v1 Naalakkap oqaasia uannut pivoq imaalluni:
v2 Illit inuk, nalorsitsaarutinik assersuutinillu imaattunik Israelikkut oqaluffigikkit
v3 oqarlutit: Ima oqarpoq Guuti Naalagaq:
Nattoralissuaq
isorartoqisunik takisuunillu sululik,
torsusuunik tamalaanik qalipaatilinnik meqqulik
Libanonimut tikiuppoq.
Cederip kaarfa tinnguppaa
v4 naanerata isorlersaa napillugu,
niuertut nunaannut aallaruppaa
illoqarfimmi niuerfiusumi ikkullugu.
v5 Taava nunap naasuisa ilaannik tinngussilluni
saanngummut ikkuppaa;
imissarissaartumiikkami
naajartulerpoq.
v6 Naalerami viinnequtinngorpoq
kanaartakitsoq nuna atuarlugu naasoq,
avalequtinngui nattorallip tungaanut isattortut
sorlaalu ataaniittut.
Viinnequtinngorpoq
avalequteqalerluni
avalequtinnguartaartorlunilu.
v7 Nattoralissuarli alla tikiuppoq
isorartoqisunik sululik
torsusoorsuarnik meqqulik.
Viinnequtip sorlani taassumunnga sangutippai
avalequtinnguani tungaanut siaartillugit
naatitsivissiami ikkussaaffimmini
imerterneqaqqulluni.
v8 Issorissumi
ermup kuugaartup killingani
ikkunneqarsimavoq
avalequtinnguaqaleqqullugu
inerititaqaleqqullugulu
viinnequtinngoqqullugulu alutornaqisoq.
v9 Oqarit: Ima oqarpoq Guuti Naalagaq:
Iluatsissanerpa?
Viinnequtip sorlai nutsunneqassannginnerpat
inerititaarutitillugu
naarlaallu uummaarissut toquninngortillugit?
Viinneqummi sorlaanit peerniassagaanni
nukersuuttariaqanngilaq
sakkutooqartariaqarnaniluunniit.
v10 Ikkussaagaluarpoq;
kisianni iluatsissanerpa?
Anorip kangisiup tikippani
erniinnaq toquninngussannginnerpa
naatitsivissiami naaffigisamini?
v11 Naalakkap oqaasia uannut pivoq imaalluni: v12 Inuiaat taakku naalasseriitsut oqarfigikkit: Paasinngilisiuk tamanna qanoq isumaqartoq? Babylonip kunngiata Jerusalemimut tikiulluni kunngi naalagartallu tigusarai Babylonimullu nunaminut aallarullugit. v13 Kunngillu eqqarliisa ilaat tiguaa angerfigeqatigalugu uppernarsaasillugulu. Nunami annerit aallaruppai v14 naalagaaffik taanna naqisimaneqaqqullugu makeqqeqqunagulu, angerutsinilu maleruaqqugamiuk atajuaqqullugulu. v15 Babylonilli kunngianut pikitsitsivoq angutitanilu Egyptenimut aallartillugit hesterpassuarnik sakkutoorpassuarnillu tuneqqulluni. Iluatsitsissanerpa? Taamaaliortoq pillarneqanngitsuussanerpa? Angerutsimik unioqqutitsisoq ilaginnaannarneqassanerpa? v16 Ilumut uumagama, oqarpoq Guuti Naalagaq: Uppernarsaatigisani sumiginnarpaa kunnginngortitsisiminullu angerutigisani unioqqutillugu. Taamaattumik kunngivit najugaani, Babylonimi, toqussaaq. v17 Faraop sorsunnermi sakkutoorpassuarnik katersarpassuarnilluunniit ikiussanngilaa akerai ippiliugaliorpata saassussiffissanillu qaqiffissiulerpata inuppassuit toqutaassutissaannik. v18 Kunngip uppernarsaatigisani sumiginnarlugu angerutigisani unioqqutippaa, aali assammikkut eqillutik uppernarsaaqatigiissimagaluarlutik. Taamaaliorami pillarneqanngitsuussanngilaq.
v19 Taamaattumik oqarpoq Guuti Naalagaq: Ilumut uumagama pillassavara uannut uppernarsaatigisani sumiginnarmagu uannullu angerutigisani unioqqutimmagu. v20 Napiaaniutikka taassumunnga siaassavakka napitillugulu, Babylonimullu pisissavara tassani eqqartuukkumallugu uannut ilumuunngitsuliornera pillugu. v21 Sakkutuui qinikkat tamarmik panamik toqorarneqassapput, amiakkuusoqarpallu taakku tamaginnut siammartitaassapput. Taava paasissavarsi uanga tassaasunga Naalagaq. Taamami oqaluppunga!
v22 Ima oqarpoq Guuti Naalagaq: Taava uanga nammineq cederip portusuup kaarfanit avaleqummik tigusissaanga, taassumalu isorlersaanit naarlaannguaq nusullugu peeriarlugu qaqqarsuarmut kingittumut ikkutissavara. v23 Israelip qaqqarsuanut ikkutissavara, avalequteqalissaarlu inerititaqalerlunilu cederinngorluni alutornaqisoq. Tassani timmissat tamalaat iniliussapput meqqutaasanilu alanngisimassallutik, v24 orpippassuillu orpiisa tamarmik paasissavaat uanga tassaasunga Naalagaq, orpimmik portusuumik pukkilisitsisoq pukkitsumillu portusisitsisoq, orpimmik uummaasumik toquninngortitsisoq toquninngoraluartumillu sikkersoqalersitsisoq. Uangami Naalagaq taama oqaluppunga, naammassiumaarparalu.