v1 Tuppallersarsigit innuttakka, tuppallersarsigit!
oqarpoq Guutersi.
v2 Jerusalemip uummataa oqaluffigisiuk
torlulaffigalugulu
inussiatut sulisitaanera qaangiuttoq,
ajortuliaa isumakkiigaasoq
ajortuliani tamaasa pillugit
Naalakkap assaanit marloriaammik pillaatisereerami.
v3 Torlulasoqarpoq:
Inoqajuitsumi
Naalakkap aqqutissaa iluarsarsiuk,
nunami naasuitsumi
aqqusineq nalimmatsersiuk Guutitsinnut.
v4 Qooqqut tamarmik qaffassapput,
qaqqat tamarmik qattorngillu tamarmik naqillissapput,
nuna qaarsulik narsaamaninngussaaq
nunalu qattunerasaartoq qoorunngorluni
v5 saqqummersinneqassammat Naalakkap naalannassusia,
inuillu tamarmik tamanna takussavaat.
Naalagaq nammineq taama oqaluppoq.
v6 Oqartoqarpoq: »Torlulagit!«
Aperivungali: »Suna torlulaatigissagakku?«
»Inuimmi tamarmik ivigaannaapput,
alutornassusiat narsaatip naasuisut ippoq.
v7 Ivikkat panertarput naasullu toqusarlutik
Naalakkap anersaartorfigigaangatik.
Ilumut inuit ivigaapput!
v8 Ivikkat panertarput naasullu toqusarlutik,
Guutittali oqaasia naassaanngitsumik atassaaq.«
v9 Qaqqamut portusuumut qaqigit,
illit Zionip nalunaariartortitaa,
nipituumik torlulagit,
illit Jerusalemip nalunaariartortitaa,
ersinak torlulagit!
Judallu illoqarfii oqarfigikkit:
Takusiuk Guutersi aggersoq!
v10 Guuti Naalagaq aggerpoq pissarsuulluni,
taliminik naalakkersuivoq.
Akissarsiani ilagivaa
pissarsianilu siulerivaa.
v11 Savaatini paarsisutut paarai,
talerminik katersorpai;
savaaqqat pakkuppai,
savallu miluttunik piarallit siulersorlugit.
v12 Kia imeq uuttorpaa itummaminik,
qilak ussersarlugu inussami isannerinik?
Kia uuttorpaa nunap pujoralaa nappartamik uuttortaammik,
oqimaalutarlugit qaqqat,
qattorngilluunniit oqimaalutaavinnik?
v13 Kia ajoqersorsinnaavaa Naalakkap anersaava,
kia siunnersortigisinnaavaa ajoqersuussisigalugulu?
v14 Kina siunersiortarpaa paasisimasaqalerumalluni,
ingerlavissaminillu eqqortumik ajoqersuuneqarumalluni?
Kia ilisimasassanik ilinniartippaa,
takutillugulu paasisimasaqarnissamut aqqutaasumik?
v15 Inuiaat kuseriarnertut qattamiittutut ipput,
pujoralaannannguatut oqimaalutaavimmiittutut naatsorsuutassaapput.
Qeqertat ungasissumiittut qiviutut oqitsigipput.
v16 Libanonimi orpiit ikumatitamut qisugissallugit amigarput,
nersutai nujuartat pilliutigissallugit naammanngillat.
v17 Inuiaat tamarmik Naalakkamut naleqqiullutik suunngitsutut ipput,
silaannartut piunngitsutullu naatsorsuussaapput.
v18 Guuti kimut assersuunniarpisiuk?
Suna taassumunnga naligitinniarpisiuk?
v19 Guutiliaq sanasuata kuisarpaa,
kuultilerisartup kuultitertarpaa
kalunniliuuttarlugulu kuisanik sølviusunik.
v20 Sanaassarsiortarpoq qisummik aasussaanngitsumik,
sannarissumillu ujarlertarluni
guutilialiortussamik uppiaatsumik.
v21 Naluisiuk? Tusanngilisiuk?
Pileqqaarnerannilli nalunaarfigineqanngilasi?
Nunap tunngavilerneqarneraniilli
paaseriinngilisiuk?
v22 Taannaavoq nuna tamaat qulangerlugu issiasoq,
nunamiulli pillertatut ipput;
qilak isivitippaa saagutut,
siaarlugu tupertut inigisassamisut.
v23 Naalagaanerit suujunnaarsippai,
nunarsuarmi eqqartuussisut piunngitsunngortippai.
v24 Ikkussorsimaliinnartut, siaruartersimaliinnartut,
ikkutaq issumi sorlaqaliinnartoq
anersaarfigissavai toqutillugit.
Anorersuup ivikkatut teqqassavai.
v25 »Kina uannut assersuunniarpisiuk
uanga naligisattut?« oqarpoq Illernartoq.
v26 Qilaap tungaanut qiviaritsi, takussagissilu!
Kia pinngortippaa?
Amerlaqisunik sakkutooqartillugu sorsukkiartortitsisartup
tamaasa immikkut atiisigut taasarpai.
Nakuussutsi pissaassutsilu angeqimmata
ataasiinnarmilluunniit minitaqarsimanngilaq.
v27 Jaaku, qanoq ima oqalussinnaavit,
Israeli, qanoq ima oqarsinnaavit:
»Aqqutiga Naalakkamut isertorsimavoq,
eqqortumik pineqarnissara Guutip soqutiginngilaa.«
v28 Naluiuk,
tusarsimanngiliuk:
Naalagaq naassaanngitsumik Guutiuvoq,
nunarsuaq isorartooq pinngortippaa.
Qasussananilu nukillaarneq ajorpoq,
paasisimasaqassusia siunersissaanngilaq.
v29 Qasusoq nakussatsittarpaa,
nukillaangasoq pissatsittarpaa.
v30 Nukappiaqqat qasulersaraluarput nukillaalersarlutillu,
angutit inuusuttut naakkiuttarput orlusarlutillu.
v31 Kisianni Naalakkamik neriuffiginnittut nutaanik nukinissapput,
sulunissapput nattoralittut.
Arpassapput qasunatik,
ingerlassapput nukillaarnatik.