v1 Amasja 25-nik ukioqarluni kunnginngorpoq Jerusalemimilu ukiuni 29-ni naalakkersuilluni. Anaanaa Jerusalemimioq Joaddanimik ateqarpoq. v2 Amasja Naalakkap isaani eqqortumik iliorpoq kisianni uummammigut ilumoorluinnarani. v3 Kunngisut pissaanini isumannaalliseriarlugu atorfilittami ilaat ataataminik Joashimik toqutsisut toquppai. v4 Qitornaalli toqunngilai. Inatsisit Mosesip allagaani allassimasut malillugit iliorpoq, taakkunanimi Naalagaq ima peqqusisimammat: »Ataatat toqunneqassanngillat ernermik ajortuliaat pillugit ernerillu toqunneqassanatik ataatamik ajortuliaat pillugit. Nammineq ajortuliarisat kisimik toqussutaasinnaassapput.«
v5 Amasjap Judakkut katersortippai, immikkoortiterpaalu siuaasaqaqatigiikkuutaarlugit kiisalu sakkutuut tuusintikkuutaat hundredekkuutaallu naalagaannik naalagaqartillugit, tassa Juda Benjaminilu tamaat. 20-nik ukioqalereersimasut naatsorsorneqareermata paasinarsivoq sakkutuut pitsaanersiukkat sakkulisarsinnaasullu 300.000-iusut – tamarmik qalugiusallit takisuunillu eqqortinnaveeqqutillit. v6 Taakkua saniatigut sorsuttartut misilittagartuut 100.000-it Israelimit ilassarsiarai sølvinik talentit 100-t nalinginik akilerlugit. v7 Kisianni Guutip kiffaanik Amasjamut tikiuttoqarpoq oqarfigalugulu: »Kunngi, Israelip sakkutuui ilagissanngilatit, Naalakkap Israeli ilaginngilaa Efraimikkulluunniit naami. v8 Kisianni sorsukkiartussaatit sapiillutillu akiuutissallutit. Taamaaliunngikkuit Guutip akeqqannit toqunneqartissavaatit, Guutimi pissaaneqarpoq ikiuisinnaalluni ajunaartitsisinnaallunilu.« v9 Amasjap Guutip kiffaa aperaa: »Taakkumi sølvit talentit 100-t nalingi sorsuttartunut Israelimeersunut akiliutikka asuliinnaq tunniussimassavakka?« Guutip kiffaa akivoq: »Naalakkap allanik taakkunannga anneroqisunik tunisinnaavaatit!« v10 Taava Amasjap Efraimikkuusut akilerlugit sorsuttartussarsiani immikkoortippai nunaannullu utertillugit. Taakku Judakkunnut assut kamapput uumitsassimaqalutillu nunaminnut uterlutik.
v11 Amasja maanna sapiillilluni sakkutuuni ilagalugit sorsukkiartorpoq. Qooqqumut Tarajulimmukarput tassanilu Se'irikkut ajugaaffigalugit. 10.000-it toqutaapput, v12 allallu 10.000-it tigusarineqarput. Judakkut tigusatik qaqqamut majuarteriarlugit tassanngaanniit nakkaatippaat tamarmik aqqunarlutik toqorartillugit. v13 Kisianni sorsuttartut Amasjap nunaannut utertissimasaasa Judap illoqarfii Samariamiit Bet-Horonimut saassuppaat. Taakkualu Judakkut ilaat 3.000-it toquppaat annertoqisumillu ujajaallutik.
v14 Amasja Edomikkut ajugaaffigereerlugit uterami Se'irikkut guutiliaasa ilaat nassarpai. Nammineq guutigisassamisut inissippai pallorfigisarlugit pilliiffiginiarlugillu innermik ikitsisarluni. v15 Taava Naalakkap Amasja kamaatingaarpaa pruffiitimillu aallartitsivigalugu ima oqarfigitillugu: »Sooq inuiaqatigiit taakkua guutii innuttaminnik ilinnit aniguisitsisinnaasimanngitsut ujarpigit?« v16 Pruffiitilli taama oqaluffigimmani akillugu Amasja oqarpoq: »Kunngimut siunnersuisunngortitaagavit? Nipangerniarit! Taamaaliunngikkuit toqutaasinnaavutit.« Taava pruffiiti nipangerpoq oqarlunili: »Paasivara Guuti aalajangersimasoq suujunnaarsikkumallutit allamiut guutii guutisiorfigigakkit siunnersuutikkalu tusaajumanagit.« v17 Amasjap Judap kunngiata atorfilittani siunersiorpai Israelillu kunngia Joashi Joakazip ernera Jehup erngutaa aallartitsivigalugu imalu oqarfigitillugu: »Maannarit, nukittuneqqisaatta!« v18 Israelilli kunngiata Joaship Judap kunngia Amasja ima nalunaarfigitippaa: »Naasunngooq kapinartullip Libanonimiittup cederi Libanonimiittoq ilaanni ima oqariartorfigitissimavaa: Paniit uanga erninnut nulissiutitiguk! Nersutilli nujuartat pangalillutik sanioqqutilerlutik naasoq kapinartulik tullaaraat. v19 Edomimut ajugaanerit eqqarsaatigaat, taamaattumillu makitasuunngorsimavutit sulilu ataqqineqarnerulerumallutit. Angerlarsimaannarit! Sooq imminut ajunaartinniarpit taamaalillutillu aamma Judakkut ajunaartinniarlugit?« v20 Amasjalli tamanna tusaajumanngilaa. Tassa Guuti taama pisoqartitsivoq Judakkut akeraannut tunniunniaramigit Edomip guutii ujarmatigit. v21 Taava Joaship Israelip kunngiata Amasja Judap kunngia sorsuffigiartorpaa, Bet-Shemeshimilu Judamiittumi akiuullutik ajugaaniupput. v22 Juda Israelimit ajugaaffigineqarpoq, Judakkullu tamarmik qimaallutik nunagisaminnut angerlarput. v23 Israelilli kunngiata Joaship Judap kunngia Amasja Joaship ernera Joakazip ernutaa Bet-Shemeshimi tigusaraa Jerusalemimukaallugulu. Joaship Jerusalemip qarmaanit alenit 400-t Efraimip Isaaffianiit Isaaffimmut Teqeqqorlermut aserorterpai. v24 Kuultit sølvillu atortorisallu Guutip illuani Obed-Edomimiittut erlinnartuutillu kunngip illussaarsuani erlinnartuusivinniittut tamaasa tiguai. Taava inunnik akiniutissaminik tigusaqarluni Samariamut uterpoq.
v25 Israelip kunngiata Joaship Joakazip ernerata toqunerata kingorna Amasja Judap kunngia suli ukiuni 15-ini inuuvoq. v26 Amasjap oqaluttuassartai allat aallaqqaataanniit naggataannut allakkani Judap Israelillu Kunngiisa Mappersagaanni allassimapput.
v27 Amasja Naalakkamit tunussiartulermat Jerusalemimiut pikitsitsiffigaat, Amasjalu Lakishimut qimaavoq. Pikitsitsisulli inunnik Lakishimut aallartitsipput malersortillugu; taakkua Amasja tassani toquppaat. v28 Hestimut nammatsillugu oqqunneqarpoq ilineqarlunilu siuaasamini Daavip Illoqarfiani.