v1 Kunngip Hizkijap tamakku tusaramigit atisani alittorpai, puunik atisilluni Naalakkap naalaffianut iserpoq.
v2 Kunngikkormiunilu qullersaasoq Eljakimi naalagaaffimmilu allattuuneq Shebna palasillu utoqqaanertaat puunik atisisimasut pruffiitimut Esajamut Amosip erneranut aallartippai v3 oqarfigeqqullugu: »Hizkijap oqarfigeqquaatit: Ulloq manna tassaavoq ulloq annikilliorfik, pillagaaffik narrunarsagaaffillu. Meeraq erniulivikkaluarpoq, erninissamulli nukissaqanngilaq! v4 Immaqa sakkutuunut qullersaasup oqaasii Naalakkap Guutivit tusarsimavai. Naalagaata, Assyriap kunngiata, aallartippaa Guuti uumasoq asissoqqullugu; Naalakkalli Guutivit pillassavaa oqaatsit taakku tusakkani pillugit. Taamaattumik suli amiakkuusut qinnunniakkit!«
v5 Kunngip Hizkijap aallartitai Esajamut tikiummata v6 taassuma oqarfigai: »Naalagarsi oqarfigissavarsi: Ima oqarpoq Naalagaq: Oqaatsit tusakkatit Assyriap kunngiata kiffaasa asissorlunga oqaasii pillugit siooralissanngilatit. v7 Isummertissavara nunaminit tusakkani pillugit nunaminut utertariaqalersillugu, namminerlu nunaani panamik toqutaatikkumaarpara.«
v8 Sakkutuunut qullersaasup uterami Assyriap kunngia naapippaa Libna tiguarniarlugu ungusarileraa; tusarsimavaa kunngi Lakishimit aallarsimasoq.
v9 Taava Assyriap kunngia nalunaarfigineqarpoq Nubiap kunngia Tirhaka aallartoq sorsuffigiartorluni. Tamanna tusaramiuk aallartitsivoq ima oqaqqusilluni: v10 »Ima oqassaasi Judap kunngianut Hizkijamut: Guutinnit tatigisannit nakutitaaniaqinak ima oqartinneqarlutit: Jerusalemi Assyriap kunngiata assaanut tunniunneqassanngilaq. v11 Tusarsimajunnarsivammi Assyriap kunngiisa nunat tamaasa qanoq iliorfigisimagaat piuneerussassanngortillugit – taamaattoq aniguissangagaluartutit! v12 Inuiaat siuaasama nungutissimasaat – Gozanimiut, Karanimiut, Resefimiut Telassarimilu Edenimiut – guutiminnit annaanneqarsinnaasimanerpat? v13 Naak Hamatip kunngia, Arpadip kunngia imaluunniit Lairip, Sefarvajimip, Henap Ivvallu kunngii?«
v14 Hizkijap allakkat allakkisartunit tigugamigit atuareerlugillu Naalakkap naalaffianut majuarpoq isivillugillu Naalakkap kiinaata saani. v15 Taava Hizkija Naalakkamut qinuvoq: v16 »Katersaarsuit Naalagaat, Israelip Guutia, illit kerubiusat qulaanni issiavissaarsuanni issiasutit, illit kisivit nunarsuarmi kunngeqarfinnut tamanut Guutiusutit; illit qilak nunalu pinngortippatit! v17 Siutitit manikkit, Naalagaq, tusaaniarlutillu; isitit uisikkit, Naalagaq, isiginiarlutillu! Tusaakkit oqaatsit taakku tamaasa Sankeribip oqaasereqqusai Guuti uumasoq asissorniarlugu. v18 Ilumoorpormi, Naalagaq, Assyriap kunngiisa inuiaat nunaallu tamaasa nungutissimammatigit v19 guutiilu innermut eqqarsimallugit. Kisianni taakku Guutiunngillat, tassaaginnarput qisummit ujaqqamilluunniit inuit assamminnik sanaavi; taamaattumik aserortersinnaasimavaat. v20 Maannali Assyriap kunngiata assaanit annaatsigut, Naalagaq Guuterput, nunarsuarmi kunngeqarfinnut tamanut ilisimaleqqullugu illit Naalagaq kisivit Guutiusutit.«
v21 Taava Esaja Amosip ernera Hizkijamut imaattumik oqariartortitsivoq: Ima oqarpoq Naalagaq, Israelip Guutia: Assyriap kunngia Sankeribi pillugu qinnuigisimavarma.
v22 Naalakkap Assyriap kunngia pillugu oqaasii imaapput:
Mitaatigalutillu asissorpaatit
niviarsiap, Zionip paniata.
