v1 Taava takuara inngili alla pissaanilissuaq qilammit aqqartoq, qaamarnganillu nuna qaammarsagaavoq.
v2 Taanna nipitoqisumik torlulaarpoq:
Uppikaavoq, uppikaavoq Babylonersuaq.
Anersaapiluit najugarilerpaat.
Isertorfinngorpoq anersaanut minguttuunut tamanut,
isertorfinngorpoq timmissanut minguttunut tamanut
isertorfinngorlunilu uumasunut minguttunut maajunnartunullu tamanut.
v3 Inuiaqatigiimmi tamarmik imerput
kinguaassiuutitigut inuunerlunnerata uumitsaatigineqarnerata viinnianik,
nunarsuarmi kunngit taanna inuunerluffigisimavaat,
nunarsuarmilu niuertut pisuunnguutigisimavaat
inuulluapilunnersua.
v4 Tusarparalu aamma qilammit nipi alla tutsiuttoq:
Qimallugu anigitsi, innuttakka,
ajortuliornerini peqataaqqunasi
perluutaanillu eqqorneqaqqunasi.
v5 Ajortuliaami qaleriiaarlutik qilammut apissisimapput,
iluaatsuliornerilu Guutip puiorsimanngilai.
v6 Allanut pitittakkani nammineq piligit,
iliorneri marloriaammik akiniarsigit,
ermuserlu kuisiffigisaa marloriaammik immersiuk imigassaanik.
v7 Tunisiuk naalliuutissaanik aliasuutissaanillu
imminut alutornarsaataasa inuulluapilutsinneratalu nalinginik.
Uummammigummi ima oqartarpoq:
›Dronningiullunga issiavissaarsuanni issiavunga uillarnerunangalu,
aliasunnartunillu misigisaqanngisaannassaanga.‹
v8 Taamaattumik perluutissai ullormi ataatsimi nalliutissapput,
toqu aliasunnerlu kaannerlu, ikuallanneqassaarlu,
Guutimi Naalagaq eqqartuussisissaa pissarsuummat.
v9 Nunarsuarmilu kunngit taassuminnga kinguaassiuutitigut inuunerluffiginnittut inuulluapiloqatiginnittullu ikualanerata pujua takugunikku qiallutillu upikkumaarpaat,
v10 ungasillugulu qeqarumaarput anniarnera annilaarutigalugu oqassallutillu:
Eqqanaq, eqqanaq illit illoqarfissuaq,
Babyloni illoqarfissuaq pissaaneqaqisoq!
Eqqartuunneqarnerit nalunaaquttap-akunnerani ataasiinnarmi pivoq!
v11 Nunarsuarmilu niuertut qiallugulu upissavaat pisiariumaneqarunnaassammata nioqqutissaatitik umiarsuit usigisartagaat
v12 kuulti sølvilu ujaqqallu erlinnartut sapanngallu ilupaassiassallu purpurilu siilikilu annoraamerngillu aappallarissakkat qisuillu tipigissut tamalaat nagguaatsullu tuugaavinik sanaat tamalaat atortullu qisummit akisunerpaamit kanngussammillu saviminermillu marmorimillu sanaat,
v13 kanelit korianderillu tipigissaatissallu tarnutissiallu virakilu viinnilu uulialu qajuusallu aseqqorinnerit qajuusiassallu nersutaatillu savallu hestillu qamutillu inussiallu, tassa inuit.
v14 Inerittoq tarnivit kajungerisaa pigiunnaarpat,
kusanangaartoq alutornartorlu tamaasa annaavatit,
nanineqaqqissanngillallu.
v15 Nioqqutissanik tamakkuninnga nioqqutillit, niuertut taassumuuna pisuunngortut tamarmik ungasillugu qeqarumaarput anniarnera ersissutigalugu, qiallutik aliasullutillu
v16 oqassapput:
Eqqanaq, eqqanaq illoqarfissuaq
ilupaassiassanik purpurinillu aappallarissakkanillu atisalik,
kuultimik ujaqqanillu erlinnartunik sapannganillu pinnersaatilik!
v17 Pisuussuterpassuit nalunaaquttap-akunnerinnaani piuneerupput!
Aquttut tamarmik umiarsuarlutillu angalasartut tamarmik umiarsuarmiullu umiartornermillu suliallit ungaseqalutik qeqarput
v18 ikualaneratalu pujua takugamikku torlulallutik: »Illoqarfissuaq! Sumi nalissaqarpa?«
v19 Niaqqutik pujoralatserpaat qiallutillu aliasullutillu torlulallutillu:
Eqqanaq, eqqanaq illoqarfissuaq
immami umiarsuaatillit tamarmik erlinnartuutaanik pisuunngorfiat.
Nalunaaquttap-akunnerani ataasiinnarmi piuneeruppoq!
v20 Tamanna qiimmattaatigisiuk illit qilak
ilissilu illernartut apustilillu pruffiitillu!
Guutimmi eqqartuuppaa ilissilu akitsisillusi.
v21 Taava inngilip pissaasup ujarak aserorteriviup ujarattarsuatut atsigisoq kivillugu imaanut naloriuppaa oqarlunilu:
Taamaalilluni illoqarfissuaq taanna Babyloni taama tassanngaannartigisumik igitaassaaq
periarfeerutitillugu.
v22 Kukkilattariarsorpalunneq erinarsorpalunnerlu
qarlortarpalunnerlu sulluartarpalunnerlu
ilinni tusarsaajunnaassapput,
assassugassanillu sunilluunniit ilinni suliaqartuerutissaaq,
karrinik aserortererpalunneq ilinni tusarsaajunnaassaaq,
v23 qulliup qaamanera ilinni qaamassaassaaq,
uissap nuliassallu nipaat ilinni tutsiutissaassaaq,
tassa niuertortatit nunarsuarmi naalagartaammata,
illit angakkuarnikkut inuiaqatigiit tamarmik tammartinneqarmata.
v24 Illoqarfimmi takussaavoq aak,
pruffiitit illernartullu nunarsuarmilu toqutaasimasut tamarmik aavat.