v1 Saulusi kamattorsuujuarpoq Naalakkallu ajoqersugai sioorasaarlugit toqukkumallugit; palasiunermukarpoq v2 qinnuigalugulu Damaskusimi synagoginut allakkanik tuneqqulluni Aqqummik atuaasut angutit arnallu nanisinnaasani tigusariumallugit Jerusalemimukaallugillu. v3 Ingerlatilluni Damaskusi qanillileraalu tassanngaannaq qaamanerup qilammit iluaa. v4 Nunamut uppippoq, tusaasaqarporlu nipimik ima oqartumik: »Sauli, Sauli, sooq qinugaanga?« v5 Akivoq: »Kinaavit Naalagaq?« Oqarporlu: »Jiisusiuvunga qinugisat. v6 Nikuillutilli illoqarfimmut iseriartorit, taava tassani qanoq iliornissannik ilisimatinneqassaatit.« v7 Angalaqatai oqariarneq sapilerput; nipimimmi tusaasaqaraluarput oqaluttumilli isigisaqarnatik. v8 Taava Saulusi nikuippoq, uisagaluarluni isigisaqanngilaq, tasiorlugulu Damaskusimukaattariaqarpaat. v9 Ulluni pingasuni isigisaqanngilaq nerinanilu imernaniluunniit.
v10 Damaskusimiippoq ajoqersugaq Ananiamik atilik, taannalu Naalakkap takorluuinikkut oqarfigaa: »Anania!« Taanna akivoq: »Aap, Naalagaq!« v11 Naalakkap oqarfigaa: »Aqqusinermut Narlusuumukarit Judasillu illuani Saulusi Tarsusimioq apeqqutigalugu. Taannami qinuvoq, v12 takorluuillunilu takuaa angut Ananiamik atilik isertoq assamminillu attorluni kingumut isigisaqalersikkaani.« v13 Anania akivoq: »Naalagaq, amerlasuunit tusarsimavara angut taanna Jerusalemimi illit illernartortannut qanoq ajortigisumik iliuuseqartoq. v14 Palasiunernillu pisinnaatitaavoq maani illit atinnik torlorfiginnittut tamaasa tigusarisinnaallugit.« v15 Naalakkalli oqarfigaa: »Aallarit! Taannaavormi qinersimasara sakkugiumallugu aterma saqqummiunneqarnissaanut Guutimik nalusunut, kunnginut Israelillu kinguaavinut. v16 Takutissavaralu atera pillugu qanoq atsigisumik atugarliorumaarnissaanik.« v17 Taava Anania aallarpoq, illumullu iserami assamminik patippaa oqarlunilu: »Qatanngut Saulusi, Naalakkap Jiisusip maanngartillutit aqqutinni ilinnut takutittup aallartippaanga kingumut isigisaqaleqqullutit Anersaamillu Illernartumik ilumioqangaaleqqullutit.« v18 Erniinnarlu soorlumi isaanit tattaat peersut; kingumut takunnissinnaalerpoq, nikuipporlu kuisillunilu. v19 Nerigamilu kingumut nukittorpoq.
Ullut qassissuit Saulusip Damaskusimi ajoqersukkat najorpai, v20 erniinnarlu synagogini oqaluussissutigilerpaa Jiisusi Guutip ernerigaa. v21 Tamatuminnga tusartut tamarmik tupigutsapput oqarlutik: »Ila taannaannginnerpa Jerusalemimi atermik taassuminnga torlorfiginnittunik nungutitsiniartoq? Tamaannaramilu siunertarisaa tassarpiaannginnerpa taakku tigusarissallugit palasiunernukaatissallugillu.« v22 Saulusili pissatsikkiartuinnarpoq, juutillu Damaskusimiittut akissutissaarutitittarpai uppernarsaraangamiuk Jiisusi tassaasoq Kristusi. v23 Ullorpaaluit qaangiummata juutit peqatigiillutik aalajangiipput toqukkumallugu. v24 Saulusilli pilersaarutaat tusarpaa. Allaammi illoqarfiup isaaffiini ulloq unnuarlu paarsipput toqussinnaajumallugu. v25 Unnualli arlaanni ajoqersugaasa koorersuarmut ikillugu illoqarfiup qarmaatigut ningippaat.
v26 Jerusalemimut pigami ajoqersukkat ilannguffiginiaraluarpai, tamarmilli ersigaat ajoqersugaanera upperinnginnamikku. v27 Barnaballi ikiorpaa apustilinukaallugulu. Barnabap taakku nassuiaappai Saulusip aqqummini Naalakkamik takunissimaneranik, Naalakkap tassunga oqalussimaneranik Damaskusimilu nakimaalluni Jiisusip aqqani oqalussimaneranik. v28 Jerusalemimilu taakku pulaartuartarpai Naalakkallu aqqani nakimanani oqaluttarluni. v29 Hellenistit oqaluuttarlugillu oqalliseqatigisarpai; taakkuali toqunniaraluarpaat. v30 Qatanngutit tamanna paasigamikku Cæsareamukartippaat Tarsusimullu ingerlateqqillugu.
v31 Ilagiit Judæami tamarmi Galilæamilu Samariamilu maanna eqqissisimalerput. Ineriartortinneqarput Naalagarlu mianeralugu inuullutik Anersaallu Illernartup oqaaqqissaarineratigut amerliartorlutik.
v32 Petrusi tamani angalasarpoq, illernartullu Lyddami najugaqartut aamma tikippai. v33 Tassani naapippaa angut Æneasimik atilik nukillaarsimagami ukiut arfineq-pingasut nalajuarsimasoq. v34 Petrusillu oqarfigaa: »Æneasi, Jiisusi-Kristusip ajorunnaarsippaatit. Makigit namminerlu siniffiliorlutit!« Erniinnarlu nikuippoq. v35 Lyddami Saronimilu najugaqartut tamarmik taanna takuaat Naalakkamullu saallutik.
v36 Joppemiippoq ajoqersugaq arnaq Tabithamik – tassa Kulavammik – atilik. Taanna ajunngitsuliungaartarpoq piitsunullu tunissutinik amerlasuunik tunisisarluni. v37 Taamaalluni napparsimalerpoq toqullunilu. Asariarlugulu inimut qullermut inissippaat. v38 Lydda Joppep eqqaaniippoq, ajoqersukkallu tusaramikku Petrusi tassaniittoq angutit marluk taassumunnga aallartippaat ima qinnuigalugu: »Tuaviorlutit orninniartigut!« v39 Taava Petrusi aallarpoq angutit oqariartortitat ingerlaqasiullugit. Tikiummat inimut qullermiittumukartippaat, uillarnerillu tamarmik qianngarmik tikiupput takutillugillu ilupaat qallersaatillu Tabithap imminniikkallarami sanaavi. v40 Petrusip tamaasa anisippai seeqqumiarlunilu qinulerluni; taava toqungasumut saappoq oqarlunilu: »Tabitha, makigit!« Taanna uippoq, Petrusilu takugamiuk massilluni ingippoq. v41 Petrusillu assaasigut tigullugu nikuitippaa. Taava illernartut uillarnerillu qaaqquai taakkununngalu takutillugu uummarsimasoq.
v42 Tamanna Joppemi tamarmi ilisimaneqalerpoq, amerlasuullu Naalakkamut uppertunngorput. v43 Petrusilu sivisuumik Joppemiippoq ammiortumi Siimuumik atilimmi najugaqarluni.