v1 Israelikkuususi, tusarnaarsigit inatsisit malittarisassiallu ajoqersuutiginiakkakka! Taakku maleruassavasi inuuginnarsinnaaqqullusi nunalu Naalakkap siuaasassi Guutiata ilissinnut tunniukkumasaa iserfigisinnaaqqullugu pigilersinnaaqqullugulu. v2 Ilissinnut peqqussutigisakka ilassanngilasi ilanngassanagilluunniit, peqqussutilli Naalakkamit Guutissinnit pisut ilissinnut tunniussakka maleruassavasi. v3 Nammineq isissinnik takoreerparsi Naalagaq Ba'al-Peorimi qanoq iliortoq. Naalakkap Guutissi akornassinnit nungutippai Ba'al-Peorip Ba'alianut guutisiortut tamarluinnaasa. v4 Ilissili Naalakkamik Guutissinnik aalajangiussisusi tamassi ulloq manna tikillugu suli inuuvusi. v5 Takuammi, inatsisinik malittarisassianillu ajoqersorpassi, soorlu Naalakkap Guutima taamaalioqqusimagaanga, taakku maleruaqqullugit nunami pigiligassassitut iserfigisassassinni. v6 Peqqussutit taakku maleruaqqissaassavasi! Taava inuiaat allat paasilissavaat ilisimassuseqartuususi paasisimasaqartuususilu. Inatsisit tamakku tamaasa tusarunikkit ima oqarumaarput: »Ila inuiassuit uku silatussusii siuneqassusiilu!« v7 Sumi pissaanilissuarnik inuiaqarnerpa guuteqartunik Naalakkap uagut Guutitta torlorfigigaangatsinni uatsinnut qanillisarneratut innuttaminnut qanitsigilersartunik? v8 Sumi inuiaqarnerpa pissaanilissuarnik inatsisini malittarisassianillu pigisaqartunik inatsisitut ullumi ilissinnut saqqummiussattut naapertuilluartigisunik?
v9 Mianersorniarit, sianigilluarniarullu illit nammineq misigisimasatit puigussannginnakkit. Inuutillutit puigunngisaannarniakkit, qitornatit ernguttatillu oqaluttuuttarniakkit v10 ullormik Horebimi Naalakkavit kiinaata saani qeqarfigisannik, taamani Naalagaq uannut oqarmat: »Inuit uannut katersortikkit oqaluffiginiarakkit uanga oqaaseriumasannik, nunami maani inuutillutik mianereqqullunga qitornatillu tamakkuninnga ajoqersortaqqullugit.« v11 Taamani ilissi aggerpusi qaqqallu ataani inissillusi qaqqaq innerinnaatillugu pavungarsuaq qilaap tungaanut naaralaarneqartumik eqqaanilu taartorsuulluni, nuiaqarluni pujoqarlunilu. v12 Naalagaq innermit ilissinnut oqalummat oqaasii tusaavasi timitarsinaguli; nipaa kisiat tusaavarsi. v13 Nalunaarutigaa angerutsini ilissinnut maleruaqqusani, tassa inassutit qulit, allappaalu allaffissianut ujaraasunut marlunnut. v14 Taamanikkut Naalakkap peqquaanga ilissinnut ajoqersuutigeqqullugit inatsisit malittarisassiallu nunami pigiligassassitut iserfigilikkassinni maleruagassasi. v15 Mianersorluinnaritsi! Ulloq taanna Naalagaq Horebimi innermiit ilissinnut oqalummat timitarsinngilarsi. v16 Aseruutigisassassinnik qanoq ittumilluunniit timitaligaasumik guutiliussanngilasi angutit arnalluunniit assinginik, v17 uumasut nunamiittut suusulluunniit imaluunniit sulullit suusulluunniit qilakkut timmisut assinginik, v18 paarmortut suusulluunniit assinginik imaluunniit aalisakkat suusulluunniit nunap ataani immamiittut assinginik. v19 Isitilluunniit qilammut aarlortikkaangagit qimerloorlugillu seqineq qaammallu ullorissallu, qilaap perpassui tamaasa, ussertinniaqinak taakkua pallorfiginissaannut guutisiorfiginissaannullu. Tamakku tamaasa Naalakkap Guutissi inuiannut qilaap ataaniittunut agguaassimavai; v20 ilissili Naalakkap qinersimavaasi saviminermullu aatsitsivimmit Egyptenimit anisillusi innuttariumallusi, soorlu ulloq manna tikillugu innuttarigaasi.
v21 Kisianni ilissi pisuullusi Naalakkap kamaappaanga uppernarsaallunilu ilisimatillunga Jordanikkut ikaassanngitsunga isissanangalu nunamut ajunngitsumut Naalakkap Guutissi ilissinnut pigisassanngortikkumasaanut. v22 Taamaattumik nunami maani toqusariaqarpunga Jordanikkut ikaarnanga. Ilissili ikaarumaarpusi nunalu taanna ajunngitsoq pigisarilissallugu. v23 Mianersoritsi, Naalakkallu ilissinnut angerutigisaa puioqinasiuk. Guutilialiorniaqinasi qanoq ittunilluunniit timitaligaasunik. Naalakkap Guutissi guutilialiornissaq ilissinnut inerteqqutigaa. v24 Naalagarmi Guutersi tassaavoq inneq nungutitsisoq, Guuti ilungersortoq.