Jerusalemip pania,
narrugalutit ileqimisaartorpoq!
v23 Kina asissorsimagaluarpiuk mitallugulu,
kimut oqaatsit aniatissimagaluarpigit?
Isitit aarlortippatit qilammut
Israelip Illernartua makitasaarfigalugu!
v24 Aallartitatit atorlugit Naalagaq asissorpat!
Oqarputit:
»Uanga qamuterpassuaqarlunga
qaqqanut kinginnerpaanut majuarpunga,
Libanonimi pavungarsuaq.
Killorpakka cederit portoqisut,
kakillarnaqutillu kusanaffaarissut.
Annguppunga qaarpiaanut
orpinnut Libanonip naatsiivianiittunut.
v25 Allamiut nunaanni imersiorlunga assaavunga imerlungalu;
tummakkanni
Egyptenimi ikerasaliat tamaasa paqqertippakka!«
v26 Tamanna qangarsuarli tusareersimanngiliuk
maanna piviusunngortitara?
Itsarsuarli ilusilersugaraara
nalliutitillugulu maanna.
Illoqarfiit pallittaalisallit illit tassaalersippatit ujaqqanik qaleriissat.
v27 Inui sapilerput
annilaanganermit kanngusunnermillu,
assigilerlugit narsaammi naasut,
naanerit qorsuusut,
ivikkat illut qaavini naasut,
anorip kangisiup uulinertitai.
v28 Nalusanngilara inginnersutit,
angalaarnersutit aggernersutilluunniit.
v29 Kamaffigeqigamma
akerliuniartuarnerillu siutinnut anngummat
norlumik qingarmiulissavakkit
qanikkullu kimmisserlutit,
aqqusinikkullu aggerfikkut
utimut aallartissavakkit.
v30 Mannalu nalunaaqutigissavat:
Ukioq manna nerissavaat isumaminnik siaruartersimasut
aappaagulu isumaminnik naasut,
kisianni aappaaguagu siaruarterillutillu katersuissapput,
viinnequteqarfinni ikkussuillutik inerititaalu nerillugit.
v31 Judakkut amiakkui aniguisimasut
sorlaneqqissapput atimikkut, qulimikkullu inerittoqarlutik.
v32 Jerusalemimit tikiukkumaarput amiakkuusut,
aniguisut qaqqami Zionimi.
Katersaarsuit Naalagaata ilungersornera taamaalisitsiumaarpoq.
v33 Ima oqarpoq Naalagaq Assyriap kunngia pillugu:
Illoqarfimmut matumunnga isissanngilaq
qarsumilluunniit piseriussiffigissanagu.
Eqqortinnaveeqquteqarluni qanilliartussanngilaa,
kaajallalluguluunniit ippiliugaliussanani.
v34 Aqqutikkut aggerfimmigut
utissaaq,
illoqarfimmut matumunnga isissanngilaq,
oqarpoq Naalagaq.
v35 Illoqarfik manna sernissorlugu annaatissavara
uanga pillunga kiffaralu Daavi pillugu.
v36 Taava Naalakkap inngilia aallarpoq Assyriamiullu tammaarfianni angutit 185.000-it toqullugit; aqaguani ullaannguaq tamarmik toqungasut nassaarineqarput. v37 Taava Assyriap kunngia Sankeribi aallarpoq, Ninevemullu uterami tassaniiginnalerpoq. v38 Ilaannili guutimi Nisrokip naalaffiani qinutillugu ernerisa Adrammelekip Sareserillu panaminnik toquppaat nunamullu Araratimut qimaallutik; ernera Asarhaddoni kingoraarlugu kunngiulerpoq.