v1 Israelip ernerisa ilaqutalisarlutik Jaaku ilagalugu Egypteniliartut aqqi makkuupput: v2 Rubeni, Simmiuut, Levi, Juda, v3 Issakari, Zebuloni, Benjamini, v4 Dani, Naftali, Gadi aamma Asheri. v5 Jaakup kinguaavi tamarmik katillutik 70-iupput. Josefi taamani Egyptenimeereerpoq.
v6 Josefi qatanngutaalu kinguaariissoqatigiillu taakku tamarmik toqoreersimapput, v7 Israelikkulli kinguaassiorluarput; tamani tamaani naapitassaapput, ujameriappullu, amerlingaaramillu nuna tamaat siammarfigaat.
v8 Taava Egyptenimi kunngeqalerpoq Josefimik sianigisaqanngitsumik; v9 taassuma innuttani oqarfigai: »Inuiaqatigiit Israelikkut uatsinnit pissaanerulerput amerlanerulerlutillu. v10 Silatusaarluta iliuuseqarfiginiartigit amerliartorpallaaqqunagit. Sorsuttariaqalissaguttami taakku akeqqatsinnut ilannguteratarsinnaapput sorsuffigaluta nunamilu naalaganngorlutik.« v11 Israelikkut nakkutilliisulerneqarput, taakkualu Israelikkut erloqisillugit pinngitsaalillugit sulisittussaavaat illoqarfiit Faraop peqqumaasivissai, Pitomi Ramsesilu sananeqassammata. v12 Naalliutsitaanertilli alliartortillugu amerliartuinnarlutik siammariartorput Egyptenimiunut qununarsillutik. v13 Egyptenimiut Israelikkut pinngitsaalillugit inussiatut sulisitarilerpaat v14 inuunerallu taakkununnga atoruminaallisillugu artornartunik sulisillugit marralerisillugit qarmasissialiortillugillu narsaatinilu suliassanik tamalaanik sulisillugit; pinngitsaalillugit inussiat suliassaat tamakku tamaasa suliaritippaat.
v15 Taava hebræerit ernisussiortui – aappaa Shiframik atilik aappaalu Puamik atilik – Egyptenip kunngianit ima nalunaarfigineqarput: v16 »Hebræerit arnartaat ernisussioraangassigit alaatsinaalluartarniarsiuk erniaat nukappiaraanersoq niviarsiaraanersorluunniit; nukappiaqqat erniarineqartut toquttassavasi, niviarsiaqqalli inuutiinnartassavasi.« v17 Ernisussiortulli Guuti mianerigamikku Egyptenip kunngiata peqqussutaa naalannagu nukappiaqqattaaq inuutiinnartarpaat. v18 Taamaattumik Egyptenip kunngiata ernisussiortut qaaqqutillugit oqarfigai: »Qanoq-una iliortusi? Nukappiaqqat inuutiinnartarpasi.« v19 Ernisussiortut Farao akivaat: »Hebræerit arnartaat Egyptenimiut arnartaat assiginagit ernitsoreqigamik ernisussiortoq suli tikiuterianngitsoq ernereersimasarput.« v20 Ernisussiortut Guutip ajunngitsuliorfigai, Israelikkullu amerlasoorsuanngorput kisissaanngitsunngorlutik. v21 Ernisussiortut Guuti mianerimmassuk taakku kinguaassisippai.
v22 Faraolli innuttani tamaasa peqqusiffigai: »Nukappiaqqat inunngortut tamarluinnaasa Nilenimut igittassavasi niviarsiaqqalli inuutiinnartarlugit.«