v1 Qilak, tusarnaarit oqalunniarama!
Illit nuna, tusaakkit uanga oqaaserisassakka!
v2 Ajoqersuussutikka nakkaalit sialuttut;
oqaatsikka siammaallit kanertut,
sialuttut narsani qorsuusuni,
sialuit kuseriarnerisut ivikkani.
v3 Nalunaajaatiginiarpara Naalakkap aqqa,
ilissilu Guuterput naalannartissavarsi!
v4 Qaarsuuvoq Naalagaq, naammalluinnartuupput suliai,
innarluitsuupput aqqutigisai tamarmik.
Guutiuvoq aalajaatsoq, salloqittaanngisaannartoq;
naapertuilluartuuvoq peqqusersuitsuullunilu.
v5 Eqqarleriit aserorsimasut tammarsimasullu ilumuunngitsuliorfigimmanni
Guutip ajortuliaat pillugit qitornarinngilai.
v6 Eqqortuusoraasiuk Naalagaq taama akilissallugu,
ilissi inuiaat silaatsuususi sianiitsuususilu?
Tassaannginnerpa ataatat pinngortitsisillu,
ilissinnik pinngortitsisoq ilusiliisorlu?
v7 Eqqaakkit ullut qaangiuttut,
sianigikkit ukiut eqqarleriit inuuffii;
aperiuk ataatat, oqaluttuartiguk,
utoqqaat oqaluttuullitsit.
v8 Qutsinnerussaartup tunigamigit inuiaat nunassaannik,
inuillu avissaartortikkamigit
inuiaat najugarisassaat aalajangerpai
Guutip ernerisa amerlassusiat naapertuutigalugu.
v9 Naalakkalli innuttani agguagarsiarai,
Jaaku kingornussarsiaraa.
v10 Naalakkap Israeli nanivaa inoqajuitsumi,
inuilaami soqanngitsumi nilliaffiusumi;
isumassugaraa nakkutigalugulu
paaralugulu asanerpaasamisut.
v11 Soorlu nattorallip piaqqani tingitittarai ulluminit
qulaannilu timmioraartarluni,
taamatut suluni siaarpai qaqitillugulu
amakkiullugulu ingerlallugu.
v12 Naalakkap kisimi ingerlappaa
allamiut guutiannik ilaqarnani.
v13 Ingerlappaa nunap qatsissortai qulaallugit
narsaatillu inerittuinik nerisaqartillugu.
Qaarsillartippaa tungusunnitsuummik qaqqamit pisumik
uuliamillu qaarsumit ammaajusumit.
v14 Tunivaa ussigit immuannik kinersitamik, savallu immuannik,
savaaqqat angutivissat tunnuannik,
savat savaasallu angutivissat Bashanimit pisut,
qajuusiassallu tartoqutaannik tunnumik;
Imigaraat viinnissat tunguat,
viinni qappiortoq.
v15 Jeshuruni puallarami tunummut tukeriaasalerpoq;
puallarputit nerinnarsillutit ulamertuinnanngorlutillu.
Qimappaa Guuti pinngortitsisini
asissorlugulu qaarsoq annaffini.
v16 Guuti kamassaarpaa allamiut guutiinik
narrutsatsillugulu guutipilunnik maajunnartunik.
v17 Pilliiffigai anersaapiluit Guutiunngitsut,
guutit siornatigut ilisimanngisani,
nutaat saqqummeqqammersimasut,
guutit siuaasassi nalusaat.
v18 Pinngorfigisat qaarsoq sussarinngilat,
puiorpat Guuti inunngortitsisit.
v19 Naalakkap tamanna takugamiuk innuttani ajattorpai
ernimi panimmilu narrunarsarsimammanni.
v20 Oqarpoq: Kiinara taakkununnga isertorniarpara,
takuniarpara qanoq naggateqarnissaat;
eqqarleriiupput salloqittaagajuttut,
qitornat tatigisassaanngitsut.
v21 Kamassaarpaannga Guutiunngitsunik,
narrutsatsippaannga guutiminnik piunngitsunik.
Taamaattumik uangattaaq kamassaarniassavakka inuiaanngitsunik,
kamassaassavakka inuiannik silaatsunik.
v22 Maanna kamannera innertut ippoq,
ikualavoq tikivillugu itinersuaq, toqusut inaat.
Nungutippai nuna inerittuilu
qaqqallu tunngavii ikuallatsillugit.
v23 Malittariiaaginnartikkumaarpakka ajunaarnerit taakkununnga,
taakkununnga piseriukkumaarpakka qarsukka tamaasa.
v24 Nukillaassapput kaannermit,
sanngiilliartortitaassapput kissarulungaarnermit nappaammillu toqoraataasumit navianartumit.
