v1 Tassaapput Mosesip oqaasii Israelikkunnut tamanut inoqajuitsumi Jordanip kangianiittumi Arabap Naqinnerani Sufip akerpiaani – Paranip Tofelillu, Labanip, Haserotip Di-Zahabillu akornanni. v2 Horebimit Kadesh-Barneamut aqqutaa Se'irip qaqqai aqqusaarlugit ulluni aqqanilinni ingerlasariaavoq. v3 Ukiut 40-anni qaammatit aqqarngata ulluisa siullianni Mosesip Israelikkut oqaluffigai Naalakkap peqqusinera malilluinnarlugu. v4 Taama iliorpoq Amorikkut kunngiat Sihoni Heshbonimi naalagaasoq Bashanillu kunngia Ogi Ashtarotimi naalagaasoq Edre'imi ajugaaffigereeramigit. v5 Jordanip kangiani Moabimi Mosesip inatsit una eqqaasitsissutigilerpaa. Oqarpoq:
v6 Naalakkap Guutitta Horebimi oqaluffigaatigut oqarluni: »Qaqqami tassani uninnganersi naammalerpoq. v7 Tammaarfissi qimallugu aallarniaritsi Amorikkut nunaannut qaqqalimmut eqqaamiuinullu tamanut – najugaqartunut Arabap Naqinnerani Nunallu Qaqqalittaani, Nunap Qattunilittaani Nunallu Kujasissortaani Sinerissallu Nunataani – Kana'anikkut nunaanni Libanonimilu kuussuaq Eufrati tikivillugu. v8 Nuna tamaat ilissinnut iserfigeriaannanngortippara. Iserfigisiuk pigilerlugulu, soorlu Naalakkap siuaasassinnut Aaperaamut, Iisaamut Jaakumullu taakkualu kinguaassaannut tunniukkumallugu neriorsuutigisimagaa.«
v9 Taamani ima oqarfigaassi: »Kisimiillunga nammassinnaanngilassi. v10 Naalakkammi Guutissi amerlasoorsuanngortissimammasi maanna qilaap ulloriaasut amerlatigilersimavusi; v11 qanortoq Naalakkap siuaasassi Guutiata maannakkornit tuusintileriaammik amerlanerulersikkilisi pilluaqqullusilu, soorlu taama neriorsorsimagaasi. v12 Qanorli ilillunga pisarissersuutisi, saqitsaannisi isumaqatigiinnginnisilu kisimiillunga nammassinnaassavakka? v13 Angutinik silatuunik, siuneqartunik paasisimasartuunillu naggueqatigiinnit tamanit pisunik maanngartitsigitsi; taakku ilissinnut naalaganngortissavakka.« v14 Ima akivassinga: »Iliuusissatut siunnersuutigisat pitsaalluinnarpoq.« v15 Taava naggueqatigiit naalagaat angutit silatuut paasisimasartuullu ilissinnut qullersanngortippakka immikkoortunut 1.000-inut, 100-nut, 50-inut qulinullu siulersuisunngortillugit naggueqatigiinnullu allattunngortillugit. v16 Taamani eqqartuussisusi ima peqqusiffigaakka: »Nunaqqatigiit akornanni nunaqqatissiluunniit takornartallu nunasisut akornanni eqqartuussisutigut suliassaqaraangat akerleriit tamaasa killisiortassavasi naapertuilluartumillu eqqartuussisassallusi. v17 Eqqartuussisaraangassi nakerisarsiortassanngilasi. Pisuut piitsullu assigiimmik killisiortassavasi. Inummilluunniit ersigisaqassanngilasi eqqartuussineq Guutip pigimmagu. Kisianni eqqartuussisutigut suliassaq ilissinnut ajornarpallaarpat uannut saqqummiussiuk taava uanga killisiuissagama.« v18 Taamani qanoq iliornissassinnik tamanik peqqussuteqarfigaassi.
