v1 Kana'anikkut kunngiata Aradimi Nunap Kujasissortaaniittumi najugaqartup Israelikkut Atarimip tungaanut ingerlaartut tusaramigit saassuppai ilaallu tigusaralugit. v2 Taava Israelikkut Naalagaq neriorsuiffigaat oqarlutik: »Inuiaat uku uagut assatsinnut tunniukkukkit illoqarfii ilinnut pigitillugit piuneerussassanngortissavavut.« v3 Naalakkap Israelikkut qinnutaat tusarpaa Kana'anikkullu taakkununnga tunniullugit. Israelikkut Kana'anikkut illoqarfii Naalakkamut pigitillugit piuneerussassanngortippaat, najugarlu taanna Hormamik ateqalerpoq.
v4 Taava Israelikkut qaqqamit Horimit aallarput Immallu Ivissuartuup tungaanut ingerlalerlutik Edomi ungaqqunniaramikku; aqqutaanili naammagittaalliulerput v5 Guuti Mosesilu oqalorujuffigilerlugit: »Sooq Egyptenimit aallartippisigut maani inoqajuitsumi toqusussanngortilluta? Maani timiusamik nerisassaqanngilaq imeqaraniluunniit, nerisapalaavullu avaarulluinnarpavut.« v6 Taava Naalakkap pulateriaarsuit toqunartullit Israelikkut akornannukartippai. Taakkua Israelikkut kiiorarpaat, amerlaqisullu toqupput. v7 Inuit Mosesi ornillugu oqarfigaat: »Ajortuliorsimavugut Naalagaq illillu oqalorujuussimagassi. Naalagaq qinnuiguuk pulateriaarsuit uatsinnit peerseqqullugit!« Mosesillu inuit qinnummagit v8 Naalakkap oqarfigaa: »Pulateriaarsuusaliorit nappartitamullu ivertillugu! Kiineqartut tamarmik taanna qiviaraangamikku inuuginnartassapput.« v9 Mosesi pulateriaarsuusaliorpoq kanngussaasumik nappartitamullu ivertillugu. Pulateriaarsummillu kiineqartut pulateriaarsuusiaq kanngussaasoq qiviaraangamikku inuuginnartarput.
v10 Israelikkut ingerlaqqipput Obotimilu tammaarlutik.
v11 Obotimit ingerlaqqipput Ijje-ha-Abarimimilu inoqajuitsumi Moabip kangianiittumi tammaarlutik.
v12 Tassanngaanniit ingerlaqqipput Zeredip Qooruani tammaarlutik.
v13 Tassanngaanniit ingerlaqqipput kuup Arnonip illuatungaani inoqajuitsumi Amorikkut nunaata kangianiittumi tammaarlutik. Arnoni Moabip Amorikkullu nunaata killeqarfigaat.
v14 Taamaattumik Naalakkap Sorsunnerinik Mappersakkami allassimasoqarpoq:
»...Vahebi Sufamiittoq qooqqullu,
Arnoni
v15 qooqqullu sivingarni
illoqarfinnguamut Arimut atasut
killeqarlutillu Moabip nunaanut.«
v16 Tassanngaanniit Be'erimut aallarput. Taassuma puilasuani Naalagaq Mosesimut ima oqarsimavoq: »Inuit katersukkit, imissaannik uanga tunissagakkit!«
v17 Taava Israelikkut erinarsorput:
»Puilasoq, puilalerit!
Erinarsuut tutsiulli
v18 pillugu puilasoq naalagartat assassimasaat,
inuiaqatigiit naalagaanerisa qillersimasaat,
naalagaanerit kunngip tigumiaanik ajaappiaanillu tigumiallit.«
Taava inoqajuitsumiit Mattanamukarput,
v19 Mattanamiit Nahalielimut, Nahalielimiit Bamotimut,
v20 Bamotimiillu qooqqumut Moabikkut nunaanniittumut – qaqqap Pisgap inngiata inoqajuitsup tungaanut isikkiveqartup killinganut.
v21 Israelikkut Amorikkut kunngiat Sihoni ima nalunaarfigiartortippaat:
v22 »Nunat aqqusaarlarpunaat! Narsaatit viinnequteqarfiilluunniit ingerlavigissanngilavut puilasulialluunniit erminik imissanata. Illit nunakkut ingerlanerput tamaat Kunngip Aqquserngatigoorniarpugut.«
v23 Kisianni Sihonip Israelikkut nunaminik aqqusaarinissaannik itigartippai. Sakkutuuni tamaasa katersoriarlugit Israelikkut inoqajuitsumiittut sorsukkiartorpai, Jasamullu pigami saassuppai.
v24 Kisianni Israelikkut pannanik sakkoqarlutik ajugaaffigaat Sihonillu nunaa tiguarlugu Arnonimiit Jabbokimut, Ammonikkut nunaat tikivillugu. Ammonikkunnut killeqarfik qajannaatsunik pallittaalisalersugaavoq.
v25 Israelikkut illoqarfiit tamakku tamaasa tigusaraat Amorikkullu illoqarfiini tamani nunassillutik, Heshbonimi illoqarfinnguartaanilu.
v26 Heshboni Amorikkut kunngiata Sihonip illoqarfigaa. Sihonip sorsuffigisimavaa Moabimi kunngiusup siulia nunaalu tamaat tigusarisimallugu Arnoni tikivillugu.
v27 Taamaattumik taalliortut ima taalliorsimapput:
»Heshbonimukaritsi, sanaqqinneqassaaq,
Sihonip illoqarfia qajannaallisarneqassaaq.
v28 Inneq anillaassimavoq Heshbonimit
ikualanerlu Sihonip illoqarfianit.
Innerup piuneerussimavai Ari Moabimiittoq,
Arnonip qattorngisa Ba'alii.
v29 Eqqanaq Moabi!
Kemoship innuttai, suujunnaarsitaavusi.
Taassuma ernini qimaasunngortippai
paninilu tigusaritillugit
Amorikkut kunngiannut Sihonimut.
v30 Uagulli pisissimik toqorarpavut,
Heshboni suujunnaarsitaavoq Diboni tikivillugu.
Nunaat piuneerupparput tikivillugu Nofa
Medebap akianiittoq.«
v31 Taava Israelikkut Amorikkut nunaanni nunassipput.
v32 Mosesi illoqarfimmik Jazerimik misissuiartortussanik aallartitsivoq, Israelikkullu Jazeri tigusaraat illoqarfinnguartai ilanngullugit Amorikkullu taakkunani najugaqartut qimaatillugit. v33 Taava Israelikkut sangullutik Bashanip tungaanut aallarput. Bashanip kunngiata Ogip sorsuffigiartorpai sakkutuuni tamaasa ilagalugit, Edre'imilu akersuutilerput. v34 Naalagaq Mosesimut oqarpoq: »Ogi ersigissanngilat, taanna sakkutuuilu tamaasa nunaalu ilinnut naalagaaffigitilissavakka. Amorikkut kunngiattut Sihonitut Heshbonimi nunaqartutut iliorfigissavat.« v35 Israelikkut kunngi Ogi ernerilu sakkutuuilu tamaasa ajugaaffigaat toqorarlugillu amiakkoqartinnagit, nunaallu tigusaraat.