v1 Abimelekip toqunerata kingornatigut Tola Israelimik annatsitsisussanngortitaavoq. Taanna tassaavoq Puvvap ernera, Dodop ernutaa, Issakarip naggueqatigiissortaanit pisoq Shamirimi Efraimip qaqqalittaani najugaqartoq. v2 Israelimi ukiuni 23-ni eqqartuussisuuvoq. Toqugami Shamirimi ilineqarpoq.
v3 Taassuma kingorna Jairi Gileadimioq eqqartuussisunngorpoq ukiunilu 22-ni Israelimi eqqartuussisuulluni. v4 30-nik erneqarpoq. Taakku siutituuni 30-ni qimussertarput Gileadimilu 30-nik illoqarfeqarlutik ulloq manna tikillugu Jairip tupeqarfiinik taaneqartartunik. v5 Jairi toqugami Kamonimi ilineqarpoq.
v6 Israelikkut Naalakkap isaani ajortumik ilioqqilerput. Guutisiorfigaat Ba'alit Astartellu, Aramip, Sidonip Moabillu guutii kiisalu Ammonikkut filisterillu guutii. Naalagaq tunuppaat kiffartuukkumajunnaarlugulu. v7 Taava Naalakkap Israeli kamaatingaaleramiuk filisterit Ammonikkullu assaannut tunniuppaa. v8 Ukioq taanna taakkua Israeli suujunnaarsippaat. Israelikkut Jordanip kangiani, Amorikkut nunaanni Gileadimi, najugaqartut tamaasa ukiuni 18-ini qunutitaraat. v9 Ammonikkut aamma Jordani ikaarpaat saassullugillu Juda, Benjamini Efraimikkullu. Israelilu annikilliungaalerpoq.
v10 Taava Israelikkut Naalagaq torlorfigaat oqarlutik: »Ajortuliorfigaatsigit, Guuterput tunussimagatsigu Ba'alillu guutisiorfigalugit.« v11 Naalagarli Israelikkunnut oqarpoq: »Qunutitaannginnerpisi Egyptenimiunit, Amorikkunnit, Ammonikkunnit, filisterinit, v12 Sidonimiunit, Amalekikkunnit Midjanikkunnillu? Torlorfigaassinga, assaannillu aniguisippassi. v13 Tunuppassingali guutillu allat guutisiorfigilerlugit. Taamaattumik annaateqqinnianngilassi. v14 Guutit guutigiumallugit qinersimasasi torlorfigiartorsigit! Maanna annikilliortitaagassi taakkua annaallisi.« v15 Taava Israelikkut Naalakkamut oqarput: »Ilinnut ajortuliorsimavugut. Illit iluarisannik iliorfiginiartigut. Maanna ikiorsinnaagutsigut naammagissavarput.« v16 Israelikkut allamiut guutii guutisiorfigisatik peerpaat Naalagarlu kiffartuutilerlugu. Taamaaliormata Naalakkap Israelikkut annikilliortitaanerat ilaginnaannarsinnaajunnaarpaa.
v17 Ammonikkut katersuupput sorsunniarlutik Gileadimilu tammaarlutik, Israelikkullu eqiterupput Mispamilu tammaarlutik. v18 Taava Gileadimiut naalagaallu imminnut oqarfigipput: »Sumiippa angut taanna Ammonikkunnut sorsulerumasoq? Taanna Gileadimiunut tamanut qullersaassaaq.«