v1  Uanga Nebukadnesari taamani eqqissisimallunga illunniippunga inuulluataarlungalu illussaarsuanniippunga. v2  Taava sinnattorlunga takorluugaqarpunga tamannalu tataatsaatigaara; innanngatillunga sinnattukkama eqqarsaatikkullu takorluukkama annilaarteqaannga. v3  Tamanna pillugu peqqusivunga Babylonip ilisimasortai tamaasa uannut sassarteqqullugit sinnattukkannik nassuiaaffigeqqullunga. v4  Angakkuarniartartut, angakkuarnittartut, ulloriarsiortut qilammillu misissuisartut iserput, sinnattukkannilli oqaluttuukkaluaratsik nassuiaaffigineq saperpaannga.

v5  Kingulliulluni Danieli uanga guutiga atsiullugu Beltshassarimik atserneqartoq guutit illernartut anersaavannik ilumioqartoq uannut sassarpoq, sinnattukkannillu oqaluttuuppara: v6  »Beltshassari, angakkuarniartartut pikkorinnersaat! Ilisimavara guutit illernartut anersaavannik ilumioqartutit isertukkanillu sunilluunniit nassuiaassallutit sapigaqanngitsutit. Sinnattortillunga takorluugara tusariarlugu nassuiaruk! v7  Innanngavinni nalatillunga imaattumik takusaqarpunga:
      Takuleriallariga orpik nunarsuup qeqqani napasoq,
      portusoorsuusorlu.
       v8  Alliartorluni orperujussuanngorpoq.
      Kaarfa qilammut apissippoq,
      takuneqarsinnaallunilu nunarsuup isuanut.
       v9  Pilutai takoranneqaat, inerititaalu amerlangaaramik
      tamanut nerisassaqartitsipput.
      Ataani alanngiffissarsipput nunarsuup nersutai,
      avalequtaani ineqarput qilaap timmiai,
      uumassusillillu tamarmik nerisassaqarfigaat.
v10  Innanngavinni nalatillunga eqqarsaatikkut takorluukkanni manna takuara: Pigaartoq, illernartoq, qilammit aqqarpoq v11  nipituumillu suaarpoq oqarluni:
      Orpik kipillugu uppitissiuk, avalequtaalu killorsigit,
      pilutai piiarsigit inerititaalu siammarlugit!
      Qimaalit nersutit alanngiffigisaminnit orpiup ataaniittumit,
      timmissallu avalequtaanit.
       v12  Sorlaa kippakoq
      nunami ataannarli
      qilersimalluni kalunnernik saviminiusunik kanngussaasunillu
      narsaatip ivigaasa akornanni.
      Angut taanna masatserneqassaaq qilaap isugutaanik
      nersutillu nujuartat peqatigalugit nunap naatitaanik ilangiissalluni.
       v13  Inuttut uummataa allanngussaaq
      nersutip uummataanik tunineqassalluni,
      taamalu ikkili piffissarititani arfineq-marlunni.
v14  Tamanna aalajangiuppaat pigaartut, eqqartuussut taanna aalajangerneqarpoq illernartunit, inuusunut paaseqqullugu Qutsinnerussaartup kunngeqarfik nunarsuarmiittoq naalagaaffigigaa piumasaminullu tunniussinnaagaa, inuillu nikanarnersaat allaat naalagaaffimmut kunnginngortissinnaallugu.

v15  Tamassa uanga Nebukadnesari sinnattortillunga takorluugara, illillu Beltshassari tamatuminnga nassuiaaffiginnga. Kunngeqarfinnimi ilisimasut arlaannaataluunniit nassuiaanneq saperpaanga, illilli sapinngilat guutit illernartut anersaavannik ilumioqaravit.«

