v1 Kinguneringaatsialeraa Ahasverusi saammarami Vashtip qanoq iliorsimanera qanorlu pineqarnissaanik aalajangikkat eqqarsaatigilerpai. v2 Taava angutit inuusuttut kunngimi kiffartortut siunnersuuteqarput kunngi niviarsianik inuusuttunik pinnersunik ujarliunneqassasoq. v3 Kunngi naalagaaffimmi immikkoortuini toqqaassaaq katersuisussanik niviarsianik pinnersunik tamanik pallittaalisami Susamiittumi panerfamminut paarsisuutitamit angutaassutaajagaasumit Hegajimit nakkutigineqartunut ilannguttussanik pinnersunngorsarneqartussanillu. v4 Taava arnaq inuusuttoq kunngip iluarinerpaasaa Vashti kingoraarlugu dronninginngussagaluarpoq. Inuusuttut siunnersuutaat tamanna kunngip iluarigamiuk oqaasii malillugit iliorpoq.
v5 Taamanikkut juuti Mordokajimik ateqartoq pallittaalisami Susamiittumi najugaqarpoq. Taanna tassaavoq Jairip ernera, Shim'ip ernutaa Kiship Benjaminikkuusup ernutaqqiutaa. v6 Babylonip kunngiata Nebukadnesarip Judap kunngia Jekonja Jerusalemimit aallarummagu taanna aallarussaaqataavoq. v7 Mordokajip panissiaraa Hadassa aamma Esterimik taaneqartartoq, akkammi pania, ataataminit anaanaminillu iliarsororsimasoq. Niviarsiaq taanna timigiffaarillunilu pinnersuuvoq. Angajoqqaavi toqummata Mordokajip imminut pisissimavaa nammineq panivimmisut tigummisarilerlugu.
v8 Kunngip nalunaarutaa peqqussutaalu tutsiummata arnat inuusuttorpassuit pallittaalisami Susamiittumi katersorneqarput Hegajimit nakkutigineqarlutik. Aammattaaq Esteri kunngip illussaarsuanukaanneqarpoq kunngillu panerfaasa illuanni paarsisuutitamit Hegajimit nakkutigineqalerluni. v9 Taassuma arnaq inuusuttoq taanna iluarisarilerpaa ajunngisaarfigisarilerlugulu. Piaartumik pinnersunngorsarneqalersippaa kunngillu illussaarsuani arnat saqisut arfineq-marluk immikkut toqqakkat kiffaliutitillugit. Taava Esteri saqisuilu arfineq-marluk kunngip panerfaasa illuanni ininut pitsaanerpaanut nuutsippai. v10 Esterip oqaluttuarinngilaa inuiannik kikkunnik naggueqarnini eqqarleriissortanullu kikkunnut ilaanini, tassa Mordokajip tamakku oqaluttuareqqunngimmagit. v11 Ullulli tamarluinnaasa Mordokaji panerfaat illuata ungaluugaata silataani saqisaartarpoq ilisimajumagamigit Esterip qanoq innera qanorlu iliorfigineqarnera.
v12 Arnanut ileqqoreqqusaq malillugu qaammatini aqqaneq-marlunni pinnersunngorsarneqareerlutik, tassa qaammatini arfinilinni myrramit tarnusiaq qaammatinilu arfinilinni tipigissaatiliassat pinnersinartullu allat atorlugit passunneqareerlutik arnat inuusuttut tulleriissitaagaanertik malillugu kunngi Ahasverusi iserfigisussaavaat. v13 Arnap inuusuttup kunngimut iseriartortussap qinnutigisani tamaasa pisarpai, tamakkulu panerfaat illuannit kunngip illussaarsuanut nassartarpai. v14 Unnukkut iseriartortussaavoq aqaguanilu ullaakkut pisinneqassalluni panerfaat illuannut allamut, kunngip kiffaanit angutaassutaajagaasumit Sha'agazimit kunngip panerfaanik paarsisumit nakkutigineqartumut. Tamatuma kingorna aatsaat iseriartoqqittussaavoq kunngip ilagiumallerpani, erseqqivissumik aggeqquneqaruni. v15 Taava Esteri Abikajilip Mordokajip akkaata pania Mordokajip panigiviligaa kunngimut iseriartortussanngorpoq. Iseriartulerami kunngip kiffaata angutaassutaajagaasup Hegajip panerfaat illuanni paarsisuutitap nassatassamisut siunnersuutaasa saniatigut allanik kissaatigisaqanngilaq. Takunnittut tamarmik Esteri iluarinarteqaat.
v16 Ukiut kunngip naalakkersuiffiisa arfineq-aappaanni qaammatit qulinganni tebetimik taaneqartartumi Esteri kunngimut illussaarsuarmiittumut iseriartortinneqarpoq. v17 Kunngip Esteri arnanit allanit tamanit asasarinerulerpaa, Esterilu kunngimit ajunngisaarfigineqarlunilu asannittuliorfigineqarpoq niviarsianit allanit tamanit annerusumik. Kunngip niaqorutaasaq niaquanut ivertippaa imminullu nulianngortillugu Vashti kingoraarlugu. v18 Esterip ataqqinaatissaanik kunngi naalagartaminik kunngikkormiortaminillu qassimiuaartitsersuaarpoq, nunallu immikkoortuini akileraarutit millisippai kunngillu pisarnerattut tunissutinik agguaalluni. v19 Niviarsialli panerfaat illuannut allaasumut katersortinneqarput.
Mordokaji illussaarsuup isaaffiata killingani issiavoq, v20 Esterillu kimulluunniit oqaluttuarisimanngilaa eqqarleriissortanut kikkunnut ilaanini inuiannillu kikkunnik naggueqarnini, Mordokajip oqaluttuaqqunngimmani; Esteri Mordokajip peqqussutai malillugit iliorpoq taassumannga perorsagaagallarami iliortarnermisut.
v21 Mordokajip kunngip illussaarsuata isaaffiata killingani issianerata nalaani kunngip kiffaasa angutaassutaajagaasut ilaasa marluk, Biktanip Tereshillu, illussaarsuup isaaffianik paarsisut ilaasa, kunngi Ahasverusi kamaatilersimagamikku toqussallugu periarfissarsiuinnalersimapput. v22 Taamaaliorniarnerat Mordokajip paaseriaramiuk tamanna dronningimut Esterimut nalunaarutigaa, nalunaarutaalu taassuma kunngimut ingerlateqqippaa Mordokajillu aqqa taallugu. v23 Paasiniaareernikkut paasineqarmat tamanna ilumoortoq kunngip kiffai taakku marluk qimitsivimmut nivinngarneqarput. Taama pisoqarnera pisimasunik nalunaarsuutinut allanneqarpoq kunngi isigitillugu.