v1 Daavip kunngiutilluni ukiut pingasut tulleriit kaannersuaqarmat Naalakkap kiinaa ujarpaa, Naalagarlu akivoq: »Aammut pisuuneq Saulimi eqqarlerisaanilu ippoq, Sauli Gibeonimiunik toqoraammat.« v2 Gibeonimiut Israelikkuunngillat, Amorikkulli amiakkuinut ilaapput; naallu Israelikkut Gibeonimiut illersorumallugit uppernarsaaffigisimagaluaraat Saulip toqorarsimavai Israelikkut Judakkullu sernissornissaat ilungersuutiginermit. Daavip Gibeonimiut qaaqqullugit oqarfigai: v3 »Qanoq iliorfigissavassi, qanorlu iliorlunga ilissinnut isumakkeerfigitissaagut Naalakkap innuttai ilissinnit pilluaqquneqarsinnaaqqullugit?« v4 Gibeonimiut akivaat: »Saulimik eqqarlerisaanillu isumaqatigiinngissuterput sølvi kuultiluunniit atorlugit aaqqinneqarsinnaanngilaq, Israelimilu kimilluunniit toqutsissalluta pisussaanngilagut.« Daavi aperivoq: »Sumimmi piumaffigaasinga?« v5 Taakkulu akipput: »Pineqarpoq angut uatsinnik toqutsiniartoq pilersaaruteqartorlu nungutikkumalluta Israelimi tamarmi amiakkuerulluta. v6 Kinguaavisa ilaat arfineq-marluk uagutsinnut tunniutikkit, Naalakkap saani nivinngassagatsigit Gibeonimi Naalakkap qaqqaani.« Kunngi oqarpoq: »Pissavasi.« v7 Mefiboshetili Jonatanip ernera Saulip ernutaa kunngip asattuuppaa nammineq Jonatanillu Saulip ernerata Naalagaq naqqissigalugu uppernarsaaqatigiinnertik naapertorlugu. v8 Rispalli Ajjap paniata Saulimut ernertaarisai marluk Armoni Mefiboshetilu Merabillu Saulip paniata Adrielimut Barzillajip Meholakkuusup erneranut ernertaarisai tallimat v9 kunngip Gibeonimiunut tunniuppai; qaqqamilu nivinngarpaat Naalakkap kiinaata saani. Taama taakku arfineq-marluk ataatsikkut toqupput; toqutaapput katersuiffiup ulluini siullerni suaasiassanik katersuiffiup aallartinnerani.
v10 Rispap Ajjap paniata atisani aliasuutit qaarsumut siaarpai katersuiffiullu aallartinneraniit toqutaasut siallerfigineqalerserlugit tassaniiginnarluni. Ullukkut qilaap timmiaanut nerisassarsiortunut miffigitsaalisarpai, unnuakkullu nunarsuup nersutaanit nerineqatsaalisarpai. v11 Daavip tusaramiuk Ajjap pania Rispa Saulip panerfaa qanoq iliortoq v12 aallarpoq Saulip erneratalu Jonatanip saarngi Jabeship Gileadimiittup inuinit aallugit; Saulimmi Jonatanillu timaat filisterit Sauli Gilboami ajugaaffigigamikku Bet-Shanip niueriartortarfiani nivinngarsimasaat Jabeshemiut tillissimavaat. v13 Daavip Saulip erneratalu Jonatanip saarngi tassannga tiguai, toqutaasullu saarni ataatsimut katersorpaat v14 ilillugillu Saulip erneratalu Jonatanip saarnginut ilanngullugit Saulip ataataata Kiship ilerfani Selami Benjaminip nunaani. Kunngip peqqussutigisai tamarmik naammassineqarput, kiisalu Guutip nuna saammaappaa.
v15 Filisterit Israelilu kingumut sorsuutilermata Daavip sakkutuuni ilagalugit aallarpoq filisterillu saassullugit. Daavi qasoqqavoq. v16 Jishbi-Benobi, Rafap kinguaavisa ilaat, qalugiusarsuaqarpoq kanngussaasumik 300 sekelenik oqimaassusilimmik, nutaamillu panaqarpoq. Pilersaarpoq Daavi toqukkumallugu. v17 Abishajilli Serujap ernerata Daavi ikioriartorpaa filisterilu toqullugu. Taava Daavi sakkutuuisa uppernarsaallutik oqarfigaat: »Kingorna sorsukkiartoqatigissanngilatsigut Israelip qullia qameqqunagu.«
v18 Kingorna Israelikkut filisterinut sorsoqqilerput Gobimi. Taamanikkut Sibbekajip Hushameersup Safi Rafap kinguaavisa ilaat toquppaa. v19 Gobimi sorsuuteqqileramik Elkananip Jairip Betlehemimiup ernerata Goliati Gatimioq toquppaa. Taassuma qalugiusaata ipua ikaartiteriviup ikaarussuatut silitsigaaq.
v20 Taava kingumut Gatimi sorsuutilerput. Tassani anguterujussuaqarpoq assammini isikkaminilu illugiinni arfinilinnik inualimmik, tassa katillugit 24-nik. Aamma taanna Rafap kinguaavisa ilagaat. v21 Taassuma Israeli mitaatigimmagu Daavip angajuata Shim'ap ernerata Jonatanip toquppaa.
v22 Toqutaasut taakku sisamat Rafap kinguaavisa Gatimiut ilagaat, taakkulu Daavimit sakkutuuinillu toqutaapput.