v1 Taava katersorsimasut tamarmik nipitoorsuarmik suaartalerput, inuillu unnuaq naallugu qissapput. v2 Israelikkut tamarmik Mosesi Aronilu naammagittaalliorfigalugit oqalorujuuppaat suaartarlutik: »Egyptenimi toquinnarsimassagaluaratta! Inoqajuitsumiluunniit maani toquinnarsinnaagaluaruttatoq! v3 Soormi Naalakkap nunamut tassunga ingerlanniarpaatigut uffa panamik toqutaasussaasugut arnartavullu meerartavullu akeqqanit tigusarineqartussaallutik? Pitsaanerunnginnerpa Egyptenimut utiinnarutta?« v4 Ilatillu ima oqarfigaat: »Siulersuisussatsinnik allanik qinerseriarluta Egyptenimut utiinnarta!« v5 Taava Mosesi Aronilu ilagiit Israelikkut tamarmik sioraanni pallorput. v6 Josvallu Nunip ernerata Kalebillu Jefunnep ernerata misissuiartoqataasimasut atisatik alippaat v7 ilagiillu Israelikkut tamaasa oqarfigalugit: »Nuna angallavigalugu misissugarput ajunngitsorujussuuvoq. v8 Naalakkap nunamut tassunga isertikkumaarpaatigut asagunisigut, nunataariniartigumi nuna taanna immummik tungusunnitsuummillu kuuttoq. v9 Naalagaq akerlilersorniaqinasiuk! Inuillu tassani najugaqartut ersigeqinasigit; nerissavavut! Tarraasa qimassavaat, uagulli Naalakkap najorpaatigut. Taamaattumik inuiaat taakku ersigeqinasigit!« v10 Katersorsimasut tamarmik Josva Kalebilu sioorasaarpaat ujaqqanik milloorlugit toqukkumallugit. Taavali Naalakkap naalannassusia Israelikkunnut tamanut takutippoq Tupermi Naapeqatigiittarfimmi. v11 Naalagarlu Mosesimut oqarpoq: »Inuiaat ukua qanoq sivisutigisumik asiginnassagaminnga? Qanoq sivisutigisumik upperiumassannginnaminnga uffa taama amerlatigisunik nalunaaqutiliorfigisimagitsik? v12 Maanna nappaammik toqoraataasumik nalliutitsiviginiarpakka nungutillugillu. Illilli kinguaassatit inuianngortikkumaarpakka taakkunannga amerlanerusunngortillugit nakuunerusunngortillugillu.« v13 Mosesi Naalakkamut oqarpoq: »Egyptenimiummi tamanna tusarunikku qanoq oqassappat? Illimmi pissaaninnik innuttatit Egyptenimit anisippatit; v14 Qanormi pisoqassava tamanna nunap matuma inuinut oqaluttuarippassuk? Tusareerpaammi, Naalagaq, inuianni taakkunani ineqartutit, taakkunannga kiinarsineqartittutit, nuiaq inigisat taakkua qulaanniittartoq siulersortaritillu ullukkut nuissami sukatut ittumiillutit unnuakkullu innermi sukatut ittumiillutit. v15 Innuttatit uku tamarluinnaasa toqutikkukkit, taava inuiaat ilinnik tusaamannilersimasut oqassapput: v16 ›Naalakkap innuttani inoqajuitsumi toqorarsimagamigit pissutigisimassavaa nunamut uppernarsaalluni neriorsuutigisaminut isertinneq saperamigit.‹ v17 Naalagaq, pissaanersuit takutiguk ima oqarsimagavit: v18 ›Uanga Naalagaq kamajaatsuuvunga ilumoornermillu peqangaarlunga. Ajortulianik unioqqutitsinernillu isumakkeerfiginnittarpunga; kisianni pisuusumik pillaanngitsoorneq ajorpunga. Siuaasat ajortuliaat pillarlugit pillaatigisannik qitornaat, ernutaat ernutaqqiutaallu eqqorneqartittarpakka.‹ v19 Ilumuungaarnikkut maanna innuttatit ajortuliaannik isumakkeerfigikkit, soorlu Egyptenimiit maanga aqqutaa tamaat asattuussimagitit!