Taava taakkununnga saassussitissavakka nersutit kiisortut kiinnarissunik kigutillit
pulateriaarsuillu toqunartullit nunami paarmortut.
v25 Silami pana meeqqanik toqoraassaaq,
amiilaarnerup illumi
toqorassavai nukappissat niviarsiallu,
naalungissat utoqqarsuillu.
v26 Eqqarsarpunga: Toqorassavakka
inuit akornanni eqqaamaneerutitillugit.
v27 Aarleqqutigaarali akeqqannit narrunarsarneqarnissara,
innuttama akerartortaasa taamaaliornera nassuiassammassuk eqqunngitsumik
oqarlutik: Uagununa nammineq assapput kivikkipput;
Naalagaq qanoq iliorianngilaq!
v28 Inuiaapput pilersaarutaat iluatsinneq ajortut,
siuneqanngitsut.
v29 Sianisuugaluarunik tamanna paasissagaluarpaat
eqqarsaatigisimassagaluarlugulu qanoq naggateqarnissartik.
v30 Qanoq ililluni angutip ataatsip tuusintit malersorsinnaavai
angutillu marluk 10.000-it qimaatissinnaallugit,
Naalakkap tunniutiinnarsimanngippagit,
qaarsorisaata isumakkiiginnarsimanngippagit?
v31 Kisianni qaarsorisaat uagut qaarsorisatsitut inngilaq,
akeqqavut eqqartuussisuussanngillat.
v32 Viinnequtaat pisuuvoq Sodomap viinnequtaanit
Gomorrap sivingarninit.
Toqunartuupput paarnaat viinnissat
qasilitsuullutillu paarnaat tigumasut.
v33 Viinniutaat tassaavoq pulateriaarsuup toqunartua,
paarmortorujuup toqunartua ajorluinnartoq.
v34 Tamakku tamarmik uanni toqqortaapput,
naqissusersimallutik sakkuusivinniipput.
v35 Akiniaanissaq akisinissarlu uanniipput
orloqqajaalernissaat utaqqillugu.
Qanilliartorpormi ulloq ajunaarfissaat,
atugarisassaminnit erniinnaq tikinneqassapput.
v36 Naalakkammi innuttani naapertuilluartumik pineqartikkumaarpai
nallittorumaarlugillu kiffani takuleruniuk pissaaneerussimasut,
tamarluinnarmik suujunnaarsimasut.
v37 Taava oqarumaarpoq: Sumiippat guutigisaat,
qaarsoq tatigisaat,
v38 taanna pilliutaasa tunnuinik nerisartoq
viinnimillu kueragassatut pilliutaannik imertartoq?
Taassuma ikioriartorlisi!
Taanna tassaali sernissortersi!
v39 Paasiniarsiuk uanga kisima Guutiugama
uangaanngitsumillu Guuteqanngimmat.
Uanga tassaavunga toqutitsisartoq inuuneqalersitsisartorlu,
ikiliisartoq katsorsaasarlunilu;
kinaluunniillu uanga assannit aniguisitsisinnaanngilaq.
v40 Talera qilaap tungaanut kivippara uppernarsaallungalu:
Ilumut naassaanngitsumik uumagama
v41 panara innaallattartoq ipissarniarpara
qarsuusivillu tigullugu;
akeqqakka akiniarniarpakka,
uannik uumissuisut akilerumaarlugit.
v42 Qarsukka aalakuulersinniarpakka aammik,
toqutat tigusaasullu aavannik;
nerisissavaralu panara neqaannik,
akeqqat naalagaasa niaquinik.
v43 Illit qilak, Naalagaq qiimmattaqatigiuk,
pallorfigisiuk, ilissi guutit erneri,
kiffami aavat akiniummagu.
Akiniarpai akeqqani
assortortini akilerlugit.
Innuttami nunaat isumakkeerfigaa.
v44 Mosesip erinarsugassiaq taanna tamaat atuarpaa inuiaat tusaatillugit Hosea Nunip ernera ilagalugu.
v45 Mosesip oqaatsit tamakku tamaasa Israelikkunnut oqaatigereeramigit v46 oqarfigai: »Ullumi erseqqissaallunga ilissinnut oqaaserisakka tamaasa aalajangiussigit. Ernissinnullu oqaatsit inatsisiniittut tamaasa maleruaqqissaaqqussavasi. v47 Oqaatsimmi taakku asuliinnaanngillat, tassaappulli ilissinnut inuussutaasussat. Oqaatsit taakku tunngavigalugit nunami Jordanikkut ikaarussi tiguarumaakkassinni inuummersorumaarpusi.«
v48 Ulloq taannarpiaq Naalakkap Mosesi oqaluffigaa: v49 »Majuarit qaqqamut Abarimut, qaqqamut Nebomut Moabikkut nunaanni Jerikop akerpiaaniittumut. Kana'ani nuna Israelikkunnut pigisassanngortikkumaagara qimerluussavat. v50 Qaqqamilu qaqiffigisassanni toqussaatit siuaasannukarlutillu, soorlu aamma angajut Aroni qaqqami Horimi toqusoq siuaasaminukarlunilu. v51 Taama pisoqarpoq unneqqaserluffigigassinga Israelikkut akornanni puilasumi Meribat-Kadeshimiittumi inoqajuitsumi Sinimi Israelikkullu akornanni illernartinnginnassinga. v52 Nuna ungasianit isiginnaarumaarpat, isissanngilatilli nunamut tassunga Israelikkunnut tunniukkumaakkannut.«