v1 Pisimasut tamakkua kunngip ilumoorsusianik takutitsisut kingornagut Assyriap kunngia Sankeribi tikiuppoq Judalu isaaffigalugu illoqarfiillu pallittaalisallit tiguarniakkani ungullugit. v2 Hizkijap paasigamiuk Sankeribip Jerusalemi saassutilersaaraa v3 naalagartani sorsuttartunilu pissarsuit siunersiorpai paasiniarlugu qanoq igineraat puilasut illoqarfiup avataaniittut milissorneqassappata, aperisaasalu kunngip siunnersuutaa isumaqatigaat. v4 Inuit amerlasuut katersuullutik puilasut tamaasa milissorpaat ermullu illoqarfimmut aqqutaa nunap iluatigoortoq asserlugu, ima oqaramik: »Sooq Assyriap kunngia tikiukkuni imermik naammattumik pissaqassava?« v5 Kunngip sapiillilluni illoqarfiup qarmaata aseqqui tamaasa iluarsaatilerpai qarmanilu napasulialiorluni. Qarmaq avaqqullugu allamik qarmaliorpoq, Daavillu Illoqarfiani Millo qajannaallisarneqarpoq. Kunngip inuit amerlaqisunik naalikkiortippai eqqortinnaveeqqusiortillugillu. v6 Sakkutuut naalagaanertassaannik ivertitsivoq. Kunngip angutit tamaasa illoqarfiup isaaffiata sioraani katersortippai oqaluffigalugillu qiimmassarniarlugit oqarlunilu: v7 »Sapiitsuugitsi nakuullusilu! Siooraqinasi, Assyriallu kunngia sakkutoorpassuilu qunugeqinasigit! v8 Taassuma iligisaa tassaavoq inuup talia, uagulli Naalagaq Guuterput iligaarput; taassuma ikiussavaatigut sorsuffiginiakkavullu nammineq akiussallugit!« Hizkija Judap kunngia taama oqalummat inuit nakussatsinneqarput.
v9 Assyriap kunngiata Sankeribip sakkutoorpassuani ilagalugit suli illoqarfiup Lakiship sioraaniitilluni angutitami ilaat Hizkijamut Judap kunngianut Judamiunullu Jerusalemimiittunut tamanut aallartippai. Taakku oqarput: v10 »Sankeribi Assyriap kunngia ima oqarpoq: Sunaana tatigaasiuk Jerusalemimi ungusaasimanissinni? v11 Hizkijap kaannermik imerusunnermillu toqutinniannginnerpaasi, tammartinnginnerpaasi oqarami: Naalakkap Guutitta Assyriap kunngiata assaanit annaakkumaarpaatigut. v12 Hizkijammi nammineq qattorngit Naalakkamut pilliisarfiit pilliiviillu piiarsimannginnerpai, taavalu Judap Jerusalemillu inui peqqusiffigisimallugit pilliivimmi ataasiinnarmi Naalagaq pallorfigisassagaat tipigissaatilliiffigisarlugulu? v13 Nalugassiuk uanga siuaasamalu inuiaat nunani allaniittut qanoq iliorfigisimagivut? Inuiaat allat guutiisa nunatik uanga assannit aniguisissinnaasimanerpaat? v14 Inuiaqatigiinni taakkunani siuaasama tiguarsimasaanni guutiusup kia uanga assannit annaasinnaasimanerpai? Taava Guutissi uanga assannit annaassinnaassanerpaasi? v15 Hizkijamit nakutitaaniaqinasi salloqittartillusi. Upperiniaqinasiuk! Inuiaqatigiinnimi naalagaaffinniluunniit sumiikkaluartuni guuteqanngilaq innuttaminik uanga assannit siuaasamaluunniit assaannit aniguisitsisinnaasimasumik. Taava ilissi guutissi qanoq ililluni annaassinnaassavaasi?« v16 Oqaatsinik taamaattunik sulilu allanik Assyriap kunngiata angutitai Guutimut Naalakkamut kiffaanullu Hizkijamut akerlilersuutaasunik oqalupput. v17 Aamma Assyriap kunngia allappoq Naalakkamut Israelikkut Guutiannut asissuutaasunik mitaatiginnissutaasunillu. Allakkani taakkunani ima allassimavoq: »Inuiaat allat guutiisa innuttatik uanga assannit annaassinnaasimanngimmatigit taava Hizkijap guutiata qanoq ililluni annaassinnaassavaasi?« v18 Assyriamiut aallartitaasa Jerusalemip inui qarmarsuarniittut oqaatsinik taamaattunik suaartarpaat Judakkutut oqalullutik. Taamaalillutik ersilersinniarpaat nikallortinniarlugillu illoqarfik tigusinnaajumallugu. v19 Jerusalemip Guutia oqaluuseraat nunarsuarmi inuiaat allat guutiisa inuit assaannit sanaaginnaasut oqaluuserineqarnerattut.
