarlu qatanngutitit illit nammineq ataatavit erneri toqussimagakkit naak ilinnit ajunnginnerugaluartut, v14 taava Naalakkap innuttatit, ernitit, nuliatit pigisatillu tamaasa perlussuarmik nalliutsitsiviginiarpai. v15 Illit naalliuutinik eqqorneqarumaarputit; erlavikkut nappaateqalissaatit, kiisalu naggataatigut erlavitit anillakkumaarput.«
v16 Taava Naalakkap filisterit Arabiamiullu Nubiap eqqaani najugaqartut Joramimut kamatsippai. v17 Taakkua Juda sorsuffigaat, nunamut iserlutik pisuussutit kunngip illussaarsuaniittut tamaasa aallarullugit – kunngip ernerinut nuliaanullu allaat. Ernerisa nukarlersaat Joakazi kisiat aallarutinngilaat. v18 Tamakku tamarmik kingornatigut Naalakkap Jorami erlaviisigut ajoquteqalersippaa nappaateqalersillugu ajorunnaartussaanngitsumik. v19 Kiisalu ukiut marluk qaangiunneranni ima perulutsigilerpoq allaat erlavii anillallutik, anniaqalunilu toquvoq. Toqummat ataqqiniarlugu innermik ikumatitsiffigineqanngilaq uffa siulii taama pineqartarsimagaluartut.
v20 Jorami 32-nik ukioqarluni kunnginngorpoq, Jerusalemimilu ukiuni arfineq-pingasuni naalakkersuivoq. Toqugami maqaasineqanngilaq. Daavip Illoqarfiani ilineqarpoq, kisianni kunngit ilineqarfiannut pinnagu.