v1 Nebukadnesari ukiut naalakkersuiffimmi aappaanni sinnattorami eqqissiveeruppoq sinissaarullunilu. v2 Taava kunngip angakkuarniartartut, angakkuarnittartut, angakkuartartut ulloriarsiortullu qaaqqutippai sinnattukkami suuneranik oqaluttuuteqqulluni. Taakku aggeramik kunngimut sassarput. v3 Kunngip oqarfigai: »Sinnattorpunga, qanorlu isumaqartoq paasinnginnakku eqqissiveeruppunga.« v4 Ulloriarsiortut kunngi akivaat Aramæerisut: »Kunngi inuummersorli! Sinnattukkat oqaluttuariniaruk, naalagaq, taava nassuiassavarput.« v5 Kunngip ulloriarsiortut akivai: »Aalajangiuppara sinnattukkama isumaanik nassuiaaffigiinnarnanga aamma sumik sinnattorsimaninnik oqaluttuutissagissinga. Taamaaliorsinnaanngikkussi suujunnaarsitaassaasi, illusilu nungutitaalluinnassapput. v6 Oqaluttuussinnaagussingali sumik sinnattorsimasunga sinnattugaralu qanoq isumaqartoq taava akilerneqarluassaasi ataqqinarsisitaassallusilu. Maanna oqaluttuunniarsinga sumik sinnattorsimasunga sinnattoralu qanoq isumaqartoq!« v7 Taakkua oqaqqipput: »Sinnattukkat kiffannut oqaluttuariniaruk, kunngi, taava nassuiassavarput.« v8 Kunngili akivoq: »Maanna qularutigiunnaarpara sivitsorsaaginnalersusi paasigassiuk aalajangiussara allanngortinnianngikkiga. v9 Oqaluttuussinnaanngikkussinga sumik sinnattorsimasunga inatsit ilissinnut atuuttussaq ataasiinnaavoq! Isumaqatigiissutigisimavarsili salloqittarlunga pututinniassallunga piffissat allat nalliutserlugit. Oqaluttuunniarsinga sumik sinnattorsimasunga, taava paasissavara sinnattukkama isumaanik nassuiaassinnaagissinga!« v10 Taava ulloriarsiortut kunngi akivaat: »Nunarsuarmi tamarmi ataasiinnarmilluunniit inoqanngilaq kunngip ilisimajumasaanik ilisimatitsisinnaasumik, kunngillu kialuunniit qanorluunniit pissaaneqartigigaluartup angakkuarniartartut, angakkuarnittartut ulloriarsiortulluunniit taama ittumik piumaffiginngisaannarsimavai. v11 Kunngip piumasaa sukanneqaaq. Kunngip piumasaanik naammassinnissinnaasoqanngilaq guutiunngitsunik, guutillu inuit akornanni najugaqanngillat.« v12 Akissut tamanna kunngip uumitsaatigeqaa peqqusillunilu Babylonip ilisimasortai tamarmik toqunneqassasut.
v13 Ilisimasut toqutaanissaannik peqqussut saqqummiunneqarmat Danieli ikinngutaalu aamma toqunneqaratarsinnaanngorput.
v14 Danielilli Arjoki sakkutuut kunngimik paarsisut naalagaat Babylonip ilisimasortaanik toqoraasussanngortitaq oqaatsinik silatuunik isumaliutigeqqissaakkanik oqaaseqarluni saaffigaa
v15 aperalugu: »Sooq kunngi taama sukannertigisumik peqqussuteqarpa?« Arjokip Danieli tamatuminnga nassuiaappaa.
v16 Taava Danielip kunngi iserfigalugu qinnuigaa aalajangersimasumik piffissaqarteqqulluni sinnattugaanik oqaluttuullugulu nassuiaanissaminut.
