v1  Taava Bashanimut aqqutaatigut majualerpugut. Ogillu Bashanip kunngiata sakkutuuni tamaasa ilagalugit Edre'imut sorsuffigiartorpaatigut. v2  Naalakkap ima oqarfigaanga: »Ersigissanngilarsi! Ilissi assassinnut tunniuppara sakkutuui tamaasa nunaalu ilanngullugit. Amorikkut kunngiattut Sihonitut Heshbonimi najugaqartutut iliorfigissavarsi.« v3  Taamaalilluni Naalakkap Guutitta aammattaaq Ogi Bashanip kunngia sakkutuuilu tamaasa uagut assatsinnut tunniuppai. Ajugaaffigaavut toqorarlugillu amiakkoqartitaqarnata aniguisoqartitsinatalu. v4  Taamani illoqarfii tamaasa tiguarpavut; illoqarfiannik ataatsimilluunniit tiguanngitsuugaqanngilagut. Tiguarpavut illoqarfiit 60-it, tassa nunap ilaa Argobi Bashanimiittoq tamaat, Ogip kunngiuffigisaa. v5  Illoqarfii tamarmik pallittaalisaqarput portusuunik qarmalinnik isaaffeqarlutillu sannerutsikkanik matorsualinnik. Aammattaaq illoqarfeeqqat amerlaqisut taakkununnga ilaapput, v6  inuilu Naalakkamut pigitillugit nungutitassanngortippavut soorlu Sihoni Heshbonip kunngia taama pisimagipput. Illoqarfinni tamarluinnarni nungutitassanngortippavut angutit arnallu meeqqallu. v7  Nersutaatilli illoqarfinnilu pissarsiat tamaasa pigisassatsitut aallaruppavut.

v8  Taamani nuna Jordanip kangianiittoq Amorikkut kunngiinit marlunnit tiguarparput, kuummit Arnonimiit qaqqamut Hermonimut. v9  – Hermoni tassaavoq qaqqaq Sidonimiut Sirjonimik Amorikkulli Senirimik taasagaat. – v10  Tiguarpavuttaaq illoqarfiit Qatsinnersarsuarmiittut tamaasa, Gileadi tamaat Bashanilu tamaat illoqarfiit marluk Salka Edre'ilu Ogip Bashanimi kunngiuffianiittut tikillugit. v11  – Bashanimi kunngi Ogi Refaikkunni amiakkutuaavoq. Siniffeqarpoq saviminiusumik; maanna taanna Ammonikkut illoqarfianni Rabbamiippoq. Aleninik qulingiluanik takissuseqarpoq aleninillu sisamanik silissuseqarluni; aleni ussersaataasartoq atorlugu. – v12  Nuna tamanna tigusarigatsigu Aro'erip ilaa Arnonip Qooruaniittoq Gileadillu qaqqalittaata affaa illoqarfiit tamaaniittut ilanngullugit Rubenikkunnut Gadikkunnullu tunniuppakka. v13  Gileadip sinnera Bashanilu Ogip kunngiuffia tamaat, tassa nunap ilaa Argobi tamaat, Manassep naggueqatigiissortaasa affaannut tunniuppara. – Bashanip ilaa taanna tamarmi Refaikkut nunaannik taaneqartarpoq. v14  Jairip Manassep ernerata pissarsiaraa nunap ilaa Argobi tamaat Geshurikkut Ma'akakkullu nunaannut killinga tikivillugu. Imminut atsiulluni Bashanip illoqarfii Jairip tupeqarfiinik atserpai, ullorlu manna tikillugu taama ateqarput. – v15  Gileadi Makirimut pissarsiaritippara. v16  Rubenikkunnut Gadikkunnullu tunniuppara nunap ilaa Gileadimiit Arnonip Qooruanut, qooqqup qeqqa killiliullugu, kuuk Jabboki Ammonikkut nunaata killeqarfia tikivillugu, v17  Arabap Naqinnera Jordanilu killiffigalugit, Kinneretimiit Arabap Imartaanut, Immamut Tarajuusumut, Pisgap kangimut sivingarngata ataanut.

v18  Taamani naggueqatigiinnut taakkununnga ima peqqussuteqarpunga: »Naalakkap Guutissi nunap ilaa tamanna ilissinnut pissarsiaritissimavaa. Sorsuttartut qunusuitsuususi tamassi sakkulisarlusi Jordani ikaassavarsi qatanngutisi Israelikkut siulersorlugit. v19  Arnartasi meerartasilu nersutaatisilu – nalunngilarami amerlaqisunik nersutaateqartusi – illoqarfinni ilissinnut tunniussimasanni uninngaannassapput. v20  Aatsaat Naalakkap qatanngutisi ilissitut uninngavissarsisereerpagit nunalu Naalakkap Jordanip kitaani tunniukkumasaa pissarsiarereerpassuk utersinnaanngussaasi nunamut tamassi immikkut pigisassassitut tunniussannut.«

v21  Taamani Josva ima peqqusiffigaara: »Nammineq isinnik takoreerpat Naalakkap Guutissi kunngit taakku marluk qanoq iliorfigigai. Aammattaaq kunngeqarfiit ingerlavinni tikikkumaakkatit tamaasa Naalakkap taama iliorfigiumaarpai. v22  Taakku ersigissanngilasi! Naalagaq Guutersi illersorlusi nammineq sorsukkumaarpoq.«

v23  Taamani Naalagaq ilungersorlunga ima qinnuigaara: v24  »Naalagaq Guuterput, aallaqqaataanilli angingaarsutsit assallu pissaasoq uannut kiffannut takutittarpatit. Ilami Guuti taanna tupinnangaarpoq, qilammi nunamiluunniit angingaartunik taamaattunik naammassisaqarsinnaasoq, soorlu illit iliortutit. v25  Ikaarlanga takujartorlugit nuna ajunngitsoq Jordanip illuatungaaniittoq, nuna qaqqalik alianaatsoq Libanonilu.« v26  Ilissili pisuullusi Naalakkap kamaatingaarpaanga qinnutigalu tusarnagu. Ima oqarfigaanga: »Tassa naammalerpoq! Tamanna uannut taaqqissanngilat! v27  Qaqqap Pisgap qaavanut majuarlutit isiginnaarit kimmut, avannamut, kujammut kangimullu. Takusinnaasannik qimerluuiniarit, tassami Jordanikkut ikaanngisaannassagavit. v28  Josva siulersuisunngortiguk sapiissuseqalersillugu pissatsillugulu! Taassuma Israelikkut siulersorlugit ikaartissavai, nunalu maanna takusassat taakkununnga pissarsiaritissavaa.« v29  Taava tammaarpugut qooqqumi tassani Bet-Peorip akiani.