v1 Ukiut aqqarnanni qaammatip ulluisa siullianni Naalakkap oqaasia uannut pivoq imaalluni:
v2 Illit inuk! Tyrusi Jerusalemi pillugu tulluusimaapilulluni oqarpoq:
»Inuiaat Isaaffiat aserortigaavoq,
uanga pisassaraara;
illukui qaarsillaatigissavakka.«
v3 Taamaattumik ima oqarpoq Guuti Naalagaq:
Tyrusi, saassutissavakkit.
Inuiaqatigiissuit ilinnut saassussisissavakka
immap mallersorsuanngorneratut.
v4 Tyrusip qarmarsui aserortissavaat
napasuliartaalu ingutserlugit.
Tyrusi kiligarlugu issortaajarumaarpara qaarsuinnanngorlugu meqquitsoq.
v5 Qassutinut panersiivinngussaaq
immami.
Uangami taama oqaluppunga, oqarpoq Guuti Naalagaq.
Inuiaat Tyrusi ujajaaffigissavaat,
v6 illoqarfiit naalatsigisai nunavimmiittut
panamik toqoraaffigineqassapput.
Taava paasissavaat uanga tassaasunga Naalagaq.
v7 Imami oqarpoq Guuti Naalagaq: Avannga Babylonip kunngia Nebukadnesari, kunngit kunngiat, Tyrusimik saassussitissavara hestinik qamutinillu hestersunillu sakkutoorpassuarnillu ilaqartillugu.
v8 Illoqarfiit naalatsigisatit nunavimmiittut
panamik toqoraaffigineqassapput;
ilinnut saassussiffissamik qaqiffilialiussaaq ippiliugaliorlunilu
eqqortinnaveeqqutit qullarlugit assiaqutsiullugit.
v9 Qarmanik aserorterutini qarmarsuannut kaattartissavai
napasuliartatillu aserorterutinik aserorterlugit.
v10 Hestii amerlangaassagamik pujoralatsitsinerisa matuussavaatsit.
Isaaffikkut iserpat
hestersut qamutaasalu assakaasui perpalutsitsingaassammata
qarmarsuatit sajuppilussapput,
soorlu illoqarfik saassunneqartoq iserfigineqaraangat taamaattartoq.
v11 Hestimi kukiffaanik aqqusernitit tamaasa tullassavai;
sakkutuutit panamik toqorassavai
napasorsuatillu ujaraasut nunamut uppikaatillugit.
v12 Pisuussuterpassuatit tiguassavai
nioqqutissaatinnillu ujajaaffigalutit.
Qarmarsuatit piuneerutitissavai
illutillu alutornartut aserorterlugit,
ujaqqat quassuttuullu qarmallu aserornikui
immamut eqqassavai.
v13 Ilinni erinarsortut nipiliornerat nipangersissavara, sianaavillu nipaat tusarsaajunnaassaaq.
v14 Qaarsuinnanngortissavakkit issortaqanngitsoq, qassutinut panersiiviinnanngussaatit;
qarmaqqinneqanngisaannassaatit.
Uangami Naalagaq taama oqaluppunga, oqarpoq Guuti Naalagaq.
v15 Tyrusimut oqarpoq Guuti Naalagaq:
Uppinnerpit perpalunneranit
ikiligaasullu nimaarnerannit
aqqusininni toqoragaasunit
qeqertat ungasissumiittut sajutsinneqarumaarput.
v16 Naalagaanerit sineriammiittut
issiavissaarsuarminnit aqqassapput.
Qallersaataajassapput
atisatillu qalipaatigissaartut piiarlugit;
annilaarnermik atisalissapput
nunamullu ingissallutik.
Annilaartinneqartuassapput
illillu uulluutigissallutit.
v17 Upputigalutit oqarfigissavaatsit:
Tupinnaq, nungutitaavutit,
immamit peerupputit
illoqarfik nersugaagaluartutit!
Immami pissaaneqarsimagaluarputit,
illit inutillu,
nunavimmi najugaqartunik tamanik
annilaartitsisarsimagaluartutit.
v18 Maanna qeqertat ungasissumiittut annilaassapput ullormi uppiffissanni,
immallu qeqertaasa
naggatissat tataatsassutigissavaat.
v19 Imami oqarpoq Guuti Naalagaq: Illoqarfinngortikkukkit piuneerussaq illoqarfinnut inueruttunut assigitillutit, imarsuaq ilinnut qaffartikkukku imersuillu matoorpatsit,
v20 taava ajattussavakkit ilivermut aqqarsimasunut, inuiannut itsarnitsanut. Nunap itinersaaniitiinnassavakkit illukuinnanngorsimasutut itsarnitsatut ilivermut aqqartut ilagalugit, inuusut nunaannut inigigaluannut utinngisaannaqqullutit.
v21 Annilaarutissanngortissavagit atajunnaarsillutit.
Ujarneqaraluaruit qaqugumulluunniit nanineqarsinnaajunnaarsillutit, oqarpoq Guuti Naalagaq.