v19 Taava Horebimit aallarpugut inoqajuitsorsuarlu tujorminartoq takoreersimasarsi tamaat ingerlavigalugu. Amorikkut nunaannut qaqqalimmut aqqutaa atorparput, soorlu Naalakkap Guutitta taama peqqusimagaatigut; Kadesh-Barneamullu pivugut. v20 Tassani ima oqarfigaassi: »Maanna Amorikkut nunaannut qaqqalimmut Naalakkap Guutitta uatsinnut tunniukkumasaanut pivugut. v21 Naalakkap Guutivit nuna ilinnut iserfigeriaannaatippaa. Majuarfiguuk pigisarilerlugulu, soorlu Naalakkap siuaasavit Guutiata taama peqqusiffigigaasi. Erseqinak, sapiissuseeruteqinallu!«
v22 Tamassi uannukarpusi oqarfigalungalu: »Aallartitseqqaarallarta angutinik nuna misissoriartortillugu. Uterunik oqaluttuukkumaarpaatigut sukkoorluta majuarnissatsinnik illoqarfinnillu iserfigiumaakkatsinnik.« v23 Siunnersuut taanna iluarilluarakku akunnissinnit qinerpakka angutit aqqaneq-marluk, naggueqatigiinnit ataatsinit angut ataaseq. v24 Taakku nunamut qaqqalimmukarput Eshkolillu Qooruanut pillutik, misissuiffigaallu. v25 Paarnanik tamaani naasartunik tiguseriarlutik uatsinnukaappaat, imalu nalunaarfigaatigut: »Nuna Naalakkap Guutitta uatsinnut tunniukkumasaa pitsaaqaaq.«
v26 Taamaattoq majuarfigiumanngilarsi Naalakkap Guutissi peqqussutaa naalannagu. v27 Tupissinni isersimavusi naammagittaalliorlusilu ima oqarlusi: »Naalakkap uumigigamisigut Egyptenimit anisippaatigut. Amorikkut assaannut tunniukkumavaatigut nungutinneqaqqulluta. v28 Sumunnarniartugununa? Qatanngutitta sapiissuseerutitippaatigut oqaluttuukkamisigut tassani inoqartoq uatsinnit pissaanerusunik amerlanerusunillu, aammagooq illoqarfissuaqartoq portoqisunik qarmakkanik pallittaalisalinnik. Tamaani aamma takusimavaat inuiaat Anakikkut.« v29 Oqarfigaassili: »Taakku annilaarutigeqinasigit ersigeqinasigillu! v30 Naalakkap Guutissi siulersorpaasi, sorsukkumaarporlu illersorlusi, soorlu takkussinni taamatorluinnaq iliortoq Egyptenimi. v31 Inoqajuitsumi takuat Naalakkap Guutivit angutitut ernerminik kissumiartutut ingerlakkaatit aqqutaa tamaat maanga apuutserlusi.« v32 Taamaakkaluartoq upperfigiumanngilarsi Naalagaq Guutersi, v33 tammaarfissassinnimmi nassaarsiuullusi siunissinni ingerlavoq unnuakkut innermiilluni ulluuneranilu nuiamiilluni aqqutissassinnik ajoqersuunniarlusi.
v34 Naalakkap tusaagamiuk qanoq oqaluttusi kamalerpoq uppernarsaallunilu: v35 »Angutit ukua, tassa kinguaariissoqatigiit ajortut, ilaata ataatsilluunniit nuna taanna ajunngitsoq uppernarsaallunga siuaasassinnut tunniukkumallugu neriorsuutigisimasara takussanngilaa; v36 Kalebip Jefunnep ernerata kisimi takujumaarpaa. Taassumunnga ernerinullu nuna tummareersimasaa tunniukkumaarpara Naalakkamut aalajaalluinnartuusimammat.« v37 Ilissi pisuullusi Naalakkap uangattaaq kamaappaanga oqarluni: »Illilluunniit tassunga isissanngilatit! v38 Kisianni Josva Nunip ernera, kiffat, tassunga isissaaq. Taanna sapiissuseqalersiguk nakussatsillugulu nuna Israelikkunnut pigisassanngortissammagu. v39 Meeraarartasi tigusarineqassangatitaraluasi ernisilu suli ajortumik ajunngitsumillu immikkoortitsisinnaanngitsut iserumaarput. Nuna taakkununnga tunniutissavara, taakkua pigisarilissavaat. v40 Ilissi allamut saagitsi inoqajuitsumullu aallarlusi Immap Ivissuartuup tungaanut!« v41 Akivassingali: »Naalakkamut ajortuliorsimavugut! Maanna sorsukkiartorluta majuarniarpugut, soorlu Naalakkap Guutitta taama peqqusimagaatigut.« Tamavissi sakkulersorpusi, nunamullu qaqqalimmut majuarnissaq ajornassangatinngeqaarsi. v42 Naalakkalli ima oqarfigaanga: »Oqarfigikkit: Nunamut qaqqalimmut majuassanngilasi sorsukkiartorlusi; illersornianngilassimi, taamaattumillu akeqqassinnit ajorsartinneqassaasi.« v43 Taamali oqarama tusaajumanngilasi. Naalagaq naalakkumanagu anneruniarfigalugu nunamut qaqqalimmut majuarpusi. v44 Taava Amorikkut nunami qaqqalimmi najugaqartut saassuppaasi. Igutsappassuartut ataatsimoortutut illutik malersorpaasi, Se'irimi avissaartuutitillusi Hormalu tikivillugu qimaatillusi. v45 Taava uterpusi Naalakkallu kiinaata saani qiallusi, Naalakkalli tusaajumanngilaasi naalaarumanasiluunniit. v46 Sivisuumik Kadeshimiittariaqarpusi, tassani najuqaqarallartillusi.