v1 Naalakkap oqaasia uannut pivoq imaalluni:
v2 Israelip nunaa pillugu sunaana ussatigisarissi:
Siuaasatik seernartunik paarnartorsimammata
kinguaavi kigulluttunngorput.
v3 Ilumut uumagama, oqarpoq Guuti Naalagaq: Israelimi tamanna ussatigissaassavarsi.
v4 Inuit tamaasa pigaakka, ataataasup inuunera erneratalu inuunera uanga pigaakka. Inuk ajortuliortoq taanna toqussaaq!
v5 Angut iluartuuguni iluartumik naapertuilluartumillu iliortarpoq. v6 Qaqqani pilliutinik nerisanngikkuni, Israelip guutipalaajutai guutisiorfiginngikkunigit, tullimi nulianut kanngunartuliunngikkuni, arnaq aaqartillugu innaatinngikkuniuk, v7 inoqamminik iluanaarniarfiginninngikkuni, sallunaveeqqut pisassaqarfimminut utertikkuniuk, arsaarinninnani nerisassaatini kaattunut tunniukkunigit atisaqanngitsorlu atisartaartillugu, v8 iluanaarniutissaminik taarsigassarsisitsisarnani ernialiisarnanilu, assani iluaatsuliornermit alisikkuniuk, saqitsaattunik naapertuilluartumik eqqartuussiguni, v9 inatsisikka malillugit inuuguni inassutikkalu maleruarluarniarunigit – taava taama inuuseqartoq iluartuuvoq; ilumut taanna inuuginnassaaq, oqarpoq Guuti Naalagaq.
v10 Iluartorli ernertaarpat, ernertaavalu nakuusertuuguni inorersuullunilu v11 ataatani ileqqorissuusimasoq iliornerisigut ataasiinnakkulluunniit malinnagu, tassa qaqqani pilliutinik nerisaruni, tullimi nulia kanngunartuliorfigiguniuk, v12 ikiortarialinnik piitsunillu iluanaarniarfiginnikkuni arsaarinnillunilu, sallunaveeqqummik utertitsinngitsooruni, guutipalaanik guutisiorfiginnikkuni maajunnartuliorlunilu, v13 iluanaarniutissaminik taarsigassarsisitsisaruni ernialiisarunilu – taava taanna inuuginnassava? Naamik, inuuginnassanngilaq! Toqussaaq maajunnartunik tamakkuninnga tamanik iliorami. Ilumut nammineq toqunini pisuussutigissavaa.
v14 Ernertaarisaali taanna nammineq ernertaarpat, ernertaavatalu ataatami ajortuliai takusani siooratsaatigalugit ileqquliutinngikkunigit, v15 qaqqani pilliutinik nerisanngikkuni, Israelip guutipalaajutai guutisiorfiginngikkunigit, tullimi nulia kanngunartuliorfiginngikkuniuk, v16 inoqamminik iluanaarniutiginninngikkuni angerfigeqatiginninnani arsaarinninnanilu, kaattoq nerisassaatiminik tuniguniuk atisaqanngitsorlu atisartaartillugu, v17 assani iluaatsuliornermit alisikkuniuk, iluanaarniutissaminik taarsigassarsisitsisanngikkuni ernialiinngikkunilu, inassutikka malillugit inuuguni inatsisikkalu maleruarluarniarunigit – taava taassuma ataatami ajortuliai toqussutigissanngilai; ilumulli inuuginnassaaq. v18 Ataataali nakuusersimasoq, arsaarisimasoq nunaqqatiminullu ajortumik iliorsimasoq toqussaaq ajortuliani pillugit. v19 Ima aperivusi: »Sooq ernerata ataatami ajortuliaa pillarneqaatigissanngilaa?« Ernerata iluartumik naapertuilluartumillu iliorluni inatsisikka tamaasa maleruaqqissaarniaramigit inuuginnassaaq. v20 Inuk ajortuliortoq kisimi toqussammat ataataasup ajortuliornera ernerata pillarneqaatigissanngilaa, ernerusullu ajortuliornera ataataata pillarneqaatigissanngilaa. Iluartoq iluarnini naapertorlugu pineqassaaq, iluaatsorlu iluaatsuunini naapertorlugu pineqassaaq.
v21 Iluaatsorli ajortuliani ileqqorisaraluanilu tamaasa tunullugit uannut saakkuni inatsisikkalu tamaasa maleruarlugit iluartumik naapertuilluartumillu iliorluni, taava ilumut toqunani inuuginnassaaq. v22 Unioqqutitsinerigalui tamarmik eqqaamaneqassanngillat, iluartumik iliuuseqarnermigut inuuginnassaaq. v23 Iluaatsup toqunissaa piumasarissagaluarnerpara? oqarpoq Guuti Naalagaq. Ileqqorisaraluani ajortut tunukkunigit inuuginnassannginnerpa?
v24 Iluartorli iluarsutsini tunullugu iluanngitsup maajunnartuliaasa assinginik iluanngitsulioruni, taava inuuginnassanerluni? Suliai iluartut tamarmik eqqaamaneqassanngillat; ilumuunngitsuliani ajortulianilu ileqqorisimasani toqussutigissavai. v25 Ilissi oqarpusi: »Naalakkap periaasia iluanngilaq.« Taava tusaagitsi Israelikkuususi: Uanga periaasera tassaanerpa iluanngitsoq? Imaannginnerpa ilissi periaasersi iluanngitsuusoq? v26 Iluartoq iluarsutsini tunullugu iluanngitsulioruni toqussaaq; iluanngitsuliarisimasani toqussutigissavai. v27 Iluaatsorli iluaatsuussutsimini ileqqorigaluani tunullugit iluartumik naapertuilluartumillu ilioruni imminut inuuginnartissaaq. v28 Unioqqutitsinerit ileqqorigaluani tamaasa takugamigit tunullugillu ilumut toqunani inuuginnassaaq. v29 Israelikkut oqarput: »Naalakkap periaasia iluanngilaq.« Uanga periaasera iluanngitsuunerarpisiuk, Israelikkuususi? Imaannginnerpa ilissi periaasersi iluanngitsuusoq?
v30 Taamaattumik tamassi immikkut ileqqorisasi naapertorlugit eqqartuutissavassi, Israelikkuususi, oqarpoq Naalagaq. Allamut saagitsi! Unioqqutitsinisi tamaasa tunussigit pisuutitaassutigeqqunagit. v31 Unioqqutitsinisi iperarlugit uummatissigut anersaassigullu nutaanngorniaritsi! Soormi toqujumavisi, Israelikkuususi? v32 Massami, kialuunniit toqunissaanik piumasaqanngilanga, oqarpoq Guuti Naalagaq. Allamut saagitsi, taava inuuginnassaasi!