v17 Danielip angerlarami ikinngutini Hananja, Mishaeli Azarjalu tamatuminnga oqaluttuuppai,
v18 peqquaalu qilaap Guutia qinnuigeqqullugu naakkinnilluni isertugaq saqqummiuteqqullugu nammineq ikinngutinilu Babylonip ilisimasortaanut ilanngullutik toqutaaqqunatik.
v19 Taava isertugaq Danielimut saqqummersitaavoq unnuami takorluukkatut, Danielillu qilaap Guutia unnersiutigaa.
v20 Oqarpoq:
Guutip aqqa naassaanngilluinnartumik unnersiutigineqarli,
taassuma ilisimassuseq pissaanerlu pigimmagit.
v21 Taassuma piffissat piffissarititallu kingoraartaatsippai.
Kunnginik soraarsitsisarpoq ivertitsisarlunilu.
Ilisimassuseqalersitsisarpoq ilisimasunik
siuneqalersitsisarlunilu silassorissunik.
v22 Siunersisassaanngitsut isertugaasullu saqqummersittarpai,
suut taartumiittut nalunngilai,
taassumani qaamaneq najugaqarpoq.
v23 Illit siuaasama Guutiat qutsavigalutillu erinalimmik unnersiutigaakkit
ilisimassusermik pissaanermillu tunigamma;
maanna qinnutigisatsinnik nalujunnaarsipparma
kunngimut akissutissamik nalujunnaarsippatsigut.
v24 Taava Danielip Arjoki kunngip Babylonip ilisimasortaanik toqoraasussanngortitaa ornippaa oqarfigalugulu: »Babylonimi ilisimatuut toqoqinagit! Kunngimulli sassartinnga, taava sinnattugaanik nassuiaaffigissavara.«
v25 Arjokip Danieli kunngimut sassartikkasuarpaa kunngilu oqarfigalugu: »Judamit aallarussaasut ilaannik nassaarpunga kunngimut sinnattugaanik nassuiaassiumasumik.«
v26 Taava kunngip Danieli Beltshassarimik atserneqartoq oqarfigaa: »Sinnattugara oqaluttuarisinnaallugulu nassuiarsinnaaviuk?«
v27 Danielip kunngi akivaa: »Isertugaq kunngip paasiumasaa ilisimasut angakkuarnittartullu angakkuarniartartullu qilammillu misissuisartut kunngimut oqaluttuarisinnaanngilaat.
v28 Guuteqarporli qilammiittumik isertukkanik saqqummersitsisartumik, taassumalu kunngi Nebukadnesari ullussani kingullissani piumaartussanik nalunaarfigisimavaa. Tassa taamaapput sinnattutit takorluukkatillu innanngavinni nalatillutit eqqarsaatigisatit.
v29 Kunngi, innanngavinni nalatillutit eqqarsaatigisimavat siunissami qanoq pisoqarumaartoq. Taassumalu isertukkanik saqqummersitsisartup piumaartussanik nalunaarfigaatit.
v30 Isertugaq taanna uannut saqqummersinneqarmat imaanngilaq inoqatinnit ilisimassuseqarnerusunga, kisiannili saqqummersinneqarpoq sinnattugaq ilinnut kunngimut nassuiarneqarniassammat uummativit eqqarsaatai ilinnut nalujunnaaqqullugit.
v31 Kunngi, illit takorloorsimavat inuusaliarujussuaq saanniittoq sakkortoqisumik qaamaneqartoq annilaarnangaartumillu isikkoqartoq.
v32 Inuusaliap niaqua kuultimit pitsaanerpaamit sanaajuvoq, sakiaa taliilu sølvimit sanaajupput, naava siffiaalu kanngussammit,
v33 niui saviminermit, isigaalu ilaatigut saviminermit ilaatigullu marrarmit sanaajullutik.
v34 Isiginnaartillutit ujarak kaanngarpoq inuit assaannit pineqarnani, inuusaliallu isigai saviminiullutillu marraasut eqqorpai sequmisillugillu.
