v1 Taamani Israelimi kunngeqannginnerata nalaani anguteqarpoq Levikkuusumik Efraimip qaqqalittaata avinngarusimanersaani najugaqartumik. Taassuma arnaq Betlehemimit Judamiittumit pisoq panerfattaaraa. v2 Panerfaatali angut taanna kamaakkamiuk qimallugu Betlehemimi Judamiittumi ataatami illuanut angerlarpoq. Qaammatit sisamat missiliorlugit tassaneereersoq v3 uia aallarpoq ornillugu, kimigiiserfigalugu imminut utertinniarlugu. Kiffani inuusuttoq aapparaa siutituulisarlunilu marlunnik. Arnap inuusuttup taassuma ataatami illuanukaappaa, ataataatalu takugamiuk nuannaarluni ilassivaa. v4 Sakiata, arnap inuusuttup ataataata, kimigiiserfigalugu uninngatippaa ulluni pingasuni imminiitillugu. Tassanilu nerillutillu imerput unnuillutillu. v5 Ullut sisamassaanni ullaannguaq angut aallarnissaminut piareersalermat arnap inuusuttup ataataata ningaani oqarfigaa: »Aallartinnak nerilaarniarallaat tumannguersarlutit.« v6 Taava uniinnarput. Angutit taakku marluk nereqatigiipput imerlutillu. Taava arnap inuusuttup ataataata angut oqarfigaa: »Maani unnuiniarallaat ilorrisimaarlutillu.« v7 Aallarniarlunilu nikuimmat sakiata kimigiiserfigaa unnueqqitsillugulu. v8 Ullut tallimassaanni ullaannguaq aallarnialermat arnap inuusuttup ataataata oqarfigaa: »Tumannguersalaaqqaarniarallaat ualeru aallarumaarputit!« Taava angutit taakku marluk nereqatigiipput. v9 Angut piareersalermat panerfani kiffanilu aallaqatigissallugit sakiata, arnap inuusuttup ataataata, oqarfigaa: »Maanna unnulereerpoq. Unnuiinnarniarit ilorrisimaarlutillu. Aqagu ullaarorlusi angerlamut aallarumaarpusi.« v10 Angulli tamaani unnueqqinnianngilaq. Piareersariarluni aallarpoq, ingerlareerlunilu Jebusi, tassa Jerusalemi, nallerpaa. Siutituutini marluk issiaatsersimasut nassarpai, panerfaatalu ilagaa.
v11 Jebusip eqqaaniileramik seqinerlu tarrilermat kiffaata naalakkani oqarfigaa: »Jebusikkut illoqarfiannut isiinnarta tassanilu unnuilluta.« v12 Naalagaatali akivaa: »Illoqarfimmi takornartaannarnik inulimmi Israelikkut piginngisaanni unnuissanngilagut; Gibeamut ingerlaannassaagut.« v13 Kiffani oqarfigaa: »Qaa, Gibeamut Ramamulluunniit unnuiartorniarta.« v14 Taava ingerlaqqipput, seqinerlu tarrimmat Gibeap Benjaminikkut nunaanniittup eqqaanut killissimapput. v15 Gibeamut iserput tassani unnuiniarlutik. Illoqarfimmut iseramik niueriartortarfimmi ingipput, tassami unnuiffissaminnik innersuunneqannginnamik. v16 Unnukkaa angut utoqqaq tikiuppoq narsaatimini sulereersimalluni angerlarluni. Efraimip qaqqalittaanit pisuuvoq Gibeamili takornartaalluni. Gibeap inuii Benjaminikkuupput. v17 Angutip utoqqaap angalasoq illoqarfiup niueriartortarfiani issiasoq takugamiuk oqarfigaa: »Sumunnarpit? Sumillu aggerpit?« v18 Aperisaa akivoq: »Betlehemimiit Judamiittumit aggerpugut, Efraimillu qaqqalittaani alimaseqisumut ingerlassaagut tamaani najugaqarama. Betlehemimiikkama maanna angerlamut ingerlavunga. Maanili illusisitsiumasoqanngilaq. v19 Ivigarsuarnik panertunik peqarpugut siutituujutivullu nerukkaatissaqartillugit; uanga arnarlu kiffarlu ilagisarput timiusamik nerisassaqarpugut viinnimillu imigassaqarluta. Amigaateqanngilluinnarpugut!« v20 Angutip utoqqaap oqarfigaa: »Uatsinnukarniarit! Pisariaqakkatit tamaasa uanga isumagissavakka. Niueriartortarfimmi unnuissanngilatit.« v21 Taava angut illuminut isertippaa siutituullu nerukkaatissillugit. Isikkatillu asareeramikkit pujoralak piiarlugu neripput imerlutillu.
v22 Issiallutik ilorrisimaartillugit inuit illoqarfimmiut inupiluusut tikiupput illulu ungullugu. Matu sakkortuumik kasuttorpaat angullu utoqqaq illup piginnittaa suaartarlugu: »Angut illunni isersimasoq anisiguk, innaanniassagatsigu!« v23 Angutip illumik piginnittup annivigalugit oqarfigai: »Qatanngutikka, ajortumik ilioqinasi! Angut taanna illusisimatitarigakku taamatut kanngunartuliussanngilasi. v24 Aajuna paniga suli niviarsiaasoq. Taanna ilissinnut anisillara. Taanna pinngitsaalillugu arneriffigisinnaavarsi iluarisassinnillu iliorfigalugu; angulli una taama kanngunartigisumik iliorfigissanngilarsi.« v25 Kisianni oqaasii inuit tusaajumanngilaat. Taava angutip angalasup panerfani annippaa taakkununngalu tunniullugu. Taakkua unnuaq tamaat ullaanngornera tikillugu arneriffigaat naalliutsillugulu. Qaalermat aatsaat iperarpaat. v26 Qaalermat arnaq tikiuppoq illullu uimi ineqarfiata alloriusaanut aqullaaginnarluni. Qaammalernera tikillugu tassani nalaannarpoq. v27 Uia ullaakkut makikkami aallarniarluni matu mapperlugu takulerpaa panerfani illup isaariaata sioraani uppeqqasoq assani matup alloriusaanut tutsissimallugit. v28 Oqarfigaa: »Nikuigit, aallarniassaagut!« Taannali akinngilaq. Taava kivillugu siutituup qaanut inisseriarlugu angerlarluni aallarpoq.
v29 Illuminut tikikkami savimmik tiguseriarluni panerfammi timaa nagguaasigut aggorpaa aqqaneq-marlunngorlugu. Aggukkanilu Israelimut tamarmut aallarussortippai. v30 Taakkuninnga takunnittut tamarmik oqarput: »Israelikkut Egyptenimit aninerannilli taamaattumik pisoqarsimanngisaannarpoq; taamaaqataanik misigisaqanngisaannarsimavugut. Tamanna eqqarsaatiginiarsiuk, siunersioqatigiinniaritsi isumarsilu oqaatigalugu!«