v1 Tamaaniittoqarpoq inupiluusumik Shebamik atilimmik, Bikrip erneranik Benjaminikkuusumik. Taanna sulluartaammik qarlortartitsilluni suaarpoq:
»Daavi pisassaqarfiginngilarput,
Isajip ernera kingornussassaqarfiginngilarput.
Angerlaannaritsi, Israelikkuususi!«
v2 Israelikkut tamarmik Daavi qimallugu Sheba Bikrip ernera ingerlaqatigaat. Judakkulli kunngertik ilumoorfigalugu katersuuffigaat Jordanimillu Jerusalemimut ingerlaqatigalugu.
v3 Daavi Jerusalemimut angerlarami panerfani qulit illussaarsuani paareqqullugu uninngatitani illumut paarineqarfissaannut pisippai pisariaqagaannillu pilersorlugit; kingornali innaatinngilai. Ulloq toquffitsik tikillugu tassani mattussaapput uillarnertut inuullutik.
v4 Kunngip Amasa oqarfigaa: »Judakkut sakkulersortikkit, maannamiillu ullut pingajussaanni maaniikkisi!« v5 Taava Amasa aallarpoq Judakkut sakkulersortikkiartorlugit. Imminulli piffissarititaq qaangerlugu mulummat v6 Daavip Abishaji oqarfigaa: »Maanna Sheba Bikrip ernera Absalomimit suli annerusumik uatsinnut ulorianartunngorpoq. Taamaattumik sakkutuukka ilaliullugit malersoruk, illoqarfiit pallittaalisaliukkat taassumunnga pigileqqunagit periarfeeruteqqunatigulu!« v7 Taava sakkutuut Joabip siulersugai kreterillu pleterillu sakkutuullu sorsullammaat tamarmik Abishaji ilagalugu Jerusalemimit aallarput Sheba Bikrip ernera malersoriartorlugu.
v8 Ujarassuaq Gibeonimiittoq tikimmassuk Amasa tassunga pereersimavoq. Joabi qallersaammik sorsulluni atortakkaminik atisaqarpoq. Qaavatigullu qiterusersimavoq panartalimmik puuminiittumik makisimminut aalajangersimasumik. Sassaleriarmat taanna katappoq. v9 Joabip Amasa oqarfigaa: »Ajunngilatit, qatanngutiga?« Talerpimminillu Amasa umiisigut tiguaa kuninniarlugu. v10 Amasalli savissuaq Joabip tigummisaa mianersorfiginngilaa, Joabillu taassuminnga akuaagut kapivaa ataaseerlugu erlavii nunamut nakkartillugit.
Taavalu Joabip nukaatalu Abishajip Sheba Bikrip ernera kingumut malersulerpaat v11 Joabip sakkutuuisa ilaat timip toqungasup saniani uninngasoq ima suaartartillugu: »Joabimik isumaqatiginnittut Daavimullu iliusut tamarmik Joabi malillissuk!« v12 Amasa aanaaqaluni aqqusinermi orloqqavoq. Angutillu takugamiuk sakkutuut tamarmik tassani unerartut Amasa aqqusinermit narsaammut assakartippaa qallersaammillu ulillugu, saneqquttummi tamarmik takuaat uniffigalugulu.
v13 Amasa aqqusinermit peerneqarmat tamarmik Joabi malillugu aallaqqipput Sheba Bikrip ernera malersorlugu. v14 Shebap Israelip naggueqatigiissortai tamaasa aqqusaartorsimavai illoqarfik Abel-Bet-Ma'aka tikillugu, Bikrikkullu eqqarleriit angutitaat tamarmik katersuullutik tassunga ilagaat. v15 Daavip sakkutuuisa Sheba Abel-Bet-Ma'akami unguaat, illoqarfillu kaajallallugu ippiliugaliorput qarmaq avalleq tikillugu; sakkutuullu Joabip ilagisaasa tamarmik qarmarsuaq aserorternialerpaat uppitinniarlugu. v16 Arnarli silatooq illoqarfimmit suaarpoq: »Tusaagitsi! Joabi oqarfigisiuk qanilleqqullugu, oqaloqatigiumagaluarakku.« v17 Qanillimmallu arnaq oqarpoq: »Joabiuit?« Angermat arnap oqarfigaa: »Oqaasissakka tusaakkit, naalagaq.« Joabi akivoq: »Tusaavakkit.« v18 Arnaq nangippoq: »Itsaq ima oqartarput: ›Abelimiut siunersiuinnarsigit.‹ Taava suut tamarmik aalajangiiffigineqartarput. v19 Uagut Israelimi qanilaarnersaasut unneqqarinnersaasullu ilagaavut, illilli pilersaarutigaat illoqarfik Israelimi anaanaasutut isigineqartoq piuneerunniarlugu. Sooq illoqarfik Naalakkap pigisaa aserorterniarpiuk?« v20 Joabip akivaa: »Ila aseruinissaq piuneerutitsinissarlu siunertarinngilakka. v21 Naamerluinnaq! Kisianniuna angutip Efraimip qaqqalittaani najugaqartup Shebap Bikrip ernerata assani kunngimut Daavimut silutsissimagaa. Taanna tunniussiuk, taava illoqarfissi qimassavara.« Arnap Joabi akivaa: »Niaqua ilinnut naloriunneqassaaq qarmarsuaq qulaallugu.« v22 Arnap illoqarfiup inui ajunngitsumik siunnersoriartorlugit ornippai, taakkualu Sheba Bikrip ernera niaquerpaat niaqualu Joabimut naloriullugu. Joabi sulluartaammik qarlortartitsimmat sakkutuui tamarmik illoqarfimmit qimagullutik angerlarput, Joabilu kunngimut Jerusalemimiittumut uterpoq.
v23 Joabi Israelimi sakkutuunut tamanut naalagaanersaavoq, Benajalu Jojadap ernera kreterinut pleterinullu naalagaavoq. v24 Adonirami pinngitsaalisaallutik sulisitaasunik nakkutilliisuuvoq. Joshafati Akiludip ernera kunngimut allattuuvoq. v25 Sheja naalagaaffimmi allattuuneruvoq, Sadokilu Ebjatarilu palasiupput. v26 Aammali Ira Jairikkuusoq Daavimi palasiuvoq.