v1 Immissinnut guutipiluliuutissanngilasi, guutilianik ujaqqanilluunniit nappartitsissanngilasi ujaqqanillu ilusilersukkanik pallorfigisassassinnik nunassinniititaqassanngilasi, uanga tassaagama Naalagaq Guutersi. v2 Sabbatit pigisakka nalliussissavasi illernartuutigalu inniminartuutillugu. Uanga tassaavunga Naalagaq.
v3 Inatsisikka maleruarussigit peqqussutikkalu maleqqissaarlugit, v4 taava piffissat eqqorlugit nunassinni siallersitsisassaanga nuna naatitaqartillugu orpiillu narsaatiniittut inerititaqartillugit. v5 Karrertaajaaneq ilissinni ingerlanneqartarumaarpoq viinnissanik katersuilerneq tikillugu, viinnissanillu katersuineq karrinik siaruarterilerneq tikillugu. Nammineq naatitassinnit timiusalianik qaarsillarlusi nerisassaasi nunassinnilu isumannaatsumik najugaqarlusi. v6 Nunami eqqissineqartitsissaanga. Eqqissillusi qasuersaartassaasi annilaartitsisussaqarnasi. Nersutit kiisortut nunassinnit piiassavakka, nunarsilu panap aserorteriffigissanngilaa. v7 Akeqqasi malersortassavasi siunissinnilu panamit orlorassapput. v8 Ilissinneersut tallimaallutik akeqqat 100-t, ilissinneersullu 100-ullutik akeqqat 10.000-it qimaatittassavaat. Panassinnit orlorartinneqassapput. v9 Ilissi ajunngitsuliorfigissavassi kinguaassiortillusilu amerlasoorsuanngortillusi; ilissinnut angerusera pilersissavara. v10 Karriutisi siornalitsat nerisarisassavasi karriutitaasi inissaqartikkumallugit siornalitsat eqqarneqaannarnissaasa tungaannut. v11 Ineqarfiga akornassinni nappartissavara, narrugissanngilassilu. v12 Akornassinni najuutissaanga. Ilissi Guutigissavassinga, uangalu innuttarissavassi. v13 Uanga tassaavunga Naalagaq Guutersi ilissinnik Egyptenimit anisitsisoq tassani inussiaataajunnaaqqullusi. Nammaatasi aserorterpakka massisimaarlusi ingerlasinnaaqqullusi.
v14 Kisianni tusarumanngikkussinga peqqussutikkalu tamakku maleruarnagit, v15 inatsisikka asiginnarussigit malittarisassiakkalu narrugalugit, peqqussutikkalu maleruanngikkussigit angeruseralu unioqqutillugu, v16 taava akillusi ima iliorfigissavassi: Pillassavassi tataannartunik, nappaammik sororiartuutaasumik qanimanartoqarnermillu, isisi tappiillisillugit nukeerutitillusilu. Asuliinnaq siaruarterisassaasi naatitasi akeqqat nerissammatigit. v17 Pillassavassi akeqqassinnit qunusiaalersillusi. Akeqqassi naalatsigilissavaasi, qimaasassaasilu uffa malersorneqanngikkaluarlusi. v18 Tusarumanngittuaannarussinga suli arfineq-marloriaammik sakkortussusilimmik pillassavassi ajortuliasi pillugit. v19 Pissaanersi ajugaasimaarutigisarsi suujunnaarsissavara. Qilak qulissinniittoq saviminertut ilersissavara nunalu tummaarisarsi kanngussattut manngertigilersillugu. v20 Asuliinnaq sulerulussaasi nunarsi naatitaqassanngimmat nunamilu orpiit inerititaqassanatik. v21 Akerlilersortuaannarussinga tusarumanangalu suli arfineq-marloriaammik sakkortussusilimmik pillassavassi ajortuliasi pillugit. v22 Nersutit nujuartat ilissinnut aallartissavakka. Taakkua qitornassinnik piiaaffigissavaasi nersutaatisilu toqorarlugit, ikilisingaassammasilu nunassinni aqqusinerni inunnik takussaasuerutissaaq. v23 Pillaatikka soqutiginagit akerlilersortuaannarussinga v24 taava akillusi arfineq-marloriaammik sakkortussusilimmik pillassavassi ajortuliasi pillugit. v25 Angerusera unioqqutikkussiuk akiniaallunga panamik aallartitsivigissavassi. Illoqarfinnut qimaagaluarussi tassani nappaat toqoraataasoq ilissinnut