v1 Joashi kunnginngorami arfineq-marlunnik ukioqarpoq, Jerusalemimilu ukiut 40-t naalakkersuivoq. Anaanaa Be'ershebamioq Sibjamik ateqarpoq. v2 Joashi Naalakkap isaani eqqortumik iliorpoq palasi Jojada inuutillugu. v3 Jojadap kunngi nuliassaanik marlunnik toqqaassuppaa, erneqalerporlu paneqalerlunilu.
v4 Kingunitsiaagut Joashi aalajangerpoq Naalakkap naalaffia iluarsaanniarlugu. v5 Palasit Levikkullu katersortippai oqarfigalugillu: »Judami illoqarfiit angallavigisigit aningaasanillu Israelimi tamarmi katersuillusi Naalakkap Guutissi illuani iluarsagassat pisariaqartut ukiut tamaasa iluarsarsinnaaniassagatsigit. Tuaviorlusi taamaaliussaasi.« Levikkulli nukinginngillat. v6 Taava kunngip palasiuneq Jojada imminukartippaa oqarfigalugulu: »Mosesip Guutip kiffaata katersorsimasullu Israelikkut Tupermut Naapeqatigiittarfimmut akiliuteqartussaatippat. Sooq Levikkut Judami Jerusalemimilu akiliutinik taakkuninnga katersuisinngiligit? v7 Ataljap iluaatsup ernerisalu Guutip illua aseroriartortissimavaat allaallu tunissutit illernartitaasut Naalakkap naalaffianiittut tigusimallugit Ba'alinullu atorsimallugit.« v8 Taava kunngi naalakkiivoq illerfiliussasut Naalakkallu naalaffiata isaaffiata silataanut inissillugu. v9 Judami Jerusalemimilu nalunaarutigineqarpoq inuit Naalagaq aatsivigissagaat tunissutinik Mosesip Guutip kiffaata inoqajuitsumiitillutik Israelip tunissutigisartagassaatut aalajangigaanik. v10 Naalagartat inuillu tamarmik kajumillutik tunissutinik aatsipput. Naalaffimmukartarput aningaasanillu nakkartitsisarlutik illerfik ulikkaarserlugu. v11 Taava Levikkut illerfik kunngip nakkutilliisuutitaanut eqquttarpaat. Taakkualu takugaangassuk aningaasarpassuarnik imaqartoq kunngip allattua nakkutilliisorlu palasiunerup ivertissimasaa aggertarput imaartarlugulu. Taava inaanut ileqqittarpaat. Ullut tulleriit taamaaliortarput aningaasarpassuillu katersorlugit. v12 Kunngip Jojadallu aningaasat Naalakkap naalaffiani suliamik siulersuisunut tunniuppaat; taakkualu pissarsiaraat ujaqqerisut sanasullu kiisalu saviminermik kanngussammillu saffiortut naalaffimmik iluarsaassisussat. v13 Sulisussat sulillutik aallartipput naammassisaqalertoqalutillu. Guutip illua sanaqqippaat ussersaatit najoqqutareqquneqartut atorlugit pitsanngorsarlugulu. v14 Ineramik aningaasat sinneri kunngimut Jojadamullu aappaat, taakkualu aningaasat atorpaat Naalakkap naalaffiani atortussat puugutaasat immersakkallu kuultiusut sølviusullu kiffartuussinermi pilliinermilu atorneqartartussat suliarinerinut. Jojada inuutillugu pisarnertut naalaffimmi ikikkagassanik pilliisarput.
v15 Jojada utoqqanngorpoq ullussanilu naammatissimallugit. 130-nik ukioqarluni toquvoq. v16 Daavip Illoqarfiani ilivaat kunngit iliveqarfiannut Israelimi Guutimut illuanullu ajunngitsunik naammassisaqarsimaqimmat.
v17 Jojadap toqunerata kingorna Judap naalagartaasa kunngi Joashi ornippaat pallorfigalugulu, kunngillu naalaarpai, v18 taakkualu Naalakkap siuaasamik Guutiata illua qimappaat napasullu Asheramut pigititat guutiliallu guutisiorfigilerpaat. Naalakkap Judakkut Jerusalemimiullu kamaappai taamaaliornermikkut imminut pinerluuteqalersimammata. v19 Naalakkap imminut utertikkumallugit pruffiitinik aallartitsivigai; pruffiitit inuit oqaaqqissaaraluarpaat, taakkuli tusaajumanngillat.
v20 Taava Guutip anersaava pivoq Zakariamut palasip Jojadap erneranut. Taanna inunnut sassarpoq oqarfigalugillu: »Ima oqarpoq Guuti: Sooq Naalakkap inassutai unioqqutippisigit, atugarliortunngorlusi? Naalagaq tunukkassiuk ilississaaq tunuppaasi.« v21 Inuilli Zakaria perlutsinnialerpaat, kunngillu naalakkiineratigut Naalakkap naalaffiata silarliani ujaqqanik milloorlugu toquppaat. v22 Kunngip Joaship Jojadap imminut ilumoorfiginnissimanera sumiginnarlugu ernera Zakaria toqutippaa. Zakaria toqutinnani suaarpoq: »Qanortoq Naalakkap qanoq iliornersi isigiliuk akiniarlutillu!«
v23 Ukiut nikinneranni Aramæerit sakkutuui kunngimut Joashimut saassussiartorput. Judamut Jerusalemimullu pipput inuiannilu naalagartat tamaasa toqorarlugit. Tiguakkatik tamaasa Damaskusimi kunngimut nassiuppaat. v24 Naammi Aramip sakkutuui ikittuinnarnik sakkutooqarlutik tikiukkaluartut, Naalakkap sakkutoorpassuit taakkua assaannut tunniuppai Judakkut Naalagaq siuaasamik Guutiat tunussimammassuk. Joaship pillagaanera taamaalilluni naammassineqarpoq. v25 Aramæerit Joashi anniaqisoq qimaannarpaat. Atorfilittaasa pikitsitsiffigaat palasip Jojadap ernera toqussimammagu, siniffimminiittorlu toquppaat. Daavip Illoqarfiani ilineqarpoq, kisianni kunngit iliveqarfiannut pinnagu.
v26 Kunngimut pikitsitsisut tassaapput Zabadi arnap Ammonikkuusup Shim'atip ernera Jozabadilu arnap Moabikkuusup Shimritip ernera.
v27 Erneri pruffiitikkullu oqaatigeqqusarpassuit taassumunnga assuarliutaasut Guutillu illuata peqqissaartumik iluarsarneqarnera Kunngit Mappersagaannut Nassuiaatini allaaserineqarsimapput. Ernera Amasja kingoraarlugu kunnginngorpoq.