« v20 Taava Naalagaq akivoq: »Illit oqaatsitit pillugit isumakkeerfigaakka. v21 Kisianni ilumut uanga Naalagaq uumagama naalannassutsimalu nunarsuaq tamakkermagu: v22 Inuit uanga naalannassutsinnik tupinnartuliannillu Egyptenimi inoqajuitsumilu takunnissimasut qulissaannillu uannik misiliiniarsimasut uannullu naalanngitsuliorsimasut, v23 ilumut taakkua ilaata ataatsilluunniit nuna siuaasaannut neriorsuutigisara takussanngilaa. Uannik asiginnaasup ataatsilluunniit takussanngilaa! v24 Kalebili kiffara allaasumik anersaaqarpoq, ilumoorlunilu malissimavaanga. Taamaattumik nunamut angallavigisimasaanut isertikkumaarpara; kinguaavisalu pigisassamittut piumaarpaat.« v25 – Nunap Narsalittaani Amalekikkut Kana'anikkullu najugaqarput. – »Aqagu tammaarsimaffik qimakkussiuk inoqajuitsumullu aallarlusi Immamut Ivissuartuumut aqqutaa atorumaarparsi.«
v26 Naalagaq Mosesimut Aronimullu oqarpoq: v27 »Qanoq sivisutigisumik inuit taakkua ajortut oqalorujullutik naammagittaalliorfigissavaannga? Israelikkut uannut oqalorujunnerat tusaavara. v28 Ima oqarfigissavatit: Naalagaq ima oqarpoq: Ilumut uumagama, kissaatigisarsi naapertorlugu iliorfigissavassi. v29 Angutit 20-nik ukioqalereersimallusi naatsorsorneqartusi, uannut naammagittaalliorsimasusi tamassi, timisi toqungasut inoqajuitsumiiginnarumaarput. v30 Ilarsi ataasiinnarluunniit nunamut najugassassitut neriorsuutigisimasannut isissanngilaq, Kalebi Jefunnep ernera Josvalu Nunip ernera kisimik tassunga isissapput. v31 Meerartasilu akeqqanit tiguagaassangatitaraluasi nunassaannut isertikkumaarpakka. Taakkua nuna ilissi narrugisarsi ilisimalerumaarpaat. v32 Ilissili timisi toqungasut inoqajuitsumiissapput. v33 Qitornasi ukiuni 40-ni inoqajuitsumi maani nersutaatinik paarsisutut angalaassapput. Taakkua ilissi unneqqaserlunnissi kinguneri atortariaqassavaat tamarluinnassi inoqajuitsumi toqoreerserlusi. v34 Soorlu ulluni 40-ni nuna misissorsimagissi, taamaalillusi ajortuliassi kinguneri atortariaqassavasi ukiuni 40-ni – ulloq ataaseq ukiumik ataatsimik naleqartillugu. Taamaalillusi misigissavarsi uannik akeraqarneq qanoq kinguneqartartoq. v35 Uangami Naalagaq taama oqaluppunga! Ilumut, ilagiit uku ajortut uannut perlulioqatigiissimasut taamaaliorfigiumaarpakka. Inoqajuitsumi maani ajunaassapput; maani toqussapput.«
v36 Angutit Mosesip misissuiartortitaasa uteramik ilagiit tamaasa Mosesimut akerliulersippaat nuna pillugu paasisanik siammaanermikkut. v37 Inuit nuna pillugu paasisanik ajortunik siammaasimasut tassanngaannaq toqupput Naalakkap kiinaata saani. v38 Nunamik misissuiartortunit inuuginnartutuaapput Josva Nunip ernera Kalebilu Jefunnep ernera.
v39 Israelikkut Naalakkap aalajangigaanik Mosesimit nalunaarfigineqaramik tamarmik aliasungaalerput. v40 Aqaguani ullaakkut nunamut qaqqartuumut majuarumagaluarput oqarlutillu: »Ajortuliorsimavugut! maannali nunamut Naalakkap oqaatigisaanukarniarpugut.« v41 Mosesili oqarpoq: »Sooq Naalakkap peqqussutaanik unioqqutitsiniarpisi? Iluatsitsinavianngilasi. v42 Nunamut tassunnaqinasi Naalakkap najunngimmasi. Akeqqanit ajugaaffigineqaannaqinaasi! v43 Tassanimi Amalekikkut Kana'anikkullu saassutissavaasi, taakkualu panaannit toqunneqassaasi. Naalagarmi tunussimavarsi. Taamaattumik ilagiumanngilaasi.« v44 Taamaakkaluartoq qalliuniaannarlutik nunamut qaqqartuumut majuarput. Kisianni Naalakkap angerusiata illerfiata Mosesilluunniit tammaarfik qimanngilaat. v45 Taava Amalekikkut Kana'anikkullu nunami qaqqartuumi najugaqartut aterput Israelikkullu ajugaaffigalugit Horma tikivillugu malersorlugit.