v1 Eqqanaq paarsisut savanik uanga mangiartitannik tammartitsisut siammartitsisullu, oqarpoq Naalagaq. v2 Taamaattumik oqarpoq Naalagaq, Israelip Guutia, paarsisut innuttannik paarinnittut pillugit: Savaatikka siammakaatikkassigit avissaartortillugillu isumaginagillu, uanga maanna pillassavassi suliasi ajortut pillugit, oqarpoq Naalagaq. v3 Kisianni uanga savaatinnit amiakkuusut nunanit uannit ajattorneqarfiinit tamanit katersorumaarpakka ivigartorfiannullu utertillugit, kinguaassiussappullu amerlasoorsuanngorlutillu. v4 Paarsisussaannik ivertitsiumaarpunga, taakkualu paarissavaat; taava ersisuerutissaaq sioorasuerullunilu, tammartoqassanngilarlu, oqarpoq Naalagaq.
v5 Ullut nalliukkumaarput, oqarpoq Naalagaq, taava Daavip eqqarliinit naalersikkumaarpara naarlaaq iluartoq, taannalu paasisimasaqartuulluni kunngisut naalagaassaaq nunamilu iluarneq naapertuilluarnerlu atortissallugit. v6 Taassuma ulluini Juda annaanneqarumaarpoq Israelilu isumannaatsumik nunassissimassalluni. Atsissavaallu: »Naalagaq Iluarsuseqarfigaarput.«
v7 Taamaattumik ullut nalliukkumaarput, oqarpoq Naalagaq, ima oqassaarfiusussat: »Ilumut uumammat Naalagaq Israelikkunnik Egyptenimit majuartitsisoq«, v8 imali oqartarfissat: »Ilumut uumammat Naalagaq Israelip kinguaavinik majuartitsisoq nunamit avaniittumit« – nunanillu tamanit taakkuninnga ajattuiffigisannit, namminneq nunaminni najugaqarsinnaassammata.
v9 Pruffiitit pillugit.
Uummatiga aserorpoq sakissama iluanni,
saanikka tamarmik sajulerput!
Assigilerpara aalakoortoq,
viinnimit nukillaartitaq,
pissutaavoq Naalagaq,
pissutaapput oqaasii illernartut.
v10 Nuna allasiortunik ulikkaarpoq,
aliasuppoq perloqqusaanini pissutigalugu;
narsarsuup ivigartorfittai toquninngorput.
Ajortoq malersugaraat,
nakuussutaat iluaatsuliornermiippoq.
v11 Pruffiitit palasillu guutiitsuupput,
allaat uanga illunni ajussusiat misigisarpara,
oqarpoq Naalagaq.
v12 Tamanna pillugu ingerlaviat quasartunngussaaq,
taartumut ajattugaassapput
tassanilu naakkiutissallutik,
nalliutitsivigissagakkit perlussamik
ukiuni pillarneqarfissaanni,
oqarpoq Naalagaq.
v13 Samariap pruffiitertaani
annilaarnartumik takusaqarpunga:
Ba'alip aqqani siulittuisarput
innuttakkalu Israelimiut tammartittarlugit.
v14 Jerusalemilli pruffiitertaani
suli ajornerusumik takusaqarpunga:
Allasiorlutik arnerisarput sallutuujullutillu;
pinerluttut pruffiitit kajumissaartarmatigit
ajussutsimit
saanniartoqanngilaq.
Tamarmik uannut ipput Sodomatut,
Jerusalemimiut uannut ipput Gomorratut.
v15 Taamaattumik oqarpoq Katersaarsuit Naalagaat
pruffiitit pillugit:
Nerisassissavakka sungarnitsumik
imigassillugillu toqunartulimmik,
Jerusalemip pruffiitertaanit
guutiitsuussuseq siaruarsimammat
nunamut tamarmut.
v16 Ima oqarpoq Katersaarsuit Naalagaat:
Pruffiitit oqaasii naalaaqinasigit!
Siulittuiffigaasi,
kisianni nakutinniarpaasi.
Uummatimik takorluugaannik nalunaajaaffigaasi
Naalakkap oqaaserinngisaanik.
v17 Uannik asiginnaasut oqarfigisarpaat:
»Naalagaq oqarsimavoq: Maanna eqqissineqalerpoq«,
aamma kikkulluunniit saqitseriillutik uummatimikkut manngertittut pruffiitinit ima oqarfigineqartarput:
»Ajunaarnermit eqqorneqassanngilasi.«
v18 Kina Naalakkap isumalioqatigiissortaani peqataava
oqaasiilu takusarlugit tusartarlugillu?