v35 Savimineq marrarlu kanngussallu sølvilu kuultilu ataatsikkut sequmisitaapput karrit qalipakuisut aasami karrertaajaaffinnit teqqartutut ilerlutik, anorillu teqqarpai nanisassaajunnaarsillugit; ujaralli inuusaliamik eqquisoq qaqqarsuanngorpoq nunarsuaq tamakkerlugu.
v36 Tassa sinnattugaq, maannalu kunngimut nassuiassavarput. v37 Kunngi, kunngit kunngigisaat, qilaap Guutiata ilinnut kunngiussuseq pissaanerlu nakuussuserlu ataqqinassuserlu tunniuppai. v38 Illillu assannut tunniuppai sumiluunniit ittut inuit nunarsuullu nersutai qilaallu timmiai taakkununnga tamanut naalaganngortillutit; illit tassaavutit niaqoq kuultiusoq. v39 Illilli kingunikkut naalagaaffik alla pinngussaaq illit naalagaaffinnit nikanarnerusoq; taava aamma naalagaaffiit pingajussaat kanngussaasoq pinngussaaq, naalagaaffiullu taassuma nunarsuaq tamakkissavaa. v40 Kingorna naalagaaffiit sisamassaat pinngorumaarpoq saviminertut sunik tamanik sequmisitsisartutut ittoq. Soorlu savimineq sequmisitsisartoq taama naalagaaffiup taassuma naalagaaffiit taakku siulliit tamaasa sequmisikkumaarpai. v41 Takorluukkanni takuatit isikkat inuaallu ilaatigut marriortup marriaanit ilaatigullu saviminermit sanaajusut. Tamanna ima isumaqarpoq: Naalagaaffik taanna ataasiujunnaarluni aggorneqarumaarpoq. Taamaattorli ilaatigut saviminertut qajannaatsuussaaq; takuammi savimineq marrarlu akugiissitaasut. v42 Isigaasa inuaasa ilaatigut saviminiunerat ilaatigullu marraanerat isumaqarpoq naalagaaffik taanna ilaatigut qajannaatsuussasoq ilaatigullu qajannartuussalluni. v43 Savimineq marrarmik akusaasoq takugakku tamanna ima isumaqarpoq: Aappariinnikkut akuleriissapput, ataqatigiinngillalli soorlu savimineq marrarlu ataqatigiississallugit ajornartoq. v44 Kunngit taakkua inuutillugit qilaap Guutiata naalagaaffik qaqugumulluunniit atasussaq pilersikkumaarpaa, kingornalu inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq. v45 Takorluukkannimi takuat ujarak inuit assaannit pineqarnani qaqqamit kaanngartoq savimineq, kanngussak, marraq, sølvi kuultilu sequmisillugit. Guutip annerussaartup kunngi nalunaarfigaa siunissami piumaartussanik. Sinnattugaq ilumoorpoq nassuiarneqarneralu uppernartuulluni.«
v46 Taava Nebukadnesari nunamut pallorpoq Danieli nersorniarlugu, peqqusivorlu Danieli pilliutinik tipigissaatinillu sassaassiffigissagaat. v47 Kunngip Danieli oqarfigaa: »Ilumut Guutigisarsi guutit Guutigaat kunngillu Naalagaraat, isertukkanillu saqqummersitsisinnaassuseqarpoq, illit isertugaq tamanna saqqummersissinnaasimagakku.« v48 Taava kunngip Danieli akitsisippaa tunissuterpassuarnillu akisuunik tunillugu nunallu immikkoortuanut Babylonimut tamarmut naalaganngortillugu Babylonillu ilisimasortaanut tamanut qullersanngortillugu. v49 Danielillu qinnuigimmani kunngip Shadraki, Meshaki Abed-Negolu nunap immikkoortuanut Babylonimut naalakkersuisunngortippai. Danielili nammineq kunngikkormiuniiginnarpoq.