v1 Eqqanaq ilissi qitornat naalasseriitsusi,
oqarpoq Naalagaq,
naammassisitsisartusi pilersaarutinik uanga pilersaarusiarinngisannik,
ilissarsisartusi anersaara siunnersortiginagu
ajortuliasi ilaartorlugit.
v2 Egyptenimut samunnarpusi
siunersioqqaarnanga,
Farao sernissuisiginiarparsi
Egyptenip alanngortaani qimarnguffissarsiorlusi!
v3 Faraolli sernissuinera ilissinnut kanngunarsaataassaaq
Egyptenillu alanngortaani qimarnguffik narrunarsaatinngorluni.
v4 Naalagartat Soanimut tikiutereeraluarput,
aallartitallu Hanesimut anngutereeraluarput;
v5 tamarmilli kanngutsissapput
inuianni iluaqusiisinnaanngitsuni;
iluaqutaanngillat ikiuutaanatilluunniit
kanngusuutaallutilli narrunarsaataallutillu.
v6 Nunap Kujasissortaata nersutai pillugit pruffiitikkut oqaatigeqqusaq.
Nunakkut annilaangaffiusukkut naalliunnartorsiorfiusukkullu,
løvip arnavissap løvillu angutivissap,
paarmortorujuup uumasorujuullu sulullip najugaatigut
pisuussutitik erlinnartuutitillu
siutituunut qatigattuunullu nammatsillugit ingerlappaat
inuiannut iluaqusiisinnaanngitsunut.
v7 Egyptenip ikiuinera suunanilu piunngitsuuvoq.
Taamaattumik taasarpara:
»Rahabi nipangersitaasoq!«
v8 Oqaatsit makku allattarfimmut allakkiartukkit,
mappersakkamilu nalunaarlugit
ulluni piumaartuni uppernarsaatigiuagassatut
qaqugorsuarmut.
v9 Inuiaapput naalasseriitsut,
meeqqat sallutuut,
meeqqat Naalakkap ajoqersuussutaanik
tusarumanngitsut.
v10 Takorluuisartunut oqartarput:
Takorluueqinasi,
pruffiitinullu:
Eqqortumik siulittueqinasi!
Tammartitsissutinik oqaluffigitigut,
nakutitsiniummik siulittuiffigitigut!
v11 Aqqusinermit nigoritsi,
aqqusininnguamit sangugitsi,
Israelip Illernartua
uatsinnit peersissiuk!
v12 Tamanna pillugu oqarpoq Israelip Illernartua:
»Oqaatsikka suutinnginnassigit,
nakuusernerli peqqusersiornerlu tatigalugillu
tunaarigassigit,
v13 ajortuliaq tamanna ilissinnut tassaalissaaq
soorlu qarmap napparissup quppaa
aarlerinartumik aatsariartuinnartoq
qarmaq tassanngaannavik – imaaliallannerinnakkut – nakkarluni sequmilluinnassalluni.
v14 Sequmititaassaaq marriortup qummuattaatut
sussaajunnaarluni aserortutut;
nassaassaqassanngilaq aseqqukumik
ikumatitamit aamanik aalliutaasinnaasumik,
imaluunniit tasiliamit imermik qalusissutaasinnaasumik.«
v15 Imami oqarsimavoq Guuti Naalagaq, Israelip Illernartua:
»Saanniarussi nukinnguteqarnasilu taava annaanneqassaasi,
uninngaannarussi aarleqquteqarnasilu tamanna nakuussutigissavarsi.«
Kisianni piumanngilasi!
v16 Oqarpusimi:
»Hesterluta qimaassaagut«
– qimaajumaqigassi iluamik qimaatissavassi!
»Oqilasuut hesterfigissavavut«
– takussavarsi, suli oqilanerusunut malersortissavassi!
v17 Tuusintit qimaassapput ataatsip sioorasaarineratigut.
Qimaassaasi tallimanit sioorasaarneqarussi,
ikilingaarassi amiakkussinnut assigilerserlugit
napasoq qaqqap qaaniittoq
katinngallu qattorngup qaaniittoq.
v18 Naalakkalli qilanaaraa ilissinnik saammaassinissani,
nikuikkumaarpoq nallittorumallusi.