nalliutitissavara, akeqqassinnullu tunniunneqassaasi. v26 Nerisassaatisi isumalluutigisaraluasi ilissinnut isumalluutaajunnaarsikkukkit arnat quliullutik iffiorfimmi ataasiinnarmi timiusaliortassapput timiusartugassassinnillu utertitsivigisassavaasi uuttorlugu, qaarsillaatigisinnaassanngilarsilu. v27 Tusarumanngittuaannarussinga akerlilersortuarlungalu v28 taava kamaallusi akerlilersussavassi, pillassavassilu arfineq-marloriaammik sakkortussusilimmik ajortuliasi pillugit. v29 Allatut ajornartumik ernissi panissilu neqaannik nerisariaqalissaasi. v30 Qattorngit pilliisarfisi aserortissavakka tipigissaatilliisarfisilu suujunnaarsillugit timisilu toqungasut guutipalaanut uumassuseqanngitsunut naloriussuullugit qaleriiaanngorlugit; narrugissavassilu. v31 Illoqarfisi inoqajuitsunngortissavakka illernartuutisilu piuneerullugit, pilliutissilu tikkat naamajuminartoq najuutissanngilara. v32 Nunarsi piuneerutissavara akeqqat tassani najugaqartut annilaartillugit. v33 Ilissi inuiannut allanut siammakaatitissavassi, panaralu silugussimallugu malersorlusi. Nunarsi inoqajuitsunngussaaq illoqarfissinnilu illut nakkaanikuinnanngussallutik. v34 Taava nunarsi piuneerussaasimatilluni ilissilu akeqqat nunaanni aallarussaasimatillusi ukiunik qasuersaarfissaatitanik pinngitsuukkaminik taarsiivigineqassaaq, ilumummi nuna qasuersaassaaq sabbatiminik taarsiiffigineqarluni. v35 Inuerussimanini tamaat qasuersaassaaq ilissi nunagigallarassinni sabbatissinni qasuersaarsinnaasimannginnami. v36 Amiakkuusortasi akeqqat nunaanniittut ima annilaangatigilersikkumaarpakka piluttat teqqarpalunnerat tusaannaraanngamikku qimaasalersillugit. Panamit malersorneqartutut qimaasassapput orlorarlutillu uffa malersorneqanngikkaluarlutik. v37 Malersorneqanngikkaluarlutik naakkiuttassapput orlorarlutillu qaleriiaatiinnarlutik, panamit qimaatitaasutut illutik, akeqqasilu akiorneq sapissavasi, v38 inuiaalli allamiut akornanni nungutitaassaasi; akeqqassi nunaata iiorassavaasi. v39 Amiakkuusortasi akeqqat nunaanni sororiartussapput ajortuliorsimanertik pillugu. Allaammi siuaasamik ajortuliaat pillugit sororiartortitaallutik toqussapput. v40 Taamaalippat nassuerutigissavaat namminneq siuaasamillu unneqqaserlussutsiminni uannut ajortuliatik uannullu akerlilersorsimanertik, v41 taamaattumillu uangattaaq akillugit akeqqat nunaannut aallarussaatissimavakka tassani uummataat kipineqanngitsut maniguuttunngussammata ajortuliamillu kinguneri atortariaqassallugit. v42 Taava Jaakumut angerusera eqqaajumaarpara; Iisaamullu angerusera Aaperaamullu angerusera eqqaajumaarpara nunaallu eqqaalluguttaaq. v43 Kisianni nunaminnit qimagusimaqqaartariaqarput nunartik inuerussimatilluni ukiut qasuersaarfissaatitat pinngitsuukkami taartissaannik qasuersaarfissaqaqqullugu. Ajortuliamillu kinguneri atortariaqarpaat malittarisassiakka sumiginnarsimagamikkit inatsisikkalu narrugalugit. v44 Kisianni akeqqamik nunaanniikkaluartillugit asiginnarnianngilakka, narrugiumanagit nungutikkumanagillu taakkununngalu angerusera unioqqutinnagu. Uanga tassaavunga Naalagaq Guutiat! v45 Taakku pillugit eqqaajumavara siuaasaannik inuiaat allamiut isigitillugit Egyptenimit anisitannik angerfigeqatiginninnera taakkununnga Guutiujumallunga. Uanga tassaavunga Naalagaq.
v46 Tassa inatsisit, malittarisassiat ileqqoreqqusallu Naalakkap Mosesi aqqutigalugu Qaqqami Sinajimi aalajangersagai imminik Israelikkullu akunnerminni.