v25 Qitornaqalerumaarpusi erngutaqalerumaarlusilu nunamilu pigiligassassinni utoqqaliumaarlusi. Aseruutissassinnik iliuuseqarlusi guutilialiorussi qanoq ittumilluunniit timitaligaasumik taamaaliornissigullu Naalakkap Guutissi isaani ajortumik iliorlusi kamatsillugu, v26 taava ullumi qilak nunalu ilisimannittoraakka nunami Jordanikkut ikaarussi pigiligassassinni erniinnaq nungutitaajumaarassi! Tassani sivisuumik inuussanngilasi, nungutitaalluinnassagassi. v27 Naalakkap siammartikkumaarpaasi inuiaat akornannut. Ilasi ikittunnguaannaat amiakkuussapput inuianni Naalakkap ilissinnik aallarussaaffigititassaani. v28 Tassani guutisiorfigissavasi guutit inuit assaannit sanaat, qisummit ujaqqamillu sanaat, takunnissinnaanngitsut tusaasinnaanngitsullu, nerisinnaanngitsut naamasaqarsinnaanngitsullu. v29 Tassaniitillusi Naalagaq Guutit ujarumaarparsi; naniumaarpat uummatikkut tarnikkullu iluunngarlutit ujarukku. v30 Atugarliuleruit annikilliuutillu taakku tamarmik siunissami ilinnut nalliuppata, taava saakkumaarputit Naalakkamut Guutinnut oqaasiilu naalallugit. v31 Naalagarmi Guutit Guutiuvoq saammaasoq. Iperassanngilaatit suujunnaarsissanatillu. Puiussanngilaa siuaasannut angerutsini taakkununnga uppernarsaassutigisani.
v32 Aperigit ulluni pereersuni, inunngunngikkallaravit, ullormit Guutip nunami inunnik pinngortitsiffianiit qilaap isuata illuaniit illuanut sumilluunniit taama angitigisoqarsimanersoq, assinganilluunniit tusagaqartoqarsimanersoq. v33 Inuiaqarnerluni ilittut illutik Guutip innermit oqalunneranik tusaasaqarsimasunik taamaattorli inuuginnartunik? v34 Guuteqarsimanerpaluunniit inuiannik pigisassaminik aallerniarsimasumik inuiaat allat akornannit aniguisillugit – misilinneqarnerit nalunaaqutillu, tupinnartuliat sorsunnerillu aammalu assani pissaasoq talinilu qullarsimasoq malunnangaartuliallu annilaarnangaartut sakkugalugit, soorlu Naalagaq Guutersi takkunni ilissinnik Egyptenimi iliortoq. v35 Illit tamakku takusimavatit ilisimassagakku Naalagaq Guutiusoq allamillu taannaanngitsumik Guuteqanngitsoq. v36 Qilammiit nipini ilinnut tusartippaa ilitsersuunniaramisit. Nunamilu innertut illuni takkuppoq, innermiillu oqaasii tusaavatit. v37 Siuaasatit asagamigit taakkualu kinguaavi qinigarigamigit nammineq Egyptenimit anisippaatit pissaanersuani atorlugu. v38 Illit siuninni qimaatikkumaarpai inuiaat ilinnit pissaaneqarnerusut amerlanerusullu, isertikkumaarpaatillu taakkualu nunaat ilinnut pigisassanngortillugu, soorlu taamatut pisoqareersimasoq. v39 Taava ullumi ilisimassavat uummammiuliutissallugulu Naalagaq Guutiummat pavani qilammi nunamilu maani, allamillu Guuteqanngimmat. v40 Taamaattumik maleruassavatit inatsisai peqqussutaalu ullumi ilinnut tunniussakka illit qitornatillu ajunngitsunik atugaqaqqullusi, nunamilu Naalakkap Guutivit qaqugumulluunniit pigiuagassattut tunniussassaani inuummersoqqullutit.
v41 Tamatuma nalaani Mosesip illoqarfiit pingasut Jordanip kangianiittut immikkoortippai. v42 Piaarinani puttarsisamillu patsiseqarnani tulliminik toqutsisimasoq illoqarfiit taakkua arlaannut qimaasinnaassaaq inuuninilu annaassinnaassallugu. v43 Illoqarfiit taakku tassaapput Beseri inoqajuitsumi Qatsinnersarsuarmiittoq Rubenikkut qimarnguffigisinnaasaat, Ramoti Gileadimiittoq Gadikkut qimarnguffigisinnaasaat, Golanilu Bashanimiittoq Manassekkut qimarnguffigisinnaasaat.
v44 Makkuupput inatsisit Mosesip Israelikkunnut saqqummiussai, v45 tassaapput oqaaqqissaarutit, inatsisit malittarisassiallu Mosesip Israelikkunnut nalunaarutigisai taamani Egyptenimit anereeramik. v46 Nalunaarutigineqarnerat pivoq Jordanip kangiatungaani qooqqumi Bet-Peorip akerpiaani, nunami Amorikkut kunngiata Sihonip Heshbonimi naalagaasup Mosesip Israelikkullu Egyptenimit anigamik ajugaaffigisaata pigisaraluani. v47 Tigusaraallu taassuma nunaa ilagitillugu Bashanimut kunngip Ogip nunaanut. Amorikkut kunngiisa taakkua marluk pigisarisimagaluarpaat nuna Jordanip kangianiittoq v48 Aro'erimiit Arnonip Qooruata sinaaniittumiit qaqqamut Si'onimut, tassa Hermonimut, v49 aammattaaq Arabap Naqinnerata Jordanip kangianiittortaa Arabap Imartaa Pisgap sivingarngisa ataanniittoq tikillugu.