v1 Ukiut aqqarnanni qaammatit pingajuata ulluisa siullianni Naalakkap oqaasia uannut pivoq imaalluni:
v2 Illit inuk, Farao Egyptenip kunngia nipiliortorpassuilu ima oqarfigikkit:
Kimut naleqqiunneqarsinnaanerpit angissutsikkut?
v3 Assyriap assigigaluarpaa Libanonimi cederi,
kusanartunik avalequteqartoq,
orpinnillu orpippassuarniittunit portunerulluni;
timitaa portusuuvoq,
kaarfalu nuissat akornannut anngussimavoq.
v4 Taanna ermup alliartortippaa,
itinersuup erngata portusiartortippaa.
Taassuma kuussuani kuutsippai
ikkussaaffiata eqqaanut tamarmut,
kuunnguani kuugaartillugit
narsaatip orpiinut allanut tamanut.
v5 Taamaattumik narsaatip orpiinit allanit tamanit
portunerulerpoq.
Amerlaqisunik avalequtinnguartaartorpoq,
avalequtai annerit tallipput
imerterluarneqarnermit.
v6 Qilaap timmiai tamarmik
avalequtinnguini iniliorput;
avalequtaasalu ataanni
nunarsuup nersutai tamarmik piaqqiorput.
Alanngigaani inuiaqatigiissuit tamarmik najugaqarput.
v7 Allillunilu kusanarsilluarpoq
meqqutaasai eqimallutik nivingagamik,
sorlaami anngussimapput
imermut kuuttumut.
v8 Guutip naatsiiviata cederiisa
nallersimanngilaat,
kakillarnaquteqanngilaq taassumatut avalequteqartumik,
platanit taassuma avalequtaasut atsiginngillat.
Guutip naatsiiviani orpeqanngilaq
kusanassutsimigut taassumunnga nallersuussinnaasumik.
v9 Kusanarsarpara
meqqutaasaasigut nivingasutigut angisuutigut,
Edenip orpiinit tamanit Guutip naatsiivianiittunit
sinngagineqalersillugu.
v10 Ima oqarpoq Guuti Naalagaq: Timitat portusivoq kaarfa nuissat akornannut anngulluni portussutsilu uummatimigut makittatigilerlugu. v11 Taamaattumik inuiaat pissartaannut tunniuppara, taassuma iliorfigissammagu guutiitsuussusia naapertorlugu; igippara. v12 Inuiaat takornartat naakkittaannersaasa orpissuaq kipivaat qaqqamiitiinnarlugulu, meqqutaasaalu nakkaapput qooqqunut tamanut. Avalequtai nallorsimallutik nunap kuuini tamani ipput, nunarsuarmilu inuiaat tamarmik alanngigaa qimappaat sumiginnarlugulu. v13 Orpimmi kipisimasumi qilaap timmiai tamarmik ineqarput, avalequtaasalu akornanni nunarsuup nersutai tamarmik inissipput.
v14 Taamaattumik ermup killingani orpeqanngilaq portusuunik kanaartalinnik kaarfi nuissat akorninut anngussimasunik. Orpinnik imermik milluaasunik portussusertik tunngavigalugu imminnut tatigisoqassanngilaq, tamarmimmi toqusussaapput nunap itinersuanut inuit ilivermut aqqarsimasut akornannut pisussaallutik.
v15 Ima oqarpoq Guuti Naalagaq: Ullormi tassani toqusut inaannut aqqarmat itinersuarmut aliasuutigitippara matoorlugulu. Kuussui unitsippakka erngit kuukkunnaarsillugit. Libanoni aliasuutinik atisitippara taanna pillugu, narsaatillu orpii tamarmik parngupput. v16 Uppinnerata perpalunneragut inuiaat uulilersippakka, nakkartikkakku toqusut inaannut ilivermut aqqartunut. Nunap itinersuani Edenip orpiisa tamarmik aammalu Libanonip orpiisa pitsaanersaasa imermik milluaasut tamarmik orpissuup uppinnera tuppalliallaatigaat. v17 Taakkuttaaq ilagalugu toqusut inaannut, panamik toqutaasunut, aqqarput; inuiaallu orpissuup alanngigaani najugaqarsimagaluartut inuiaat akorninut siammartitaapput.
v18 Edenip orpiisa arlaannaataluunniit alutornassutsikkut angissutsikkullu nallersinnaanngilaatit. Edenip orpii peqatigalugit nunap itinersuanut nakkartitaassaatit; kipineqanngitsut akornanni innangassaatit panamik toqutaasut ilagalugit. Taama pineqarput Farao nipiliortorpassuilu, oqarpoq Guuti Naalagaq.