v1 Qaammatit aqqaneq-aappaata, qaammatip adarip, ulluisa 13-ianni, ullormi kunngip oqaasiisa peqqussutaasalu atuutilersinneqarfissaanni, tassa ullormi juutit akeraasa taakkuninnga artorsartitsiffigissamaagaanni, paarlattuanik pisoqarpoq: Juutit akeqqatik artorsartippaat. v2 Kunngip Ahasverusip naalagaaffiata immikkoortuini tamani juutit illoqarfimminnut katersuupput imminnik ajortumeeriniartut saassunniarlugit. Juutit kikkunnilluunniit sapersisitaanngillat inunnit tamanit ersigineqaramik. v3 Nunap immikkoortuini naalagartat tamarmik, satrappit, naalagaatitat kunngillu atorfilittaasa juutit ikiorpaat Mordokaji ersiginermit. v4 Tassami Mordokaji kunngip illussaarsuani oqaasissaqartuulersimaqaaq, nunallu immikkoortuini tamani tusaamaneqalersimavoq; Mordokajilu pissaaneqaleriartuinnarpoq.
v5 Juutit panamik sakkoqarlutik akeqqatik saassuppaat toqorarlugit nungutillugillu, piumasaminnillu iliorfigalugit. v6 Pallittaalisami Susamiittumi juutit angutit 500-t toqorarpaat nungutillugit. v7 Aammattaaq Parshandata, Dalfoni, Aspata, v8 Porata, Adalja, Aridata, v9 Parmashta, Arisaji, Aridaji Vajzatalu, v10 Hamanip Hammedatap ernerata juutinut akeraasup erneri qulit toquppaat. Kisianni akeqqamik pigisaannik ujajaanngillat.
v11 Ulloq taanna kunngip tusarpaa pallittaalisami Susamiittumi toqunneqartut qassiunerat. v12 Taava dronningimut Esterimut oqarpoq: »Pallittaalisami Susamiittumi juutit toqussimavaat nungutissimallugillu angutit 500-t taavalu aamma Hamanip erneri qulit. Taamaappat kunngip naalagaaffiata immikkoortuini allani peqqarnerunavianngillat. Sumik qinnutissaqarpit? Tusarneqanngitsuussanngilaq! Sumik allamik kissaateqarpit? Naammassineqassaaq!« v13 Esteri akivoq: »Kunngip iluarippagu taava Susami juutit aqagu inatsit taanna ullumi atuuttoq malillugu iliorlit, Hamanillu erneri qulit qimitsivimmut nivinngarneqarlit.« v14 Kunngi oqarpoq taama pisoqassasoq, peqqussutinilu tamanna Susami nalunaarutigitippaa, Hamanillu erneri qulit nivinngarneqarput. v15 Qaammatip adarip ulluisa 14-ianni Susami juutit katersuuteqqipput illoqarfimmilu angutit 300-t toqullugit. Kisianni pigisaannik ujajaanngillat. v16 Qaammatip adarip ulluisa 13-ianni kunngip naalagaaffiata immikkoortuini allani juutit katersuupput illersorniarlutik akeqqaminnullu saassunneqatsaaliniarlutik. Akeqqaminnit 75.000-it toqorarpaat, kisianni pigisaannik ujajaanngillat. v17 Qaammatip ulluisa 14-ianni qasuersaarput, ullorlu taanna nalliuttorsiorfinngortippaat nuannaarfinngortillugulu. v18 Susami juutit katersuupput qaammatip ulluisa 13-ianni 14-iannilu, ullullu 15-ianni qasuersaarput, ullorlu taanna nalliuttorsiorfinngortippaat nuannaarfinngortillugulu. v19 Taamaattumik juutit illoqarfeeqqani najugaqartut qaammatip adarip ulluisa 14-iat nalliuttorsiorfittut nuannaarfittullu atortarpaat ullormilu tassani nerisassanik imminnut pajuttuuttarlutik.
v20 Pisimasut tamakku Mordokajip allattorsimavai. Taava juutinut tamanut kunngip Ahasverusip naalagaaffiata immikkoortuini tamani najugaqartunut, qanittumiittunut ungasissorsuarmiittunullu, allakkanik nassiussivoq v21 peqqullugillu qaammatip adarip ulluisa 14-iat 15-iallu ukiut tamaasa nalliuttorsiorfigisassagaat, v22 eqqaaniarlugit ullut akeqqanut sorsukkunnaarfiit, eqqaaniarlugu qaammat kappialanerit nuannaarninngorfiat aliasunnerullu nalliuttorsiorfinngorfia; nalliussisassavaat nalliuttorsiorlutik nuannaarlutillu, nerisassanik imminnut pajuttuullutik piitsunullu tunissuteqarlutik. v23 Juutit siullermeerlutik taamaaliornertik Mordokajillu allakkamini imminnut peqqussutai aalajangersimasumik ileqqunngortippaat.
v24 Tassami Hamani Hammedatap ernera Agagikkuusoq juutinut tamanut akeraasoq pilersaaruteqarsimagaluarpoq juutit nungutikkumallugit, purimillu immeraatsitsineratigut aalajangerneqarsimagaluarpoq juutit toqorarneqassasut nungutitaallutillu. v25 Kisianni kunngip tamanna tusaramiuk allakkamigut peqqusisimavoq Hamanip juutit pillugit pilersaarutipiluni nammineq pineqaatigissagaa namminerlu erninilu qimitsivimmut nivinngarneqassasut. v26 Taamaattumik ullut taakku taaneqartarput purimisiorfinnik, oqaaseq puri nagguigitillugu. Allakkat taakkua imaat tamaasa naapertorlugit taamatullu namminneq takusatik misigisatillu naapertorlugit v27 juutit imminerminnut kinguaassaminnullu immissullu upperisaqalersunut tamanut ullut taakku nalliuttorsiutigineqartussanngortippaat ileqqussaatitat malillugit ukiut tamaasa piffissami aalajangikkami, ileqqussanngorlugu unioqqutinneqartussaanngitsoq. v28 Ullut taakku eqqaaniarfiussapput nalliuttorsiorfiullutillu kinguaariikkuutaani eqqarleriinni tamani, nunap immikkoortuini tamani illoqarfinnilu tamani. Ullut purimisiorfiit juutinit nalliussinngitsoorneqassanngillat, kinguaavinilu puiorneqanngisaannassapput.
v29 Dronningi Esteri Abikajilip pania juutilu Mordokaji tamanut ammasumik allagaqarput purimi pillugu aappassaaneerluni allakkat aalajangersarumallugit. v30 Mordokajillu juutit Ahasverusip naalagaaffiata immikkoortuini 127-ni najugaqartut tamaasa allaffigai eqqissinermik isumakuluuteqaranilu inuunermik kissaallugit, v31 atortuulersikkumallugit ullut taakku piffissami aalajangersimasumi purimisiorfiit juutip Mordokajip dronningillu Esterip nalliussisassanngortitaat imminnullu kinguaassaminnullu ileqquusussanngortitatik najoqqutassalerlugit iisinnginniarnissamut kappialanissamullu. v32 Taava Esterip peqqussutaasigut purimisiornissami najoqqutassat atortuulersinneqarput, mappersakkamullu allanneqarput.