v1 Taava Josija Jerusalemimi Naalakkamut poorskisiortitsivoq. Savaaqqat poorskisiutissat toquppaat qaammatit siulliata ulluisa 14-ianni. v2 Kunngip palasit naammassisassaannik sulisilerpai Naalakkallu naalaffiani sulinissaannut kajumissaarlugit. v3 Levikkut Israelimut tamarmut ajoqersuisuusut Naalakkamut illernartuusut oqarfigai: »Illerfik illernartoq illumi Israelip kunngiata Salomop Daavip ernerata sanasimasaaniitinniarsiuk. Ersullugu ingerlannissaa pisariaqarunnaarpoq. Maanna Naalagaq Guutersi innuttaalu Israeli naalaffimmi maani kiffartuutissavasi! v4 Siuaasaqaqatigiikkuutaarlusi nikittaattartoqatigiikkuutaarlusilu piareersimaniaritsi, soorlu Israelip kunngii Daavi erneralu Salomo taama peqqusisimasut, v5 naalaffimmilu inissitsiteritsi qatanngutissi, inuinnaat, siuaasaqaqatigiikkuutaarlutik immikkoornerat malillugu, immikkoortut tamaasa Levikkut siuaasaqaqatigiissortaannik ilaqartillugit. v6 Taava savaaqqat poorskisiutissat toqussavasi illernartillusilu, nunaqqatissinnullu nerisassiarissavasi Naalakkap Mosesikkut peqqussutigisimasai malillugit iliorlusi.«
v7 Josijap inuinnaat katersuussimasut tunivai savanik, savaaqqanik savaasaaqqanillu poorskisiornermi pilliutissanik, katillugit 30.000-inik ussinnillu 3.000-inik. Taakku kunngip nammineq pigisaminit tunniuppai. v8 Aamma naalagartai kajumissutsimikkut tunissuteqarput inunnut, palasinut Levikkunnullu. Hilkijap, Zekarjap Jehielillu Guutip illuanik nakkutilliisunut qullersaasut palasit tunivaat savaaqqanik poorskisiornermi pilliutissanik 2.600-nik ussinnillu 300-nik. v9 Aammattaaq Levikkut tunineqarput savaaqqanik poorskisiornermi pilliutissanik 5.000-inik ussinnillu 500-nik siulersuisuminnit Konanjamit taassumalu qatanngutaanit Shemajamit Netan'elimillu kiisalu Hashabjamit, Je'ielimit Jozabadimillu.
v10 Nalliussinissamut suut tamarmik piareermata palasit inigisartakkaminnut sassarput, Levikkullu nikittaattartoqatigiikkuutaarlutik inissipput – soorlu kunngi taama peqqusisimasoq. v11 Levikkut savaaqqat poorskisiutissat toquppaat, aavallu Levikkunnit palasinut tunniunneqarpoq pilliivimmullu serpartaatigineqarluni. Taava Levikkut savaaqqat amiiarpaat. v12 Neqaasa ilaat pilliutigineqartussat immikkoortippaat tunniunniarlugit siuaasaqaqatigiinni immikkoortunut, inuinnarnut, Naalakkamut pilliutigissammatigit Mosesip allagaani peqqussutit malillugit. Aammattaaq ussigit taamaaliorpaat. v13 Taava Levikkut savaaqqat poorskisiutissat ileqqoreqqusaq malillugu innermut ikumatitamut siappaat. Kisianni tunissutit illernartitat igani, igarsuarni puugutaasanilu uuppaat. Tuaviorlutik inuinnarnut agguaappaat. v14 Taamaalioreeramik namminneq palasillu poorskisiutissartik siappaat; palasimmi, Aronip erneri, unnuarorneranut sulimmata ikikkagassanik tunnortaannillu pilliillutik. Tamanna pillugu Levikkut namminneq palasillu, Aronip erneri, poorskisiutissartik siappaat. v15 Tussiartartut Asafip erneri inigisartakkaminniittuarput, soorlu Daavi, Asafi Hemani kunngillu siulittuisartua Jedutuni taama peqqusisimasut. Aamma isaaffinnik paarsisut isaaffiit nakkutigisamik killinganiiginnarput. Qatanngutimik Levikkut poorskisiutissaminnik piareersaammatik arlaannaasaluunniit kiffartornertik kipitittariaqarsimanngilaat.
v16 Taamaalilluni ulloq taanna Naalakkamut kiffartuussineq tamarmi aaqqissuunneqarpoq. Kunngip Josijap peqqusineratut poorskisiorlutik nereqatigiipput Naalakkallu pilliiviani ikikkagassanik pilliillutik. v17 Poorskisiornermut atatillugu Israelikkut taamani katersuussimasut seernarsaateqanngitsumik timiusartorfik ulluni arfineq-marlunni nalliussivaat. v18 Pruffiitip Samuelip nalaanili Israelimi taama poorskisiortoqarami aatsaat maanna kingumut taama nalliussineqarpoq. Josijap siornagut kunngiusarsimasut poorskisiorneq nalliussinngisaannarsimavaat Josijap palasit, Levikkut, Judamiut Israelimiullu tikiussortorpassuit Jerusalemillu inui ilagalugit nalliuttorsiortitsineratut. v19 Tamanna pivoq ukiut Josijap naalakkersuiffiisa 18-ianni.
v20 Tamakku tamarmik pereernerisa kingorna Josijallu naalaffimmik iluarsaassereernerata kingorna Neko Egyptenip kunngia Karkemishimut Eufratip eqqaaniittumut aallarpoq sorsukkiartorluni, Josijalu aallarpoq Neko saassukkiartorlugu. v21 Taava Nekop oqariartorfigitippaa: »Judap kunngia, sooq akuliunniarpit? Illit saassunnianngilakkit, kunngeqarfilli akerlerisara saassunniarpara. Guutip peqqusimavaanga tuavioqqullunga. Guuti akiorniaqinagu, taanna uanga iligaara. Akiorniarunni suujunnaarsissavaatit!« v22 Josijali tunuanngilaq; iligiunnaarumallugu sorsuffigilerpaa. Nekop oqaasii Guutip qarnganit pisut tusarnaanngilai, Megiddolli qooruani saassussivoq. v23 Taava Josija pisissaartartumit piseriarneqarpoq, angutitaminullu oqarpoq: »Maanngaanniit qimagutitissinga annertuumik ikilerneqarama!« v24 Angutitaasa qamutinit sorsuutinit aqqarpaat qamutaasalu ilaannut allanut ikitillugu. Jerusalemimukaappaat, tassanilu toquvoq. Kunngit iliveqarfianni siuaasami sanianni ilineqarpoq, Judamiullu Jerusalemimilu najugaqartut tamarmik toqunera aliasuutigaat. v25 Pruffiiti Jeremia Josijamut uppummik taalliorpoq. Tamatuma kingorna angutit arnallu tussiartartut tamarmik uppumminni Josijap aqqa taasarpaat, tamannalu Israelikkunni ileqquliutivinneqarsimavoq. Taallat taamaattut allakkani Upputini allassimapput.
v26 Josijap oqaluttuassartai allat upperluartutullu naammassisai Naalakkap inatsisaani allassimasut malillugit – v27 tassami oqaluttuassartai tamarmik aallaqqaataanniit naggataannut – Israelip Judallu Kunngiisa Mappersagaanni allassimapput.