v20 Taamaattumik kunngi Hizkija pruffiitilu Esaja Amosip ernera qinupput qilammullu torlorlutik. v21 Naalakkallu inngili aallartippaa sorsuttartut, sakkutuut naalagaat sakkutuunullu naalagaanertaasut Assyriap kunngiata tammaarfianiittut taassumunnga toqorartillugit, taamalu kunngi kanngusulluni nunaminut utertariaqartillugu. Ullullu ilaanni guutimi naalaffianut isermat nammineq kinguaavisa ilaasa panamik toquppaat. v22 Taamaalilluni Naalakkap Hizkija Jerusalemillu inui Assyriap kunngianit Sankeribimit akeraannillu tamanit annaappai nunallu killeqarfiiniittut tamaasa eqqisseqatigitillugit. v23 Amerlaqisut Jerusalemimukarput Naalakkamut tunissutissaminnik nassarlutik Hizkijalu Judap kunngia tunissutinik akisuunik aatsivigalugu, taamanernillu Hizkija inunnit tamanit ataqqineqangaalerpoq.
v24 Tamatuma nalaani Hizkija napparujussuarpoq toqungajalluni. Taava Naalakkamut qinuvoq, Naalakkallu akivaa tupinnartuliorfigalugulu. v25 Hizkijali Naalakkap ajunngitsuliornera akillugu iliunngilaq. Makitasuunngorpoq, taamaattumillu nammineq Judalu Jerusalemilu kamannermik eqqorneqarput. v26 Hizkijali makitasuujusimagaluarluni maniguutilerpoq, aammattaarlu Jerusalemip inui taamaalipput. Taamaattumik Hizkija inuutillugu Naalakkap kamannerata tuffiginngilai. v27 Hizkija pisoorsuuvoq ataqqisaaqalunilu. Erlinnartuusiviliorpoq; taakkununngalu toqqorpai sølvit, kuultit ujaqqallu akisuut, tipigissaatiliassat, sakkut allarpassuillu akisuut. v28 Peqqumaasiviliorpoq karrinut viinnimullu uuliamullu toqqorsivissaminik nersutaasiviliorlunilu nersutaatit assigiinngitsut inissaannik uumasuusiviliorlunilu uumasuutit inissaannik. v29 Aamma illoqarfiliorpoq nersutaaterpassuaqarlunilu, Guutimmi pisoorsuanngortissimavaa. v30 Hizkijap Gihonip puilasuata kuuffia qulleq milippaa imerlu nunap iluatigut Daavip Illoqarfiata ilaanut killermut kuuffilerlugu. Qanoq iliornermini tamatigut iluatsitsisarpoq. v31 Aamma taamaappoq Babylonip naalagartaasa aallartitaat tikiummata apersuutigiartorlugit nalunaaqutit tupinnartut nunami pisimasut taamani Guutip Hizkija qimammagu misilinneqartillugulu nalujunnaarumallugu qanorpiaq uummammioqarnersoq.
v32 Hizkijap oqaluttuassartai allat upperluartutut naammassisai allattorneqarsimapput pruffiitip Esajap Amosip ernerata takorluugaani Judap Israelillu Kunngiisa Mappersagaanniittumi. v33 Hizkija siuaasamini qasuersaalerpoq. Ilineqarpoq Daavip kinguaavisa ilerfinut aqqutaata killingani. Judap Jerusalemillu inuisa tamarmik ataqqinningaarnertik toqunerani takutippaat. Ernera Manasse kingoraarlugu kunnginngorpoq.