v16  Taava Danieli Beltshassarimik atserneqartoq annilaajallannermit sivikitsumik qeqaannarpoq, eqqarsaataasalu tataatsatsingaarpaat. Kunngili oqarpoq: »Beltshassari, sinnattugara nassuiaatissaalu annilaarutiginiaqinagit.« Beltshassarili akivoq: »Kunngi, qanortoq sinnattukkanni akerartortitit pineqarlit nassuiaatissaanilu qinngarsortitit pineqarlutik! v17  Orpissuaq takorluukkat alliartorluni angisoorsuanngortoq kaarfa qilammut apississimalluni nunarsuarmi tamarmi ersitsoq v18  pinnersunik pilutaqartoq amerlaqisunillu inerititaqartoq tamarmik nerisaqarfigisaat, taassuma ataani nunarsuup nersutai ineqartut avalequtaanilu qilaap timmiai ineqartut – tassa illit nammineq, kunngi! v19  Angingaaravit pissaanerit alliartuinnarluni qilammut apissippoq naalagaassutsillu nunarsuup isuanut annguppoq. v20  Kunngi, illit takuat pigaartoq illernartoq qilammit aqqartoq oqarlunilu: Orpik kipillugu uppitissiuk aserorterlugulu; sorlaali kippakoq nunami ataannarli qilersimalluni kalunnernik saviminiusunik kanngussaasunillu narsaatip ivigaasa akornanni. Masatserneqassaaq qilaap isugutaanik, nersutitullu nujuartatut atugaqassaaq piffissarititat arfineq-marluk qaangiutserlugit. v21  Kunngi, Qutsinnerussaartup pilersaarutaa taanna uanga naalakkannut kunngimut nalliuttussaq ima isumaqarpoq: v22  Inoqatinnit peersitaallutit ajattugaassaatit nersutit nujuartat akornanni najugaqalerlutit. Ussittut ivigartussaatit qilaallu isugutarnanit masatserneqarlutit, piffissarititanilu arfineq-marlunni taama atugaqassaatit ilinnut misigitserlugu Qutsinnerussaartup kunngeqarfik nunarsuarmiittoq naalagaaffigigaa piumasaminillu kimulluunniit tunniussinnaagaa. v23  Orpiup sorlaa kippakoq atateqqullugu peqqusimmat tamanna isumaqarpoq naalagaaffiit kingumut pigilissagit, paasilerukku qilaap pissaaneq pigigaa. v24  Taamaattumik siunnersuutiga iluarigiuk, kunngi: Ajortuliornitit soraarunniakkit, iluartuugillu unioqqutitsinitillu soraarullugit ikiortarialinnullu naakkinnittuullutit; taava eqqissisimallutit sivisuumik inuusinnaassaatit.«

v25  Tamakkuninnga tamanik kunngi Nebukadnesari eqqorneqarpoq. v26  Qaammatit aqqaneq-marluk qaangiummata kunngi Babylonimi illussaarsuarmi qaavani saqisaartilluni v27  oqarpoq: »Ilumut tassa Babyloni angingaaqisoq uanga pissaanikkut artorsajuitsukkut kunngimut najugassiara uanga ataqqinaatissannik!« v28  Kunngilli oqaatsini suli naanngikkai nipi qilammit tutsiuppoq: »Kunngi Nebukadnesari, ilisimatinneqarputit kunngeqarfinnik arsaarneqassasutit. v29  Inoqatinnit peersitaallutit ajattugaassaatit nersutit nujuartat akornanni najugaqalerlutit. Ussittut ivigartussaatit, piffissarititanilu arfineq-marlunni taama atugaqassaatit, ilinnut misigitserlugu Qutsinnerussaartup kunngeqarfik nunarsuarmiittoq naalagaaffigigaa piumasaminillu kimulluunniit tunniussinnaallugu.« v30  Erniinnarlu oqaatsit taakku Nebukadnesarimut eqquutitinneqarput. Inoqatiminit peersitaalluni ajattugaavoq ussittullu ivigartulerluni, qilaallu isugutaanit masatserneqarpoq nujai nattorallip meqquisut takitigilersillugit kukiilu timmissap tigutsisaatut ilersillugit.

v31  Piffissarititat taaneqartut qaangiummata uanga Nebukadnesari qilammut aarlorama silaqassusera kingumut pigilerpara. Qutsinnerussaartorlu – taanna ittuinnartuusoq – nersorlugulu erinalimmillu unnersiutigalugu naalannartippara:
      Naalagaassusia naalagaassusiuvoq soraajuitsoq,
      kunngeqarfia atassaaq kinguaariikkuutaani.
       v32  Nunarsuup inui tamarmik suunngillat.
      Qilaap perpassui nunallu inui piumasaminik iliorfigai.
      Kialuunniit akornusersorsinnaanngilaa,
      imalu oqarsinnaasoqanngilaq: »Susutinuna?«
v33  Taamaalisorlu silaqassusera pigileqqippara; aammattaaq naalannassusera alutornassuseralu pigileqqippakka kunngeqarfimma ataqqinaatissaanik. Ministerikka naalagartakkalu kingumut uannut sassarput, kingumullu kunnginngortitaavunga pissaanermillu suli annerusumik tunineqarlunga. v34  Maannakkullu uanga Nebukadnesari qilaap kunngia erinalimmik unnersiutigalugu akitsisillugulu ataqqinartippara. Taassuma qanoq iliorneri tamarmik eqqortuupput; aqqutigisai iluarput, anneruniartullu makitanaveersarneq sapinngilai.