v1 Naalakkap oqaasia uannut pivoq imaalluni: v2 Illit inuk, eqqartuussiniarit, illoqarfik toqoraaffik eqqartuunniaruk! Maajunnartuliaanik tamanik oqaluttuunniaruk. v3 Oqassaatit: Ima oqarpoq Guuti Naalagaq: Illoqarfimmut aqqusinermini aammik kuisisartumut piffissarititaq nalliuppoq. Guutipalaaliortarami mingutsinneqarpoq. v4 Aammik kuisinikkut pisuutitassanngorputit, guutipalaaliornikkut minguttunngorputit. Pillarneqarfissat qanillisippat ukiussavit killissaat nalliutitillugu! Tamanna pillugu inuiannut mitaatigisassanngortippakkit nunanillu tamanit asissugassanngortillutit. v5 Qanittumit ungasissumillu mitaatigissavaatsit. Minguttuussutsikkut tusaamanerlugaavutit amiilaarnartunillu ulikkaarputit. v6 Ilinnut tikiupput Israelimi naalagaanertat, tamarmik immikkut eqqarleriissortaminnit, ilinnut tikiupput aammik kuisiartorlutik. v7 Ataataasut anaanaasullu ilinni narrunarsagaasarput, takornartat ilinni qunutitaasarput iliarsuillu uillarnerillu ilinni iluanaarniutigineqartarput. v8 Tunissutikka illernartitat suusupagisarpatit sabbatikkalu nalinginnaatittarlugit. v9 Niuffagiat ilinnut tikiupput aammik kuisiartorlutik, inuillu qattunerni pilliillutik nerisarput ilinnilu kanngunartunik iliortarput. v10 Qitornat ataatamik angutaassutaa uleertarpaat, arnallu aaqarnermik nalaani mingoqartuusut pinngitsaalillugit arneriffigineqartarput. v11 Tullimik nulia maajunnartuliorfigisarpaat, ukuatik kannguttaatsumik kanngunartuliorfigalugit. Qatanngutertik arnaq ataatamik pania pinngitsaalillugu arneriffigisarpaat. v12 Akilersinnerluutinik akilersillutik toqutsisarput. Iluanaarniutissannik taarsigassarsisitsisarputit ingasattumik ernialiisarlutit. Nunaqqatitit nakuuserfigalugit peqquserluttuliorfigisarpatit iluanaarniarfigalugit. Uangali isumakkeerparma, oqarpoq Guuti Naalagaq!
v13 Assakka ersaartarpakka peqquserluttumik iluanaarutitit aallu illit aqqusininni kuuttoq pillugit. v14 Uummatit atasinnaanerpa assatillu naammattumik nakuullutik ulloq taanna akiniarnialerukkit? Uangami Naalagaq taama oqaluppunga, oqaatigisaralu naammassissavara. v15 Inuiaat takornartat akornannut siammassavakkit nunani tamani nunassillutit, mingussutsinnillu piiaavigissavakkit. v16 Inuiaat takkuanni narrunarsagaavunga ilikkut. Taava paasissavat uanga tassaasunga Naalagaq.
v17 Naalakkap oqaasia uannut pivoq imaalluni: v18 Illit inuk, Israelikkut aamakutut isigilerpakka. Tamarmik – sølvi, kanngussak, aqerloq manngertoq, savimineq aqerlorlu aqitsoq – aatsitsivimmi aamakunngorput. v19 Taamaattumik oqarpoq Guuti Naalagaq: Tamassi aamakuinnanngorassi Jerusalemimi katersussavassi. v20 Soorlu sølvi, kanngussak, savimineq aqerlorlu aqitsoq manngertorlu aatsitsivimmut katersorneqartartut innerlu supoorneqartartoq aatsinniarlugit, taamaalillunga kamanninni uumitsanninnilu katersussavassi, aaqqissuuteriarlusi aatsissavassi. v21 Katersorlusi kamannera innertut ittoq ilissinnut supuussavara tassani aaqqullusi. v22 Soorlu sølvi aatsitsivimmi aatsinneqartartoq ilissi illoqarfimmi aatsinneqassaasi. Taava paasissavarsi uanga tassaasunga Naalagaq. Uumitsannera ilissinnut kuerassavara.
v23 Naalakkap oqaasia uannut pivoq imaalluni: v24 Illit inuk, nuna oqarfiguuk: Nunaavutit kamannerup ulluani sorujuiarneqarsimanngitsoq siallerfigineqarsimanngitsorlu. v25 Naalagaanivit løvitut uiannisaartutut alittuiniartutut ittut inuit suujunnaarsittarpaat pisuussutaannillu erlinnartuutaannillu piiaaffigisarlugit amerlasuullu tassani uillarninngortillugit. v26 Palasitit inatsisinnut pinerluttarput tunissutikkalu illernartitat nalinginnaatittarlugit. Illernartunik nalinginnaasunillu immikkoortitsinngillat, mingunnaatsut mingunnartullu assigiinngissusii nalunaarutiginngilaat sabbatikkalu soqutiginagit innuttama akornanni narrunarsagaalersillunga. v27 Naalagartaat amaqqutut alittuiniartutut ipput; aammik kuisiniarumatuujupput inunnillu toqoraajumatuujullutik peqquserlullutik iluanaaruteqarumallutik. v28 Pruffiitertaat kalkimik matuuiniartutut piunngitsunik takorluuisarput, salloqittaataasunik siulittuisarlutik oqartarlutillu: »Ima oqarpoq Guuti Naalagaq«, uffa Naalakkap oqaluffiginngikkaluaraatik. v29 Nunap inui nakuuserlutik piiaasarput; ikiortariallit ajorsartullu iluanaarniarfigisarpaat takornartallu qunutittarlugit inatsisinik eqqartuussummillu tunngaveqarnatik. v30 Taakkunani ujarleraluarpunga qarmagaliorumasumik uangalu takkunni qarmap akeqqanit putuneqarfianut inissilluni nunamik sernissuiumasumik; nassaanngilangali. v31 Taamaattumik uumitsanninnik kueraaffigissavakka kamangaarnermalu inneranik suujunnaarsillugit; inuuserisaat naapertorlugu iliorfigissavakka, oqarpoq Guuti Naalagaq.