v1 Saulip ernerata tusaramiuk Abneri Hebronimi toqutaasoq sapiissuseeruppoq, Israelilu tamarmi annilaangaarpoq. v2 Saulip ernera sakkutuuminut ujajaajartortartunut marlunnik naalagaatitaqarpoq, aappaa Ba'anamik atilik aappaalu Rekabimik atilik. Rimmonip Be'erotimiup Benjaminikkuusup ernerai Benjaminikkunnut atasuusut, Be'erotimi aamma Benjaminimut atasutut naatsorsuunneqartarpoq, v3 Be'erotimiummi Gittajimimut ulloq manna tikillugu takornartaaffigisaminnut qimaasimammata.
v4 Jonatani Saulip ernera erneqarpoq isikkamigut nukillaarsimasumik. Taamani Saulip Jonatanillu toqunerat Jizre'elimit tusarliunneqarmat taanna tallimanik ukioqartoq arnarsiaata qimarnguppaa. Tuaviinnaq qimaatillutik sapangillugu nakkaasimavaa, taamaalillunilu isigai nukillaarsimapput. Nukappiaraq Mefiboshetimik ateqarpoq.
v5 Rimmonip Be'erotimiup erneri Rekabi Ba'analu aallarput ullullu kiatseruttornerani Ishboshetip illuanut pipput taanna ullup qeqqaanerani qasuersaarluni sinitsillugu. v6 Arnaq mappiussisartoq qajuusiassanik qalipakuiaatilluni sinilersoorsimavoq. Taamaalillutik Rekabip qatanngutaatalu Ba'anap akornuserneqarnatik sanioqqullugu v7 illumut iserput; tassani Ishbosheti sinittarfimmi siniffimmini nalavoq. Toquppaat niaquerlugulu. Ishboshetip niaqua nassarlugu unnuaq tamaat Arabap Naqinneratigoorlutik Hebronimut ingerlapput v8 Daavimut aallugu oqarfigalugulu: »Aajuna Ishboshetip akeqqavit Saulip ilinnik toqutsiniaraluartup ernerata niaqua. Taama Naalakkap ullumi Saulimut kinguaavinullu akiniuppaatit, naalagaq kunngi.« v9 Daavilli Rekabi qatanngutaalu Ba'ana Rimmonip Be'erotimiup erneri akivai: »Ilumut uumammat Naalagaq annikilliornartunit tamanit aniguisitsisiga: v10 Tipaatsunnartumik oqariartuuteqarsoraluni Saulip toquneranik uannut nalunaariartortoq Siklagimi toqutippara, taamaalillungalu akissarsiassaa pitippara! v11 Taava pinerluttut angummik pisuussuteqanngitsumik illumini siniffimminiitillugu toqutsisut qanoq pissavakka? Aava kuineqartoq pillugu akiniassannginnerpassi nunamit nungutillusi?« v12 Daavillu peqqusiffigimmatik angutit inuusuttut taakku toquppaat. Assaat isigaallu kipillugit tasiliap Hebronimiittup killingani nivinngarpaat, Ishboshetillu niaqua Abnerip ilerfanut Hebronimiittumut ilivaat.