Naalagarmi Guutiuvoq naapertuilluartoq.
Pilluarput tamarmik taassumunnga erinisuttut!
v19 Tassami ilissi Zionip inui,
ilissi Jerusalemimi najugaqartusi,
qiaqinasi!
Saammaatissavaasi torlulaffigigussinni;
qinnutisi tusarniariarunigit akissavaasi.
v20 Naalakkap tunissavaasi
naalliutsitat nerisaannik erloqisitallu imigaannik;
ajoqersortilli isertorunnaassaaq,
nammineq isinnik ilitsersortit takussavat.
v21 Nammineq siutinnik tusassavat
tununnit oqaaseq:
»Aajuna aqqusineq, taanna ingerlavigissavarsi!«
Talerpimmukarumavusimi saamimmukarumallusilu.
v22 Taava guutiliaatitit sølvimik qallikkat
inuusaliaatitillu kuultitalersukkat
minguttuutissavatit.
Mingulittut ilillugit naloriutissavatit
ima oqarlutit: »Peeritsi!«
v23 Taava naatsiiassat narsaatinnut siaruartikkatit
siallerfigitikkumaarpai
timiusiassallu narsaatinni naasut
kimittuunngortillugillu pikkunartunngortillugit.
Ullussami tassani nersutaatitit
narsani isorartuuni mangiassapput.
v24 Ussigit siutituullu narsaammi sulisut
nerukkaatissanik seernarsisunik
nivaattamik ajassaataasanillu salissimasunik
nerissapput.
v25 Qaqqani kingittuni tamani
qattunernilu portusuuni tamani
imeq kuunnguani kuukkumaarpoq
ullussami toqoraaffissuarmi
napasuliat uppikaatinneqarfianni.
v26 Qaammatip qaamarnga seqernup qaamarngatut ilissaaq,
seqernullu qaamarnga arfineq-marloriaammik sakkortunerulissaaq,
ullut arfineq-marluk qaamarngattut,
ullussami tassani Naalakkap innuttani aqqunarsimasut katsorsarpagit
ikiilu ajorunnaarsillugit.
v27 Naalakkap aqqa ungasissumit takkuppoq
kamangaarluni pissaaqalunilu.
Kamanneranit qarlui qappiorput,
oqaa tassa inneq nungutitsisoq,
v28 anersaartornera ippoq kuuttut
supilluni qungatsimut annguttutut.
Inuiaqatigiit nakkalatsissavai
nakkalatserummik nungutitsissummik,
inuiaqatigiillu qarni tammartitsissummik kimmisserlugit.
v29 Ilissili erinarsuataassaasi
soorlu unnuami inuit nalliussivissamut illernarsaraangata,
uummatissigut tipaatsullusi
soorlu qarlortarlutik ingerlaaleraangata
Naalakkap qaqqaanut,
Israelip qaarsuanut.
v30 Taava Naalakkap nipini naalannartoq tutsiutitissavaa
takutillugulu talini patitsisoq kamangaarnikkut,
innerup nungutitsisup ikualaneragut,
sialussuakkut, sialukkut kuisiinnartukkut nataqqornatigullu ujaraasutigut.
v31 Naalakkap nipaa Assyriap annilaarutigissavaa
anaattaminik anaalissammani.
v32 Unataammik anusinngorsaammik
Naalakkap Assyriamut tutsitsineri tamarmik
qilaatersorpalaamik sianaarpalaamillu ingiorteqassapput;
akiuunnermini assani silutsippaa
ajugaaffigalugulu.
v33 Qisuttuivimmi qangarsuarli piareerneqareerpoq,
kunngimut atoriaannaalluni;
Naalakkap pilliiviup qisuttuivia itisilerlugulu atittorsarpaa,
inneq qisussallu naammangaartut piareereerlugit.
Anersaartornerminik ikikkumaarpaa
ikuallassaatitut kuuttutut ilillugu.