v1 Ukiut 30-anni qaammatit sisamaata ulluisa tallimaanni aallarussaasut akornanniitillunga kuup Kebarip eqqaani qilak ammarpoq, Guutiussutsimillu takusaqarpunga.
v2 Qaammatip ulluisa tallimaanni, kunngip Jojakinip aallarussaanerata kingornagut ukiut tallimaanni, v3 Naalakkap oqaasia palasimut Ezekielimut Buzip erneranut pivoq Kaldæerit nunaanni kuup Kebarip eqqaani. Naalakkap assaata tassani tikippaa.
v4 Takuara anorersuaq avannga pitorartoq nuiarujussuaq innerlu ikualasoq; nuiaq kaajallalluni akisunneqarpoq, qeqqaniittoqarporlu, tassa innerup qeqqani, kuultitut qaqortutut ittumik uisorilasumik. v5 Innerup qeqqaniipput uumasorsuartut ittut sisamat. Ima isikkoqarput: Soorlu inuit. v6 Tamarmik sisamanik kiinaqarput sisamanillu suloqarlutik. v7 Niui narlusuujupput, isigattaallu nersuteeqqap kukiffaasut ittunik kukiffaqarput kanngussattullu qillersakkatut qillaritsigalutik. v8 Sulummik ataasigut saneqqamikkut sisamatigut inuit assaattut ittunik assaqarput. Uumasorsuit kiinaat suluilu imaapput: v9 Sului imminnut attuumapput, ingerlatillutillu allamut sanguneq ajorput, tamarmillu siumuinnaq ingerlasarput. v10 Kiinaasa inuit kiinaat assigaat, talerpimmikkut taakku sisamat tamarmik løvitut kiinaqarput, saamimmikkut taakku sisamat tamarmik ussittut kiinaqarput, sisamallu tamarmik nattoralittut kiinaqarput. v11 Sului qummut siaarsimapput marluk imminnut attuumallutik, marlullu timaat assersimallugit. v12 Tamarmik siumuinnaq ingerlapput. Sumulluunniit anersaap peqqugaangatik tassunga ingerlasarput ingerlatillutik sanguneq ajorlutik. v13 Uumasorsuit isikkoqarput aamaruutissatut aamaartutut ikualasutut, soorlu tassa nanerussat uumasorsuit akornanni aalasut; inneq akisunneqarpoq, tassanngaanniillu innaallannerit anillattarput. v14 Uumasorsuit uteqattaarput innaallannertut isikkoqarlutik.
v15 Uumasorsuit taakku isiginnaarpakka, assakaasoqarporlu nunamiittunik uumasorsuit tamarmik immikkut sanianni sisamani. v16 Assakaasut taakku sisamat krysolititut uisorilasutut isikkoqarput; sisamat tamarmik assigiipput; tamarmillu immikkut assakaasumik allamik iluleqartutut isikkoqarput. v17 Taamaattumik sammivinnut sisamanut ingerlasinnaapput; ingerlagaangamik sanguneq ajorput. v18 Assakaasut avallersaat angillutillu annilaarnangaarput, taakkulu sisamat kaajallallutik isitut ittunik ulikkaarput. v19 Uumasorsuit nunami ingerlagaangata assakaasuttaaq sanianniillutik ingerlasarput, uumasorsuillu nunamit qangattaraangata qangattartarlutik. v20 Anersaap orneqqusaa ornittarpaat; uumasullu qangattaqatigisarpaat, uumasorsuimmi anersaavat assakaasuniippoq. v21 Uumasut ingerlagaangata assakaasuttaaq ingerlasarput unikkaangatalu unittarlutik. Uumasullu nunamit qangattaraangata assakaasuttaaq qangattaqatigisarpaat uumasorsuit anersaavat assakaasuniimmat.
v22 Uumasorsuit niaquisa qulaanniippoq qilaanngusaasatut ittoq, aligortut uisorilalluni annilaarnangaarlunilu niaquisa qulaanni siaarsimasoq. v23 Qilaanngusaasap ataani sului siaarsimapput, sanileriit sului imminnut attuumallutik; tamarmillu allanik marlunnik suloqarput taakkuninngalu timitik assersimallugit. v24 Ingerlagaangata isaqqilarpalunnerat tusaasarpara imersuit ittunnerattut, Ajugaqanngitsup nipaatut sakkutoorpassuillu perpalunnerattut; uninngatillutik sulutik nakatittarpaat. v25 Qilaanngusaasap uumasut niaquisa qulaanniittup qulaani qanngorpallattarpoq. Unikkaangamik sulutik nakatittarpaat. v26 Qilaanngusaasap uumasut niaquisa qulaanniittup qulaaniittoqarpoq safiritut ittumik issiavissaarsuartut iluseqartumik, issiavissaarsuartut isikkoqartup qaavaniippoq inuttut isikkoqartoq. v27 Takusaqarpungalu kuultitut qaqortutut uisorilasutut ittumik, innertut nigalimmik kaajaluisimasutut ittumik; aallartippoq siffiaatut iluseqartuniit qummukarluni. Siffiaatullu iluseqartuniit takusaqarpunga ammukartumik innertut isikkoqartumik. Kaajallallugu qinngorneqarpoq, v28 soorlu neriusaaq sialleraangat nuissani saqqummertartoq, taamatut isikkoqarpoq qinngornera avatangiisoq.
Taamaappoq Naalakkap naalannassusiata assigisaa, takugakkulu pallorpunga; tusaavaralu oqaluppaluttoqartoq.