v1 Kingorna Daavip Naalagaq siunersiorpaa aperalugulu: »Judap illoqarfiisa ilaannut majuassanerpunga?« Naalagaq angerpoq. Daavilu apereqqimmat: »Sumut majuassaanga?« Naalagaq akivoq: »Hebronimut.« v2 Taava Daavi tassunga majuarpoq nuliani marluk Akinoami Jizre'elimioq Abigajililu Nabaliugaluap Karmelimiup nuliarisimasaa ilagalugit. v3 Aamma angutitani taakkualu inoqutaat tamaasa Daavip ilagai, taakkulu nunaqarfinni Hebronip eqqaaniittuni najugaqalerput. v4 Kingorna Judap angutitai Hebroniliarput, tassanilu Daavi tanippaat Judakkunnut kunnginngortillugu.
Daavi nalunaarfigineqarami Jabeship Gileadimiittup angutitaasa Sauli ilisimagaat v5 taakku nalunaarfigitippai: »Naalakkap pilluaqqulisi Sauli naalagarsi ajunngitsuliorfigigassiuk ilillugulu. v6 Qanortoq Naalakkap ajunngitsuliorfigilisi ilumoorfigalusilu! Taamaaliornersilu pillugu uangattaaq ajunngisaarfigissavassi. v7 Sapiitsuugitsi qunusuitsuullusilu. Saulimmi toquneratigut naalagarisimasarsi annaagaluarparsi, uangali Judakkut tanippaannga imminnut kunnginngortillunga.«
v8 Abnerip Nerip ernerata Saulip sakkutuuisa naalagaanertarisimasaata Ishbosheti Saulip ernera Mahanajimimukartippaa v9 kunnginngortillugulu Gileadimut, Asherikkunnut, Jizre'elimut, Efraimimut Benjaminimullu, tassa Israelimut tamarmut. v10 Ishbosheti 40-nik ukioqarluni Israelimut kunnginngorpoq ukiullu marluk kunngiulluni. Judakkut kisimik Daavimut ilanngupput. v11 Ukiut arfineq-marluk qaammatillu arfinillit Daavi Hebronimi Judakkunnut kunngiuvoq.
v12 Abneri Nerip ernera Ishboshetillu Saulip ernerata sakkutuuisa ilaat Mahanajimimit Gibeonimut aallarput. v13 Aammattaarlu Joabi Serujap ernera Daavillu sakkutuuisa ilaat aallarput. Gibeonimi tasinnguup killingani naapeqatigiipput, unippullu tasiliaq akunneralugu. v14 Abnerip Joabi oqarfigaa: »Inuusuttut sakkuaallutik unammisitsigit, isiginnaassavavut.« Joabi akivoq: »Qaami taamaaliorniarlit.« v15 Taava amerlaqatigiillutik sassarput, Benjaminikkut Ishboshetip Saulip ernerata sakkutuuisa ilaat aqqaneq-marluk Daavillu sakkutuuisa ilaat aqqaneq-marluk. v16 Akileriit tamarmik immikkut niaqqumikkut tigoriarlutik saneqqamikkut panarput ataatsikkullu tamarmik toqullutik. Taamaattumik sakkuaaffiat taanna Gibeonip eqqaaniittoq Panamik Sakkuaattut Narsaannik taasalerpaat.
v17 Ulloq taanna sakkortuumik akersuutilerput, Abnerilu Israelikkullu Daavip sakkutuuinit qimaatitaapput. v18 Akiuunnermi tamatumani Serujap erneri pingasut, Joabi Abishajilu Asaelilu peqataapput, Asaelilu narsarsuup ivigallip gazelliatut oqilatigaaq. v19 Taassuma Abneri malersorpaa sumut arlaannut sanguuminani siulerisungaannavillugu. v20 Abneri qiviarluni aperivoq: »Illit Asaeliuit?« Angermat Abnerip suaarpaa: v21 »Talerpimmut saamimmulluunniit sangoriarlutit inuusuttut ukua ilaat sakkutuussutaanik arsaaruk!« Asaelilli Abneri malersorunnaarumanngilaa. v22 Taava Abnerip Asaeli suaaqqippaa: »Malersorunnaarniannga! Sooq nunamut uppitittariaqassavagit? Taamaaliussagumalu taava qanoq ilillunga angajut Joabi kiinaagut toqqarlugu isigisinnaassavara?« v23 Asaelili unikkumanngimmat Abnerip qalugiusami ipuata isuanik akuaagut kapivaa tunuagut anillatsillugu, Asaelilu uppilluni erniinnaq toquvoq, toquffianullu pisut tamarmik tassunga unipput. v24 Joabilli Abishajillu Abneri malersulerpaat, seqinerlu tarrittoq Ammap Qattornga Giap kangiani Gibeonip inoqajuitsuanut aqqutaaniittoq anguaat. v25 Tassani Benjaminikkut Abneri katersuuffigaat ataatsimoorlutillu Ammap Qattorngata qaarpiaani inissititerlutik. v26 Taava Abnerip Joabi suaarpaa: »Pana nungusaajuassanerpa? Paasisinnaanngiliuk tamanna alianartumik kinguneqassasoq? Qaquguuna sakkutuutit oqarfiginiaritit nunaqqatitik malersorunnaaqqullugit?« v27 Joabi akivoq: »Ilumut uumammat Guuti: Taama oqanngikkaluaruit sakkutuuma aqagu aatsaat qatanngutitik malersorunnaassagaluarpaat!« v28 Joabi sulluartaassuarmik qarlortartitsimmat sakkutuui tamarmik unipput; Israeli malersorunnaarpaat sorsukkunnaarlutik.
v29 Abnerip sakkutuullu ilagisaasa unnuaq taanna tamaat Arabap Naqinnera ingerlavigaat, Jordanilu ikaarlugu Bitroni tamaat ingerlavigalugu Mahanajimi tikippaat. v30 Joabip Abneri malersorunnaarlugu sakkutuuni tamaasa katersorpai. Asaeli Daavillu sakkutuuisa ilaat allat 19-it toqutaasimapput. v31 – Daavip sakkutuuisa Abnerip sakkutuuisa Benjaminikkuusut ilaat 360-it toqussimavaat. – v32 Asaeli ataatagigaluata ilerfanut Betlehemimiittumut ilivaat. Joabi sakkutuullu ilagisai unnuaq tamaat ingerlaannarlutik qaammarmat Hebronimut apuupput.
(3,1) Eqqarleriit Saulikkut eqqarleriillu Daavikkut sivisuumik sorsuupput. Daavi pissaaneqarnerujartuinnarpoq Saulikkulli pissaanikinnerujartuinnarlutik.