v1 Tusarsiuk oqaaseq manna, ilissi pillusi upputigiumasara, Israelikkuususi:
v2 Niviarsiaq Israeli orlutitaavoq
makeqqittussaajunnaarluni.
Nunaamminut igitaavoq;
makititsisussaqanngilaq.
v3 Ima oqarpoq Guuti Naalagaq:
Illoqarfiup inui 1.000-iullutik sorsukkiartortut
100-innarnik amiakkoqassapput;
100-ullutillu sorsukkiartortut
quliinnarnik amiakkoqarumaarput Israelikkunni.
v4 Ima oqarpoq Naalagaq Israelikkunnut:
Uanga ujarsinga, taava inuussaasi!
v5 Beteli ujaqinasiuk,
Gilgalimukaqinasi,
Be'ershebamut ateqinasi;
Gilgali aallarussaassaaq,
Beteli suujunnaartussaassaaq.
v6 Naalagaq ujarsiuk, taava inuussaasi.
Taamaaliunngikkussi innertut tikiuteqinaaq ilissinnut Josefikkuusunut;
inneq taanna nungutitseqinaaq, Betelimilu qamititsisussaqanngilaq.
v7 Ilissi iluarneq allanngortipparsi naasutut sungarnitsutut ilersillugu,
naapertuiluarnerlu nunamut igillugu.
v8 Qiluttuusanik Siattunillu pinngortitsisup,
taarnersuarmik allanngortitsisup ullaanngortillugu,
ullorlu unnuanngortillugu taartoq,
immap ernganik qaaqqusisup
nunallu qaavanut kuillugu,
taassuma aqqa tassa Jahve
v9 Taassuma aseruineq qinngortippaa nukittuumut,
aseruineq nalliuppoq pallittaalisamut.
v10 Uumissortarpaat isaaffimmi eqqartuussutissamik aalajangiisoq
asissortarlugulu eqqortumik nalunaajaasoq.
v11 Sanngiitsoq tullaatarisarassiuk
karriutaanillu akileraarutinik piumaffigisarlugu
ujaqqanik sikkigissakkanik illuliussaasi
inigilinngisaannassallugilli,
viinnequteqarfiliussaasi alutornartunik,
viinnili ilissi nammineq imissanngilarsi.
v12 Nalunngilarami unioqqutitsinisi qanoq amerlatigisut
qanorlu ingasatsigisumik ajortuliortartusi.
Pisuutitaasussaanngitsut qinugisarpasi akilersinnerluutinillu tunisittarlusi;
piitsullu isaaffimmi ikiorumasanngilasi.
v13 Taamaattumik ulluni taama pisoqarfiusuni silatooq nipangersimasarpoq,
ullummi tamakku ajortuupput.
v14 Ajortoq pinnagu ajunngitsoq ujarsiuk
inooqqullusi.
Taava Naalakkap Katersaarsuit Guutiata najussavaasi,
soorlu taama oqartusi.
v15 Ajortoq uumigisiuk ajunngitsorlu nuannaralugu,
naapertuilluarnerlu atortuulersissiuk isaaffimmi!
Immaqa taava Naalakkap Katersaarsuit Guutiata
Josefikkut amiakkui saamasaarfigiumaarpai.
v16 Taamaattumik oqarpoq Naalagaq,
Katersaarsuit Guutiat, Naalagaq:
Niueriartortarfinni tamani upittoqarumaarpoq,
aqqusinerni tamani nilliassapput: Eqqanaq, eqqanaq!
Qaaqqujumaarpaat naasorissaasut upeqqullugit,
upputinillu ilisimasaqartut kappialaqqullugit.
v17 Viinnequteqarfinni tamani kappialassapput
akunnissigut ingerlajumaarama,
oqarpoq Naalagaq.
v18 Eqqanaq Naalakkap ullussaanut qilanaartut!
Naalakkap ullussaa ilissinni sumut iluaqutaassammat?
Taggariinnaassaaq qaamasoqarani.
v19 Assigissavaa løvimit qimaalluni nannumik siumuisoq,
angerlaramilu qarmamut ajappartortilluni
pulateriaarsummit toqunartulimmit kiineqartoq.
v20 Ilumut Naalakkap ullussaa taggariinnaassaaq qaamanersannguaqarani.
v21 Nalliussisarnisi uumigaakka avaanngugeqalugillu,
ullut nalliussiffisi nuannarinngilakka.
v22 Pilliutissinnik ikikkagassanik naatitanillu pilliutissinnik pilliiffigigaluarussinga
ilassiumassanngilakka,
nersutaatinik puallarsakkanik nereqatigiissutissatut pilliiffigigaluarussinga
qiviumissanngilakka.
v23 Tussiarnersi soraarukkussiuk uannut qujanaannassaaq,
kukkilattariarsornersi tusarumanngilara!
v24 Iluarsuserli pikialatissiuk puilasutut,
naapertuilluarnerlu kuunnguatut imaarutissanngitsutut.
v25 Ukiuni 40-ni inoqajuitsumiitillusi pilliutinik toqutassanik naatitanillu pilliutinik
uannut pilliisarsimanerpisi, Israelikkuususi?
v26 Ingerlaaruttarnerpasi
assilissat nammineq sanaasi,
kunngersi Sakkutip
Kevanilu ulloriaq guutisiorfissi?
v27 Taava aallarukkumaarpassi
Damaskusip ungataanut,
oqarpoq Naalagaq.
Aqqa tassa Katersaarsuit Guutiat.