v1 Qaagitsi inuiaqatigiit ilissi tusarnaarlusilu,
naalaaritsi ilissi inuiaat!
Tusarnaarilit nuna taassumaniittullu tamarmik,
silarsuaq pinngortitaalu tamarmik!
v2 Naalakkap inuiaat tamaasa kamaffigimmagit
uumitsaallugit sakkutuui tamaasa;
piuneerussassanngortissavai
akeraannut toqutassanngortillugit.
v3 Toqutat maangaannaq iginneqassapput,
toqungasut timaat tippaatissapput,
qaqqat aammik kuussapput.
v4 Qilaap perpassui tamarmik nungussapput,
mappersakkatut qilak imuneqassaaq,
perpassuilu toquninngussapput
viinnequtip pilutai toqornit assigalugit,
figenequt toquliorsimasoq assigalugu.
v5 Qilammi panara
naammatsisimaarpoq:
Edomimut tuppoq
inuiaat taakkua piuneerussassanngortitama eqqartuunneqaatissaannik.
v6 Naalakkap panaa aammik poorsimavoq.
Kuserpoq orsumik,
savaaqqat savaasallu angutivissat aavannik
tunnumillu savat angutivissat tartoqutaannik.
Naalagarmi pilliutissanik Bosrami toqoraavoq,
Edomimi toqoragarpassuaqarpoq;
v7 Taakkununnga ilanngullutik uppigarput ussigit nujuartat,
ussigit angutivissat puffalullu;
aavat nunap imersimavaa,
orsoq issumut sermussimavoq.
v8 Tassami Naalakkap piareerpaa ulloq akiniaaffissaq,
ukioq akiliiffik Zioni pillugu saqitsaannermi.
v9 Edomip kuunngui usserummik imaqalerumaarput
issortaalu ikuallassaatinngorluni;
nuna usserutinngussaaq ikualasoq.
v10 Unnuakkulluunniit ullukkulluunniit qamissanngilaq,
pujua qummukassaaq soraajuitsumik,
suerussimassaaq kinguaariikkuutaani,
angallavigineqanngisaannassaaq qaqugorsuarmut.
v11 Tulugatsiaap qeriiallu nuna pigilissavaat,
uppik tulugarlu tassani ineqassapput.
Naalakkap ussersaat oqimaalutarlu makittarissaat atorlugit ussersarsimavaa
piunngitsunngortillugu suujunnaarsillugulu.
v12 Tassani kunnginngortitsisoqassanngilaq,
naalagartai tamarmik nungutitaassapput.
v13 Illussaarsui orpikkat kapinartullit naaffigissavaat,
pallittaalisaalu naasupiluit qasillernartullit naasupiluillu kapinartullit.
Sjakalinut uninngaarfinngussapput
qatigattuusanullu ineqarfinngorlutik.
v14 Tassani inoqajuitsup uumasui iliversiuullu naapeqatigiittassapput
anersaapiluillu meqqullit katisimaaqatigiittarlutik;
Liliti tassani uninngaveqassaaq
qasuersaartarfissaminik.
v15 Pulateriaarsuk tassani iniliussaaq manniliorluni,
mannini ivassavai alanngortamilu tukertillugit.
Kissaviarsuit tassani eqiterutissapput.
v16 Naalakkap mappersagaataani takusiuk atuarlugulu:
Uumasut taakku tamavimmik tamaaniissapput,
ataaserluunniit amigaataassanngilaq,
Naalakkap qarna taama peqqusimmat
anersaavatalu uumasorpassuit taakku ataatsimut katersormagit.
v17 Immeraammik naloriussissuppai,
ussersaat atorlugu nunamik pissarsissuppai
naassaanngitsumik pigisassaannik,
kinguaariikkuutaani najugassaannik.