v1  Amosip savaatillit Tekoameersut ilaata oqaaserisai, Israeli pillugu takorluugai, Uzzija Judami kunngiutillugu Jeroboamilu Joaship ernera Israelimi kunngiutillugu. Tamanna pivoq nunap sajunnersua ukiunik marlunnik sioqqullugu. v2  Oqarpoq:
      Naalagaq løvitut uiannisaarpoq Zionimit,
      nipini anippaa Jerusalemimit,
      paarsisut ivigartorfigititaat aliasutsillugit,
      Karmelillu kaarfani orpiit toquninngortillugit.

Naalakkap pillaataa inuiaqatigiinnut Judamullu Israelimullu

v3  Ima oqarpoq Naalagaq:
      Aalajangersimasara isumakkeernianngilara
      Damaskusip pinerluttuliorneri pingasut,
      ilami sisamat, pillugit.
      Qamutaasanik karrertaajaatinik saviminiusunik
      Gileadi karrertaajaaffigaat.
       v4  Taamaattumik Hazaelip illua aallartitsivigissavara innermik
      Ben-Hadadip pallittaalisaliaanik nungutitsisussamik.
       v5  Qartorartissavara Damaskusip isaafiata sannerussua
      piuneerullugulu Bik'at-Avenimi issiavissaarsuarmi issiasoq
      Bet-Edenimilu kunngip tigumiaanik tigumiartoq;
      Aramæerit Kirimut aallarunneqassapput,
      oqarpoq Naalagaq.
v6  Ima oqarpoq Naalagaq:
      Aalajangersimasara isumakkeernianngilara
      Gazap pinerluttuliorneri pingasut,
      ilami sisamat, pillugit.
      Innuttai tamaasa aallaruppaat
      Edomimut tunniullugit.
       v7  Taamaattumik Gazap qarmarsui aallartitsivigissavakka innermik
      illoqarfiup pallittaalisaanik nungutitsisussamik.
       v8  Piuneerutissavakka Ashdodimi issiavissaarsuarmi issiasoq
      Ashkalonimilu kunngip tigumiaanik tigumiartoq.
      Assaga Ekronimut silugutissavara,
      filisterillu amiakkui toqutaassapput,
      oqarpoq Guuti Naalagaq.
v9  Ima oqarpoq Naalagaq:
      Aalajangersimasara isumakkeernianngilara
      Tyrusip pinerluttuliorneri pingasut,
      ilami sisamat, pillugit.
      Aallarussaasut tamaasa Edomimut tunniuppaat
      qatanngutigiittullu angerfigeqatigiinnertik eqqaanagu.
       v10  Taamaattumik Tyrusip qarmarsui aallartitsivigissavakka innermik
      illoqarfiup pallittaalisaanik nungutitsisussamik.
v11  Ima oqarpoq Naalagaq:
      Aalajangersimasara isumakkeernianngilara
      Edomip pinerluttuliorneri pingasut,
      ilami sisamat, pillugit.
      Qatanngunni nallittornagu panat sakkugalugit malersorpaa.
      Kamannini aalajangiusimajuarpaa
      uumissuiuarami.
       v12  Taamaattumik Temani aallartitsivigissavara innermik
      Bosrap pallittaalisaanik nungutitsisussamik.
v13  Ima oqarpoq Naalagaq:
      Aalajangersimasara isumakkeernianngilara
      Ammonikkut pinerluttuliorneri pingasut,
      ilami sisamat, pillugit.
      Nunartik allisikkumallugu sorsutsillutik
      naartusut naavi siittarsimavaat Gileadimi.
       v14  Taamaattumik Rabbap qarmarsui ikuallatsissavakka
      illoqarfiup pallittaalisaanik nungutitsisussamik,
      ullormi akiuuffissami saassusseqqussummik nilliasoqartillugu,
      anorersuartillugu silarluup ulluani.
       v15  Kunngiat naalagartanilu aallarussaassapput,
      oqarpoq Naalagaq.