v1 Melkisedeki taanna tassaavoq Salemimi kunngiusoq Guutimullu Qutsinnerussaartumut palasiusoq – taanna Aaperaamik parsiaasoq kunngit ajugaaffigereerlugit utermat pilluaqqusisorlu, v2 Aaperaallu tamarmik qulinginik tunisaa. Aqqata nutsernera malillugu siullermik tassaavoq Iluarnermut Kunngi, kiisalu aamma tassaavoq Salemip kunngia, tassa Eqqissinermut Kunngi. v3 Ataataqarnanilu anaanaqanngilaq siuaasamilu allattorsimaffiannik peqarani. Ullut inuuffigisai aallaqqaateqanngillat inuuneralu naggateqarnani, kisianni Guutip erneranut assersuutaavoq palasiujuartuullunilu.
v4 Takuniarsiuk taanna qanoq angitigisoq, taanna Aaperaap ataataanerpaap tiguakkami pitsaanersaasa qulinginik tunisaa. v5 Levip ernerisa palasinngortortaat inatsisini aalajangersakkat malillugit pissarsiat qulinginik pisussaapput inuiaqatiminnit, tassa qatanngutiminnit, naak taakkuttaaq Aaperaamik naggueqaraluartut. v6 Taassumali taakkua naggueqatiginngisaata pissarsiat qulingi Aaperaamit pivai taannalu Guutip neriorsuutaanik pigisaqartoq pilluaqqullugu. v7 Miserratigineqarsinnaanngilarli nikanarnerusoq pilluaqquneqarmat pissaanerusumit. v8 Pissarsiat qulinginik pisut tassaasaraluarput inuit toqujasuusut, maanili pineqartoq inuuinnartussatut nalunaajaatigineqartuuvoq. v9 Naatsumik oqaatigissagaanni: Aamma Levi tassaagaluarluni pissarsiat qulinginik tunineqartartussaq nammineq pissarsiat qulinginik tunniussisimavoq Aaperaat aqqutigalugu, v10 naammi suli inunngorsimanngikkaluarluni siuaasamini taassumaneereerpoq taamani Melkisedekip parsiarmagu.
v11 Anguniagaq anguneqarsinnaasimassagaluarpat Levikkut palasiussusiat aqqutigalugu – tamannami tunngavigalugu inuiaqatigiit inatsisitik pivaat – taavami sooq allamik saqqummersoqartariaqarpa Melkisedekitut palasiusumik, Aronip palasiussusia assiginagu palasiunerarneqartumik?
v12 Palasiussusermi allanngortinneqarmat inatsisittaaq pinngitsooratik allanngortittariaqarput.
v13 Taannami matumani oqaatigisaq naggueqatigiinnut allanut pilliinermik suliaqartortaqanngitsunut ilaavoq.
v14 Naluneqanngilarmi Naalagarput Judamit naggueqartoq, naggueqatigiillu taakku palasertaqarnerannik Mosesi oqaaseqarsimanngilaq.
v15 Tamannalu erseqqinnerulersussaavoq saqqummertoqarpat palasimik allaasumik Melkisedekip assigisaanik,
v16 palasinngortitaasumik inatsisit uinikkut aalajangersumik naggueqartuunissamik piumasarisaat pinnagu, kisianni inuunerup pissaanera soraartussaanngitsoq tunngavigalugu.
v17 Taannami ima nalunaajaatigineqarpoq:
Illit palasiussaatit naassaanngitsumik
Melkisedeki assigalugu.
v18 Pineqarpormi peqqussut siornagut atortuugaluartoq atorunnaarsitaasoq sakkukippallaarami iluaqutaananilu –
v19 inatsisimmi angusaqartitsinngillat – taartissatullu atortuulerpoq neriuutigisaq pitsaanerusoq Guutimut palligussinnaassutigisarput.
v20 Tamanna pisimanngilaq uppernarsaanikkut ilumoortuunerarneqarnani, palasilli Levikkuusut uppernarsaanertaqanngitsumik palasinngorsimagaluartut
v21 taanna palasinngorsimavoq Guutip uppernarsaaneratigut, ima oqarfigimmagu:
Naalagaq uppernarsaavoq uppernarsaaninilu utertissanagu:
Illit palasiussaatit naassaanngitsumik.
v22 Taamaalilluni Jiisusi angerutsimut ajunnginnerusumut uppernaqutsiisuulerpoq.
v23 Palasit allat amerlasuut kingoraartaattaraluartut toqup ataavatsaalimmatik,
v24 taanna soraartussaanngitsumik palasiussuseqarpoq nammineq ataavartuugami naassaanngitsumik.
v25 Taamaattumik aamma naammalluinnartumik annaassinnaavai aqqutigaluni Guutimut pisut, tassa inuuttuinnartuugami qinnukkumallugillu.
v26 Palasiunermi taama ittoq pisariaqartipparput – illernartoq ajortaatsoq, minguitsoq, ajortilinnit immikkoortitaasoq qilaallu qulaannut qutsissisitaasoq, v27 palasiunertut allatut nammineq ajortini peqqaarlugit taavalu inuiaqatimi ajortaat pillugit ullut tamaasa pilliisariaqanngitsoq, ataasiaammik taamaalioreersimagami imminik pilliutiginermigut. v28 Inatsisit inuit qajannartut palasinngortittarpaat, kisianni oqaatsip uppernarsaatip inatsisinit nutaanerusup ivertippaa erneq anguniakkamut anngussimasoq ittuinnartussamik.