v1 Erinarsugassiaq manna Daavip Naalakkamut erinarsuutigaa taamani Naalakkap aniguisimmani akeqqaminit tamanit Saulillu assaanit.
v2 Oqarpoq:
Naalagaq tassa qaarsora, pallittaalisara, aniguisitsisiga,
v3 Guutiga, qaqqara qimarnguffiga,
eqqortinnaveeqqutiga, nassuk annatsitsisiga pallittaalisara,
qimarnguffiga, nakuuserfigineqarnermit annaassisiga.
v4 Torlulaffigaara Naalagaq, unnersiutigisassaq,
annatsitaavungalu akeqqannit.
v5 Toqup qaraartuisa avatangersimavaannga,
aserornerup kuussuisa patippaannga annilaartillunga.
v6 Toqusut inaata qilerutaasa nimersimavaannga,
toqullu napiarniutaasa sioorasaarpaannga.
v7 Annikilliorninni Naalagaq torlorfigaara
suaarlungalu Guutinnut.
Naalaffimminit tusarpaanga,
nillianera apuuppoq siutaanut.
v8 Taava nunarsuaq aalallunilu sajuppoq,
qilaap tunngavii sajuppilupput,
sajupput sualungaartumik Guuti kamassimammat.
v9 Anillagarpoq pujoq sorluinit,
nungutitsisorlu inneq qarnanit,
taassumannga aniapput aamat ikualasut.
v10 Qilak atsillisippaa aqqarlunilu,
nuissat taartut tummarfigalugit.
v11 Kerubit qimusserfigalugit aallarpoq
anorip suluiniilluni.
v12 Avatangerneqarsimavoq taarmit,
uligalugit nuiarsuit sialuup taartitai.
v13 Sioraani qaamanermit aniapput
aamat ikualasut.
v14 Kallersitsivoq Naalagaq qilammi,
Qutsinnerussaartup nipini tutsiutitippaa.
v15 Qarsut piseriuppai siammakaatillugit akeqqani,
innaallagissamillu annilaarsarlugit.
v16 Immap naqqa takussaalerpoq,
nunarsuullu tunngavii uleerneqarput
sioorasaarineratigut Naalakkap
sualungaarneratigut kamannerata.
v17 Qutsissumit isaassivoq tigullungalu,
qaqillunga imarsuarnit.
v18 Annaappaanga akeqqannit pissarsuarnit,
uannik uumissuisunit, uannut pissaavallaartunit.
v19 Ullormi ajunaarfinni sioorasaarpaannga,
kisianni Naalagaq serniginnitsigaara.
v20 Ingerlatippaanga nunamut aallariarfittuumut,
annaappaanga iluarisarigaminga.
v21 Iluarsusera pillugu akilerpaanga Naalakkap,
iliorfigaanga akillugu assamma minguissusiat,
v22 tassa Naalakkap aqqutigeqqusai atuarakkit,
ajortulinnginnamalu Guutinnut.
v23 Inassutai tamaasa takkunniitittuarpakka,
ileqqoreqqusaalu unioqqutinngilakka.
v24 Taassuma peqqusersuitsutut isigaanga,
ajortuliornissamullu mianersortarpunga.
v25 Iluarnera akillugu iliorfigaanga Naalakkap,
takugamiuk minguitsuusunga.
v26 Unneqqarissumik iliortarputit unneqqarissumut,
assuarnaatsumillu assuarnaatsumut.
v27 Peqqusersuitsuunerit takutittarpat peqqusersuitsuusumut,
killormoortumilli iliortarlutit peqquserluttumut.
v28 Ikiortariallit annaffissittarpatit
makitasaarnialli nikanarsisittarlugit.
v29 Illimmi qaammaqqutigaakkit, Naalagaq,
Naalakkap taarsiorfiga qaammarsarpaa.
v30 Illit ikiuinikkut qarmat aseruavakka
Guutima ikiuineragut qarmaliat qulaallugit pissillunga.
v31 Isornaalluinnarpoq Guutip aqqutaa,
Naalakkap oqaasii sukuluipput,
taanna eqqortinnaveeqqutigaat
taassumani qimarnguffissarsiortut tamarmik.
v32 Kinami Guutiua Naalagaq Guutiunngippat,
kina qaarsuua Guuterput qaarsuunngippat?
v33 Guutiga tassaavoq pissaanermik sakkuliisiga,
aqqutinnillu innarluitsunngortitsisoq.
v34 Isikkakka oqillassarpai kulavaap isigaasut
qattunernilu tummisassaqalersillunga.
v35 Akiuunnermik ilikkarsarpaanga
pisissi kanngussak qilusinnaanngortillugu talinnik.
v36 Eqqortinnaveeqqutinnik illersuutissannik tunivarma,
ikiuinerpillu nakussassarpaanga.
v37 Allorarneqqortusitipparma,
singernikkalu aqullaaqqajaanngillat.
v38 Akeqqakka malersorpakka piuneerullugillu,
uterpunga aatsaat nungutitaareermata.
v39 Nungutippakka sequmisillugillu nikueqqinnaveersillugit,
orloraqqapput isikkama killinganni.
v40 Sakkulerparma pissaanermik sorsunnissamut,
akerartortikka saanni aqullaajorartillugit.
v41 Akeqqakka qimaatippatit,
akerartortikkalu piuneeruppakka.
v42 Suaartaraluarput ikiorneqaratilli,
suaartaraluarput Naalakkamut, akinngilaali taassuma.
v43 Sequmisippakka pujoralaannanngortillugit
tullaaralugillu pikutut.
v44 Inuiaat sorsuunneranni annaapparma,
inuiaqatigiinnut naalagaaninngortipparma,
inuiaat takornartarisama kiffartorfigissavaannga,
v45 takornartat maniguuffigissavaannga,
tusaamaliinnaruninnga naalattarpaannga,
v46 imminnut tunniutiinnarput,
isertorfimminnillu aniapput uulillutik.
v47 Naalagaq uumavoq! Unnersiutigineqarli qaarsora,
Guutiga, qaarsoq annassutiga, qutsissisitaavoq!
v48 Guutimuna akiniaasikkaanga,
inuiaat isikkama ataannut pisillugit;
v49 akeqqannit aniguisipparma,
kivillunga akerartortinnit peersipparma
nakuusertunillu aniguisillunga.
v50 Taamaattumik qutsavigissavakkit, Naalagaq, inuiaat akornanni
aqqit erinalimmik unnersiutigissavara.
v51 Naalagaq kunnginngortitaminik ajugaatitsingaarpoq
ilumoorsutsilu takutillugu tanitaminut
Daavimut kinguaassaanullu naassaanngitsumik.