Kia oqaatsikka tusarnaarpai
naalaarlugillu?
v19 Naalakkap kamannera pitorarpoq anorersuartut kaavittuliortutut; iluaatsut niaqui qarsullugit kaavittuliorpoq.
v20 Naalakkap kamannera anorersuartut ittoq atorsarussanngilaq uummatimi pilersaarutai suliarereertinnagit naammassitinnagillu. Naggataatigut tamanna paasiumaarparsi!
v21 Pruffiitit ikku aallartitarinngikkaluaritsik
taamaattoq nalunaariartortarput,
oqaluffiginngikkaluaritsik
taamaattoq siulittuisarput.
v22 Uanga isumalioqatigiissortanni peqataasimagaluarunik
taava oqaatsikka innuttannut tusarliussimassagaluarpaat,
innuttakkalu uannut saatsissimassagaluarlugit ingerlaviannit ajortumit
suliaannillu iluaatsunit.
v23 Najukkanniinnaq Guutiunerpunga?
oqarpoq Naalagaq,
Guutiunnginnerpungattaaq ungasissumi?
v24 Isertortoqarsinnaanerpa
takusinnaanngisannik?
oqarpoq Naalagaq.
Uangaannginnerpa
qilammik nunamillu tamakkiisoq,
oqarpoq Naalagaq.
v25 Tusarpakka pruffiitit atera taallugu salluliorlutik siulittuisut oqarlutik: »Sinnattorama, sinnattorama!«
v26 Pruffiitit taakku salluliorlutik namminneq uummatiminnit pisunik piumasaarsuutaannarminnik siulittuisut qanoq sivisutigisumik taama oqalussappat?
v27 Pilersaarutigaat sinnattukkatik ilaminnut oqaluttuarisartakkatik atorlugit innuttakka uanga atinnik puiuisikkumallugit, soorlu innuttama siuaasaasa Ba'alisiornermikkut atera puiorsimagaat.
v28 Pruffiitip sinnattugaqartup sinnattukkani oqaluttuariinnarniarliuk, uangali oqaatsinnik ilumiugisaqartup oqaatsikka sallusuilluni nalunaajaatigissavai.
Kanaartaq karrertaarunnikoq karrertallillu assigiissuteqarsinnaappat?
oqarpoq Naalagaq.
v29 Oqaasera innginnerpa innertut,
oqarpoq Naalagaq,
kaattatullu qaarsunik sequtserisutut?
v30 Tamanna pillugu saassutissavakka pruffiitit taakku,
oqarpoq Naalagaq,
uanga oqaatsinnik imminnit tilligartuummata.
v31 Saassutissavakka pruffiitit taakku,
oqarpoq Naalagaq,
kipissanatik oqaluttarmata oqartarlutillu:
»Naalagarmi oqaluppoq.«
v32 Saassutissavakka pruffiitit siulittuisut, oqarpoq Naalagaq, sinnattukkanillu salloqittaataasunik siaruarterisut innuttannillu tammartitsiniartut sallunermikkut oqalunnermikkullu, uffa uanga aallartitarisimanngikkitsik peqqusiffigisimanatilluunniit; taakku innuttannut iluaqutaassuseqanngillat, oqarpoq Naalagaq.
v33 Inuiaat uku pruffiitilluunniit palasilluunniit aperippatsit: »Sunaana Naalakkamit oqaasereqqusaq?«, ima akissavatit: Nanertuutaavusi, uannit naloriutissavassi, oqarpoq Naalagaq. v34 Pruffiitimit, palasimit inuilluunniit arlaannit oqaatsit uku: »Naalakkamit oqaasereqqusaq« oqaaserineqaraluarpata taava angut taama oqartoq inoqutaalu pillassavakka.
v35 Immissinnut ima aperisassaasi: »Naalagaq qanoq akiva, Naalagaq qanoq oqaluppa?« v36 Kisianni oqaatsit uku: »Naalakkamit oqaasereqqusaq« oqaasereqqinngisaannassavarsi, tassa oqaasereqqusaq inuup nammineq oqaaserimmagu. Ilissili Guutip uumasup, Katersaarsuit Naalagaata, Guutitta oqaasiata isumaa allanngortittarparsi. v37 Pruffiitimut ima aperisassaasi: »Naalakkap qanoq akivaatit, Naalagaq qanoq oqaluppa?« v38 Oqaatsilli uku atorussigit: »Naalakkamit oqaasereqqusaq«, taava Naalagaq oqassaaq: Oqaatsit uku: »Naalakkamit oqaasereqqusaq« oqaaserigassigit uffa oqaatsit taakku oqaasereqqunngikkaluarikka, v39 taava ilissi illoqarfillu ilissinnut siuaasassinnullu tunniussaraluara naloriutissavassi kiinnama saanit, v40 mitannarsisitaatillusilu narrunarsagaatillusilu qaquguluunniit puiorneqartussaanngitsumik.